బెల్లంపల్లి, వెలుగు: మంచిర్యాల జిల్లా బెల్లంపల్లి పట్టణంలోని బాలగంగాధర్ తిలక్ గ్రౌండ్లో ఈ నెల 24న ప్రారంభమైన 9వ సబ్ జూనియర్ యూత్ నేషనల్ సాఫ్ట్ బేస్ బాల్ బాల, బాలికల పోటీలు గురువారం ముగిశాయి. 12 రాష్ట్రాలకు చెందిన క్రీడాకారులు ఈ పోటీల్లో పాల్గొన్నారు. విజేతలకు రాష్ట్ర ఎస్సీ, ఎస్టీ కమిషన్ సభ్యుడు రేణికుంట్ల ప్రవీణ్, కలెక్టర్ కుమార్ దీపక్, సీబీ సీఐడీ రిటైర్డ్ అడిషనల్ ఎస్పీ, సాఫ్ట్ బేస్ బాల్ స్టేట్ ప్రెసిడెంట్ పులియాల రవికుమార్ బహుమతులను అందజేసి అభినందించారు.
ఈ పోటీల్లో సబ్ జూనియర్స్ బాలబాలికలు, యూత్ మెన్స్, ఉమెన్స్ ఓవరాల్ చాంపియన్ షిప్ను కేరళ కైవసం చేసుకుంది. ద్వితీయ స్థానంలో మహారాష్ట్ర, తృతీయ స్థానంలో తెలంగాణ జట్లు నిలిచాయి. నేషనల్గేమ్స్ జాతీయ కార్యదర్శి నాందేవ్ జగన్నాథ్ షిండే, కాంగ్రెస్ లీడర్లు మనిమంద రమేశ్, నాతరి స్వామి, సాఫ్ట్ బేస్ బాల్ స్టేట్ సెక్రటరీ దుర్గం గురువేందర్ సింగ్ పాల్గొన్నారు.
వాలీబాల్లో విజేతగా యూపీ..
కోస్గి: నారాయణపేట జిల్లా కోస్గి పట్టణంలో ఐదు రోజులుగా జరిగిన జాతీయ వాలీబాల్ అండర్–19 టోర్నమెంట్ బాలుర విభాగంలో గుజరాత్ జట్టుపై ఉత్తరప్రదేశ్ జట్టు విజయం సాధించింది. ఈ టోర్నమెంట్లో 33 జట్లు పాల్గొన్నాయి. విజేతలకు ఐజీ సత్యనారాయణ, వికారాబాద్ ఎస్పీ నారాయణరెడ్డి, కాంగ్రెస్ పార్టీ కొడంగల్ నియోజకవర్గ ఇన్చార్జి ఎనుముల తిరుపతిరెడ్డి విజేతలకు ట్రోఫీ, మెడల్స్ అందజేశారు.
ఐజీ సత్యనారాయణ మాట్లాడుతూ యువత క్రీడల్లో పాల్గొంటే మానసిక ఎదుగుదలతోపాటు స్పోర్ట్స్ కోటాలో ఉద్యోగాలు పొందే అవకాశం ఉంటుందని చెప్పారు. కాడా స్పెషల్ ఆఫీసర్ వెంకట్రెడ్డి, డీవైఎస్ వో వెంకటేశ్శెట్టి పాల్గొన్నారు. యూపీ జట్టు క్రీడాకారులను జాతీయ బీసీ సంక్షేమ సంఘం నేతలు వేణుగోపాల్, మన్నె బస్వరాజ్ యాదవ్ శాలువాలు కప్పి సన్మానించారు.
ఆకట్టుకున్న ‘ఆకాశ్’
కోస్గి పట్టణంలో జరిగిన వాలీబాల్ పోటీల్లో పాల్గొనేందుకు వచ్చిన రాజస్థాన్ జట్టు క్రీడాకారుడు ఆకాశ్ ప్రత్యేక ఆకర్షణగా నిలిచాడు. 7.2 అడుగుల పొడవు ఉన్న ఆకాశ్తో దేశంలోని వివిధ ప్రాంతాల నుంచి వచ్చిన క్రీడాకారులు, స్థానికులు కలిసి సెల్ఫీలు తీసుకుంటూ సందడి చేశారు.
