- ఖమ్మం అడిషనల్ కలెక్టర్ మధుసూదన్ నాయక్
ఖమ్మం టౌన్, వెలుగు : గిరిజనుల సమగ్రాభివృద్ధి కోసం కేంద్ర ప్రభుత్వం ప్రవేశపెట్టిన పీఎంజేయూజీఏ (ప్రధాన మంత్రి జన జాతీయ ఉన్నత గ్రామ అభియాన్) కార్యక్రమాన్ని ఖమ్మం జిల్లాలో సమర్థవంతంగా అమలు చేసేందుకు చర్యలు తీసుకోవాలని అడిషనల్ కలెక్టర్ డి. మధుసూదన్ నాయక్ అన్నారు. బుధవారం కలెక్టరేట్ లోని తన చాంబర్ లో పీఎంజేయూజీఏ సంబంధించి రూపొందించిన వాల్ పోస్టర్ను ఆయన విడుదల చేశారు.
ఈ సందర్భంగా మాట్లాడుతూ గిరిజనుల సామాజిక ఆర్థిక పరిస్థితులను మెరుగుపరుస్తూ, వారి జీవన ప్రమాణాలు పెంచేందుకు కేంద్ర ప్రభుత్వం పీఎంజేయూజీఏ పథకాన్ని ప్రవేశపెట్టిందన్నారు.ఈ స్కీమ్ను గిరిజనులు 50 శాతం కంటే ఎక్కువ ఉన్న గ్రామాల్లో అమలు చేయనున్నట్లు తెలిపారు.
మారుమూల గిరిజన ప్రాంతాలకు అవసరమైన వసతులను కల్పించనున్నట్టు చెప్పారు. ఈ కార్యక్రమంలో గిరిజన సంక్షేమ శాఖ ఉప సంచాలకుడు ఎన్. విజయలక్ష్మి, సాంఘిక సంక్షేమ శాఖ ఉప సంచాలకుడు కే. సత్యనారాయణ, గిరిజన సంక్షేమ శాఖ కార్యాలయ పరిపాలన అధికారి ఏ. నారాయణరెడ్డి, కలెక్టరేట్ పరిపాలన అధికారిణి అరుణ, అధికారులు, తదితరులు పాల్గొన్నారు.
