ఖమ్మం కలెక్టరేట్ లో మరో సోలార్ షెడ్ .. ఈవీఎం గోడౌన్ వైపు ఏర్పాటుచేసే ప్లాన్

రాష్ట్రంలో మొదటి గ్రీన్ బిల్డింగ్ ఇదే
రెండేండ్ల కింద రూ.కోటిన్నరతో సోలార్ పార్కింగ్ షెడ్ ఏర్పాటు
కింద వాహనాలకు నీడ, పైన కరెంట్ ఉత్పత్తి
నెలకు రూ.2.16 లక్షల విద్యుత్ బిల్లు ఆదా
కలెక్టరేట్ కు 75 శాతం కరెంట్ ఇక్కడే ఉత్పత్తి

ఖమ్మం, వెలుగు: ఖమ్మం కలెక్టరేట్ లో మరో సోలార్ పార్కింగ్ షెడ్ ఏర్పాటుకు జిల్లా ఉన్నతాధికారులు ప్లాన్ చేస్తున్నారు. 200 కిలోవాట్ల సామర్థ్యంతో ప్రస్తుతం ఈవీఎం గోడౌన్ ఉన్న వైపు కొత్తగా షెడ్ నిర్మించేలా ప్రతిపాదనలు సిద్ధమవుతున్నాయి. కలెక్టరేట్ లో ఇప్పటికే 200 కిలో వాట్ల సామర్థ్యంతో రెండేండ్ల కింద సోలార్ పార్కింగ్ షెడ్ ను ఏర్పాటు చేశారు. ఆ సమయంలో దేశంలోనే సోలార్ విద్యుత్ లో నడిచే మొదటి కలెక్టరేట్ గా ఖమ్మం రికార్డుల్లోకి ఎక్కింది. రాష్ట్రంలో మొదటి గ్రీన్ బిల్డింగ్ గా కూడా రికార్డు క్రియేట్ చేసింది. ఇప్పుడు అక్కడే మరో షెడ్ ను ఏర్పాటు చేసి విద్యుత్ ఉత్పత్తి సామర్థ్యాన్ని పెంచాలని కలెక్టర్ ముజమ్మిల్ ఖాన్ నిర్ణయించారు. ఇటీవల దీనిపై విద్యుత్ శాఖ, రెడ్కో అధికారులతో సమావేశాన్ని నిర్వహించి కొత్త ప్లాంట్ ఏర్పాటుపై సమీక్షించారు.

నెలకు రూ.2.16 లక్షలు ఆదాజ...

కలెక్టరేట్ లో సోలార్ పార్కింగ్ షెడ్ ఏర్పాటు కారణంగా కలెక్టరేట్ లో నెలకు రూ.2.16 లక్షల కరెంట్ బిల్లు ఆదా అవుతోంది. కలెక్టరేట్ లో పనిచేసే ఉద్యోగుల వాహనాలకు ఒకవైపు నీడనిస్తూనే, మరోవైపు కలెక్టరేట్ కు అవసరమైన విద్యుత్ లో 75 శాతం కరెంటును ఉత్పత్తి చేస్తోంది. 2023 సెప్టెంబర్ 2న రూ.1.58 కోట్లతో 200 కిలోవాట్ల సామర్థ్యంతో ఇక్కడ సోలార్ రూఫ్డ్ పార్కింగ్ షెడ్ ను ఏర్పాటు చేశారు. అప్పటి కలెక్టర్ వీపీ గౌతమ్ ఆలోచన మేరకు డీఎంఎఫ్టీ, సత్తుపల్లి స్పెషల్ డెవలప్ మెంట్ ఫండ్ నిధులు దీనికి కేటాయించారు. ఇందులో 100 కిలోవాట్ సామర్థ్యంలో ఒక హైటెన్షన్ లైన్, 30 కిలోవాట్ల సామర్థ్యంతో రెండు ఎల్టీ లైన్లు, 40 కిలోవాట్ల సామర్థ్యంతో మరో ఎల్టీ లైన్ ఉన్నాయి.

ఇక్కడ ఉత్పత్తి అయిన విద్యుత్ ను వర్కింగ్ డే రోజుల్లో కలెక్టరేట్ కు వాడుతుండగా, సెలవు రోజుల్లో ఉత్పత్తి అయిన విద్యుత్ ను నెట్ మీటర్ ద్వారా గ్రీడ్ కు ఎక్స్ పోర్ట్ చేస్తున్నారు. కలెక్టరేట్అవసరాల కోసం నెలకు 28 వేల యూనిట్ల విద్యుత్ ఉపయోగిస్తుండగా, 24 వేల యూనిట్లను సోలార్ షెడ్ల ద్వారా ఉత్పత్తి చేస్తున్నారు. మిగిలిన 4 వేల యూనిట్లకు మాత్రమే బిల్లు చెల్లిస్తే సరిపోతుంది. సోలార్ పవర్ ద్వారా నెలకు రూ.2.16 లక్షలు కరెంటు బిల్లు ఆదా అవుతుందని విద్యుత్ శాఖ అధికారులు లెక్కతేల్చారు. ప్రస్తుతం ఏర్పాటు చేసిన ప్లాంట్ 25 ఏండ్ల పాటు సోలార్ విద్యుత్ ఉత్పత్తి చేస్తుందని అధికారులు చెబుతుండగా, ఆరు నుంచి ఏడేండ్లలో విద్యుత్ ఛార్జీల రూపంలో పెట్టుబడి మొత్తం ఆదా అవుతుందని, ఆ తర్వాత 17 ఏళ్ల పాటు ఉచితంగా విద్యుత్ ను ఉపయోగించుకోవచ్చని వివరిస్తున్నారు.

కొత్తగా మరో సోలార్ రూఫ్డ్ పార్కింగ్ షెడ్

ఖమ్మం కలెక్టరేట్ లో దాదాపు 35 డిపార్ట్ మెంట్ల ఉద్యోగులు పనిచేస్తున్నారు. వీళ్లందరితో పాటు రోజూ వివిధ పనుల కోసం కొన్ని వందల మంది విజిటర్స్ కలెక్టరేట్ కు వస్తుంటారు. దీంతో ప్రస్తుతం ఉన్న సోలార్ పార్కింగ్ షెడ్ సరిపోకపోవడంతో వాహనాలను బయటే ఉంచాల్సి వస్తోంది. దీంతో పాటు ప్రస్తుతం ఉత్పత్తి అవుతున్న విద్యుత్ కూడా పూర్తి స్థాయిలో కలెక్టరేట్ అవసరాలకు సరిపోవడం లేదు. ఈ రెండు అవసరాల దృష్ట్యా ఈవీఎం గోడౌన్ ముందున్న ఖాళీ స్థలంలో మరో 200 కిలోవాట్ల సామర్థ్యంతో ప్లాంట్ ఏర్పాటు చేయడం ద్వారా అవసరమైన విద్యుత్ కంటే ఎక్కువ ఉత్పత్తి చేయవచ్చని అధికారులు భావిస్తున్నారు.