- విచారణ కమిటీ రిపోర్ట్ ఆధారంగా నిర్ణయం
ఖమ్మం, వెలుగు: ఖమ్మం గవర్నమెంట్ మెడికల్ కాలేజీలో ఫస్టియర్ స్టూడెంట్ కు గుండు కొట్టించిన అసిస్టెంట్ ప్రొఫెసర్ రెహ్మాన్ను ఉన్నతాధికారులు సస్పెండ్ చేశారు. ఈ ఘటనను కాలేజీ ప్రిన్సిపల్ రాజేశ్వరరావు ఆధ్వర్యంలో ఏర్పాటు చేసిన ముగ్గురు సభ్యుల కమిటీ సోమవారం విచారించింది. అనస్తీషియా హెచ్ఓడీ డాక్టర్ రవి, అకడమిక్ వైస్ ప్రిన్సిపల్ డాక్టర్ సరిత, జనరల్ మెడిసిన్ హెచ్ఓడీ డాక్టర్ రాజు ఎంక్వైరీ జరిపారు. హాస్టల్ లో ఉన్న స్టూడెంట్స్ తో పాటు, కాలేజీ సిబ్బందిని కూడా విచారించారు. బాధిత స్టూడెంట్ ను పిలిచి, ఘటనపై వాంగ్మూలం తీసుకున్నారు.
అసిస్టెంట్ ప్రొఫెసర్ రెహ్మాన్ ను కూడా విచారించారు. తర్వాత రిపోర్ట్ ను ఉన్నతాధికారులకు పంపించారు. యాంటీ ర్యాగింగ్ కమిటీ చైర్మన్గా ఉండి రెహ్మాన్ ప్రవర్తించిన తీరు తప్పేనని రిపోర్ట్ ఇచ్చినట్టు తెలుస్తోంది. ఇంటర్నల్ ఎంక్వైరీ రిపోర్ట్ ఆధారంగా అసిస్టెంట్ ప్రొఫెసర్ రెహ్మాన్ ను సస్పెండ్ చేస్తూ రాష్ట్ర వైద్య విద్య డైరెక్టర్‌ ఉత్తర్వులు జారీ చేశారు.
