భద్రాద్రికొత్తగూడెం, వెలుగు : కోవిడ్ తర్వాత కొత్తగూడెంలోని రైల్వేస్టేషన్ (భద్రాచలం రోడ్) నుంచి రద్దైన రైళ్లను పునరుద్ధరించేలా కేంద్ర రైల్వే శాఖ మంత్రితో మాట్లాడతానని ఖమ్మం ఎంపీ రామసహాయం రఘురాంరెడ్డి అన్నారు. కొత్తగూడెంలోని రైల్వే స్టేషన్ను ఆయన ఆదివారం సందర్శించారు. రైల్వే స్టేషన్లో రూ. 25కోట్లతో జరుగుతున్న అభివృద్ధి పనులను పరిశీలించారు.
రైళ్ల రాకపోకల వివరాలను రైల్వే ఆఫీసర్లను అడిగి తెలుసుకున్నారు. అనంతరం చుంచుపల్లి మండలం విద్యానగర్ కాలనీలోని రెవెన్యూ మంత్రి పొంగులేటి శ్రీనివాసరెడ్డి క్యాంప్ ఆఫీస్లో ఏర్పాటు చేసిన విలేకర్ల సమావేశంలో ఆయన మాట్లాడారు. కేంద్రంలోని బీజేపీ ప్రభుత్వం గతేడాది కేవలం 55 రోజులు మాత్రమే పార్లమెంట్నడిపిందన్నారు. దాదాపు మూడున్నర నెలల పాటు పార్లమెంట్ను నడపాల్సి ఉన్నా పార్లమెంట్ సమావేశాలను కుదిస్తూ ప్రజా సమస్యలను పక్కన పెడుతోందని ఆరోపించారు.
రాజ్యాంగంలో పేర్కొన్న విధంగా పార్లమెంట్ సమావేశాలను జరిపేలా బీజేపీ ప్రభుత్వం చూడాలన్నారు. జిల్లాలో ఎయిర్ పోర్ట్ ఏర్పాటుకు తనవంతు కృషి చేస్తానన్నారు. కొత్తగూడెం పట్టణంలోని రైల్వే స్టేషన్ పక్క నుంచి త్రీ టౌన్ పోలీస్ స్టేషన్ మీద నిర్మించే రోడ్డు కోసం అవసరమైన రైల్వే స్థలం కోసం సీఎం రేవంత్ రెడ్డితో మాట్లాడి రైల్వే ఉన్నతాధికారులతో చర్చిస్తానని తెలిపారు.
ఎంపీ వెంట జడ్పీ చైర్మన్ కంచర్ల చంద్రశేఖర్, కాంగ్రెస్ నేతలు ఆళ్ల మురళి, నాగ సీతారాములు, ఊకంటి గోపాల్ రావు, తోట దేవి ప్రసన్న, కోనేరు సత్యనారాయణ, ఆకునూరి కనకరాజు, రజాక్, నాగేంద్ర త్రివేది, మేరెడ్డి జనార్దన్రెడ్డి, జేవీఎస్చౌదరి పాల్గొన్నారు.
-
పెద్దమ్మతల్లికి పూజలు
పాల్వంచ రూరల్, వెలుగు : పాల్వంచ మండల పరిధిలోని కేపీ జగన్నాథపురం పెద్దమ్మతల్లికి ఎంపీ రఘురాంరెడ్డి ఆదివారం ప్ర్యతేక పూజలు చేశారు. ఆలయ ఈవో ఎస్ రజినికుమారి ఆలయ అర్చకులు ఆయనకు ఘన స్వాగతం పలికారు. అమ్మవారి శేషవస్త్రప్రసాదాలను అందజేశారు.
