- కారు’ దిగి కాంగ్రెస్ లో చేరిన మేయర్ పునుకొల్లు నీరజ
- మరో ఇద్దరు కార్పొరేటర్లూ మంత్రి తుమ్మల సమక్షంలో చేరిక
- ఒకట్రెండు రోజుల్లో మరో ఆరుగురు చేరేందుకు సిద్ధం!
ఖమ్మం, వెలుగు: ఖమ్మం మున్సిపల్ కార్పొరేషన్ కాంగ్రెస్ వశమైంది. బీఆర్ఎస్ కు చెందిన మేయర్ పునుకొల్లు నీరజ శుక్రవారం రాష్ట్ర వ్యవసాయ శాఖ మంత్రి తుమ్మల నాగేశ్వరరావు సమక్షంలో కాంగ్రెస్ లో చేరారు. ఆమెతో పాటు మరో ఇద్దరు కార్పొరేటర్లు కొత్తపల్లి నీరజ (13వ డివిజన్), సరిపూడి రమాదేవి (11వ డివిజన్) కూడా హస్తం పార్టీ జెండా కప్పుకున్నారు.
మేయర్ కూడా పార్టీ మారడంతో మున్సిపల్ కార్పొరేషన్ అధికార పార్టీ వశమైంది. తాజాగా కార్పొరేటర్ల చేరికతో కాంగ్రెస్ బలం 29 మందికి చేరింది. మిత్రపక్షాలైన సీపీఐ, సీపీఎంకు ఇద్దరు చొప్పున కార్పొరేటర్లు కూడా ఉండడంతో సంఖ్యాబలంగా ఎలాంటి చిక్కులేదు. అయితే ఒకట్రెండు రోజుల్లో మరో ఆరుగురు కార్పొరేటర్లు కూడా బీఆర్ఎస్ ను వీడి కాంగ్రెస్ లో చేరనున్నట్టు సమాచారం.
మారిన బలాబలాలు..
మొత్తం 60 డివిజన్లున్న ఖమ్మం మున్సిపల్ కార్పొరేషన్ ఎన్నికల్లో బీఆర్ఎస్ తరఫున 43 మంది కార్పొరేటర్లు, కాంగ్రెస్ తరఫున 10 మంది కార్పొరేటర్లు, సీపీఐ తరఫున ఇద్దరు, సీపీఎం తరఫున ఇద్దరు, ఇండిపెండెట్లు ఇద్దరు చొప్పున గెలవగా, బీజేపీ ఒక డివిజన్ ను గెల్చుకుంది. కార్పొరేషన్ ఎన్నికల తర్వాత కాంగ్రెస్ నుంచి ముగ్గురు కార్పొరేటర్లు బీఆర్ఎస్ లో చేరారు.
అసెంబ్లీ ఎన్నికలకు ముందు ఇద్దరు ఇండిపెండెంట్ కార్పొరేటర్లు, 9 మంది బీఆర్ఎస్ కార్పొరేటర్లు కాంగ్రెస్లో చేరారు. అసెంబ్లీ ఎన్నికల తర్వాత విడతల వారీగా బీఆర్ఎస్ నుంచి కాంగ్రెస్ లో చేరికలు జరుగుతూనే ఉన్నాయి. ఇప్పుడు మేయర్ తో పాటు ఇద్దరు కార్పొరేటర్ల చేరికతో కార్పొరేషన్ లో కాంగ్రెస్ బలం 29కి చేరినట్టయింది. మరో ఆరుగురు కార్పొరేటర్లు కూడా ఇప్పటికే కాంగ్రెస్ తో టచ్లో ఉన్నారని, ఇవాళో రేపో వాళ్ల చేరిక కూడా ఉంటుందని కాంగ్రెస్ నేతలు చెబుతున్నారు.
