- ధరణి దరఖాస్తులను త్వరగా పరిష్కరించాలి
- టెన్త్ ఎగ్జామ్స్కు పక్కా ఏర్పాట్లు చేయాలి
- భద్రాద్రికొత్తగూడెం కలెక్టర్ ప్రియాంక అల
భద్రాద్రికొత్తగూడెం, వెలుగు : జిల్లాలో రూ. 22.69కోట్లతో 697 స్కూళ్లలో మౌలిక వసతులు కల్పించేందుకు పనులు చేపట్టనున్నట్టు కలెక్టర్ డాక్టర్ ప్రియాంక అల తెలిపారు. కలెక్టరేట్లో స్కూళ్ల హెచ్ఎంలు, ఎంపీడీవోలు, ఇంజినీరింగ్ విభాగాల అధికారులు, డీఆర్డీవోలతో శుక్రవారం నిర్వహించిన సమావేశంలో ఆమె మాట్లాడారు. 697 స్కూళ్లలో అత్యవసరమైన సదుపాయాలను ఏర్పాటు చేయనునున్నట్టు తెలిపారు. కరెంట్, డ్రింకింగ్ వాటర్, బాలికల టాయ్లెట్స్ లాంటి వాటికి మొదటి ప్రాధాన్యత ఇవ్వనున్నట్టు చెప్పారు.
జిల్లాలో గుర్తించిన 697 స్కూళ్లలో హెచ్ఎం కన్వీనర్గా, గ్రామ మహిళా సమాఖ్య అధ్యక్షురాలు చైర్ పర్సన్గా, ప్రతి తరగతి నుంచి ముగ్గురి విద్యార్థుల తల్లులు కమిటీ సభ్యులుగా అమ్మ ఆదర్శ పాఠశాల కమిటీలను ఏర్పాటు చేయాలని ఆదేశించారు. పాఠశాల చైర్మన్, హెచ్ఎంల పేరుతో ఉమ్మడి బ్యాంక్ ఖాతాను తెరవాలని హెచ్ఎంలకు సూచించారు. కేటాయించిన నిధులను బ్యాంక్ అకౌంట్లలో వేయనున్నట్టు తెలిపారు.
ఉపాధి హామీ పథకం కింద బాలికల టాయిలెట్ల నిర్మాణానికి సంబంధించి ఎస్టిమేట్లను వెంటనే అప్ లోడ్ చేయాలని ఆదేశించారు. పనుల్లో నాణ్యత లోపిస్తే హెచ్ఎంలతో పాటు కమిటీ అధ్యక్షులే బాధ్యత వహించాల్సి ఉంటుందని హెచ్చరించారు. ఎంఈవోలు, కాంప్లెక్స్ హెచ్ఎంలు పనులపై ప్రత్యేక దృష్టి సారించాలన్నారు. ఈ కార్యక్రమంలో డీఆర్డీవో విద్యాచందన, డీఈవో వెంకటేశ్వరాచారి పాల్గొన్నారు.
టెన్త్ ఎగ్జామ్స్ పక్కాగా నిర్వహించాలి
జిల్లాలో టెన్త్ ఎగ్జామ్స్ పక్కాగా నిర్వహించేలా ఏర్పాట్లు పూర్తి చేయాలని కలెక్టర్ ప్రియాంక అల ఆదేశించారు. ఎగ్జామ్స్ సెంటర్లలో తాగునీరు, నిరంతర కరెంట్ సౌకర్యం ఉండేలా చూడాలన్నారు. సెంటర్లో ఆరోగ్య సిబ్బంది ఉండేలా చర్యలు తీసుకోవాలని చెప్పారు. ఈ ప్రోగ్రాంలో డీఈవో వెంకటేశ్వరాచారి, ఎంపీడీవోలు, ఎంఈవోలు, హెచ్ఎంలు పాల్గొన్నారు.
త్వరగా పరిష్కరించాలి..
ధరణి పెండింగ్ దరఖాస్తులను త్వరగా పరిష్కరించాలని కలెక్టర్ ఆదేశించారు. కలెక్టరేట్లో నిర్వహించిన సమావేశంలో ఆమె మాట్లాడారు. ధరణి దరఖాస్తులను వ్యక్తిగతంగా పరిశీలించాలని ఆఫీసర్లను ఆదేశించారు. ఏడు రోజుల్లోగా పెండింగ్లో ఉన్న ధరణి ఫిర్యాదులన్నింటిని క్లియర్ చేయాలన్నారు. తిరస్కరణకు గురైన దరఖాస్తుల కారణాలను చెక్ లిస్ట్లో నమోదు చేయాలని చెప్పారు. కల్యాణలక్ష్మి, షాదీ ముబారక్, మీ సేవ పెండింగ్ దరఖాస్తులను వెంటనే పరిష్కరించాలన్నారు.
ప్రజా వాణి దరఖాస్తుల పరిష్కారానికి ప్రాధాన్యత ఇవ్వాలని సూచించారు. ప్రాజెక్ట్ల పెండింగ్ భూ సేకరణ ప్రక్రియను పూర్తి చేయాలన్నారు. ఇసుక రీచ్లలో సీసీ కెమెరాలను ఏర్పాటు చేయాలని చెప్పారు. ఫారెస్ట్ డిపార్ట్మెంట్ పరిధిలో పెండింగ్లో ఉన్న భూ సమస్యల పరిష్కారానికి ఫారెస్ట్, రెవెన్యూ, సర్వే డిపార్ట్మెంట్లు జాయింట్ సర్వే చేపట్టాలని ఆదేశించారు. ప్రోగ్రాంలో జిల్లా అటవీశాఖాధికారి కృష్ణగౌడ్, డీఆర్వో రవీంద్రనాథ్, ఆర్డీవోలు మధు, దామోదర్, స్పెసల్ డిప్యూటీ కలెక్టర్ కాశయ్య, ఏవో గన్యా పాల్గొన్నారు.
