- కాంగ్రెస్ తప్పుడు ప్రచారం చేసినా.. డబుల్ ఇంజిన్ సర్కార్కే పట్టం: కిషన్రెడ్డి
- రెండు రాష్ట్రాల్లోనూకాంగ్రెస్ 30 సీట్లు దాటలే
- దేశంలో అనేక అనర్థాలకు కాంగ్రెస్ పార్టీనే కారణమని ఫైర్
హైదరాబాద్, వెలుగు: రాహుల్ గాంధీ చిలకపలుకులను మహారాష్ట్ర ప్రజలు ఏమాత్రం నమ్మలేదని కేంద్ర మంత్రి, బీజేపీ రాష్ట్ర అధ్యక్షుడు జి. కిషన్ రెడ్డి అన్నారు. జార్ఖండ్, మహారాష్ట్రల్లో కలిపి కాంగ్రెస్ పార్టీకి 30 సీట్లు కూడా దాటలేదని, అంతటి ప్రజావ్యతిరేకత ఆ పార్టీపై ఉన్నదని అన్నారు.
మహారాష్ట్రలో కాంగ్రెస్ పార్టీ తప్పుడు ప్రచారం చేసినా.. అక్కడి ప్రజలు నరేంద్ర మోదీ నాయకత్వంలోని డబుల్ ఇంజిన్ సర్కార్కే మరోసారి పట్టం కట్టారని అన్నారు. బీజేపీ వస్తే రిజర్వేషన్లు పోతాయని, మరాఠాలకు అన్యాయం జరుగుతందంటూ గత పార్లమెంట్ ఎన్నికల్లో ప్రచారం చేసి లబ్ధిపొందారని.. కానీ, 5 నెలల్లోనే ప్రజలకు వాస్తవమేంటో తెలిసిందని పేర్కొన్నారు.
శనివారం ఆయన బీజేపీ స్టేట్ ఆఫీసులో మీడియాతో మాట్లాడారు. మహారాష్ట్ర, గుజరాత్ విడిపోయినప్పుడు జరిగిన ఎన్నికల తర్వాత భారీ మెజారిటీ వచ్చిందని, మళ్లీ ఇప్పుడు అంతపెద్ద విజయం దక్కిందని అన్నారు. దేశంలో కులం, భాష, మతం పేరుతో కాంగ్రెస్ పార్టీ ఎన్నో రకాలుగా ప్రజలను ఇబ్బంది పెట్టిందన్నారు. దేశంలో అనేక అనర్థాలకు కాంగ్రెస్ పార్టీనే కారణమన్నారు.
రాహుల్కు మతిమరుపు పెరిగింది..
రాహుల్ గాంధీకి ఈ మధ్య మతిమరుపు ఎక్కువైందని కిషన్ రెడ్డి అన్నారు. దేశాన్ని ఎన్నో ఏండ్లు పాలించిన కాంగ్రెస్ ఏం వెలగబెట్టిందన్న విషయాన్ని మరిచి మాట్లాడుతున్నారన్నారు.
దేశానికి ఎంతో నష్టం చేసి దానికి బీజేపీనే కారణమంటూ వితండవాదం చేస్తున్నారని మండిపడ్డారు. రాజ్యాంగాన్ని చేతిలో పట్టుకుని కాంగ్రెస్ నేతలు విషప్రచారం చేశారని, వారి అబద్ధాలను ప్రజలు నమ్మలేదని అన్నారు.
ఎస్సీ, ఎస్టీ నియోజకవర్గాల్లో మెజారిటీ సీట్లలో మహాయుతి కూటమి విజయం సాధించిందన్నారు. మోదీ చేసిన అభివృద్ధిని వివరించే మహారాష్ట్రలో మూడోసారి అధికారంలోకి వచ్చామన్నారు.
