ఒంట్లో రక్తం తక్కువైందనగానే గుర్తొచ్చే వెజిటబుల్ బీట్రూట్. బీట్రూట్ తింటే వెంటనే బ్లడ్ వచ్చేస్తుంది అంటారు. కానీ, చెప్పినంత ఈజీ కాదు.. దాన్ని తినడం అంటారు కొందరు. అలాగంటే ఎలా? ఆరోగ్యాన్నిచ్చే వాటిని ఏదో ఒక విధంగా తినాలి కదా! అందుకే బీట్రూట్ని ఇలా ట్రై చేసి చూడండి. అందరికీ నచ్చే కలర్ఫుల్, టేస్టీ వంటలుఈ వారం మీకోసం.
వడలు
కావాల్సినవి :
శనగపప్పు, కంది పప్పు : ఒక్కోటి అర కప్పు
ఎండు మిర్చి : రెండు, నీళ్లు, ఉప్పు : సరిపడా
బీట్రూట్ తురుము : ఒక కప్పు
ఉల్లిగడ్డ తరుగు : పావు కప్పు
కొత్తిమీర తరుగు : మూడు టేబుల్ స్పూన్లు
పచ్చిమిర్చి : రెండు
అల్లం పేస్ట్ : అర టీస్పూన్
కరివేపాకులు : కొన్ని
జీలకర్ర : ఒక టీస్పూన్
ఇంగువ : చిటికెడు
బియ్యప్పిండి : రెండు టీస్పూన్లు
తయారీ : ఒక గిన్నెలో శనగపప్పు, కంది పప్పు, ఎండు మిర్చి వేసి నీళ్లు పోసి రెండు గంటలు నానబెట్టాలి. తర్వాత ఆ నీటిని వడకట్టి, మిక్సీలో వేసి మెత్తగా గ్రైండ్ చేయాలి. ఆ మిశ్రమాన్ని గిన్నెలోకి తీసి, అందులో బీట్రూట్ తురుము, ఉల్లిగడ్డ, కొత్తిమీర, పచ్చిమిర్చి తరుగు, అల్లం పేస్ట్, కరివేపాకులు, జీలకర్ర, ఇంగువ, ఉప్పు వేసి కలపాలి. ఆ తర్వాత బియ్యప్పిండి వేసి కలపాలి. ఈ పిండిని ఉండలు చేసి, చేత్తో వడల్లా వత్తాలి. వాటిని వేడి వేడి నూనెలో వేగిస్తే బీట్రూట్ వడలు రెడీ.
చట్నీ
కావాల్సినవి :
పల్లీలు, మినపప్పు, శనగపప్పు : ఒక్కో టీస్పూన్
పచ్చిమిర్చి : ఒకటి
బీట్రూట్ తురుము : ఒక కప్పు
ఉల్లిగడ్డ తరుగు : పావు కప్పు
వెల్లుల్లి : నాలుగు రెబ్బలు
నూనె, ఉప్పు : సరిపడా
కరివేపాకు : కొంచెం
చింతపండు గుజ్జు : అర టీస్పూన్
ఆవాలు, జీలకర్ర : ఒక్కోటి పావు టీస్పూన్
తయారీ : ఒక పాన్లో నూనె వేడి చేసి పల్లీలు, మినపప్పు, శనగపప్పు వేగించాలి. తర్వాత కరివేపాకు, ఉల్లిగడ్డ, వెల్లుల్లి, పచ్చిమిర్చి తరుగు వేసి కలపాలి. అందులో బీట్రూట్ తురుము, ఉప్పు వేసి మరోసారి బాగా వేగించాలి. ఆ తర్వాత వాటన్నింటినీ మిక్సీజార్లో వేయాలి. వాటితోపాటు చింతపండు గుజ్జు వేసి మెత్తగా గ్రైండ్ చేయాలి. మరో పాన్లో నూనె వేడి చేసి, ఆవాలు, జీలకర్ర, కరివేపాకు వేగించాలి. ఆ పోపుని బీట్రూట్ మిశ్రమంలో వేయాలి.
కట్లెట్
కావాల్సినవి :
నూనె, ఉప్పు : సరిపడా
పచ్చిమిర్చి : రెండు
బీట్రూట్ తురుము : ఒకటిన్నర కప్పు
అల్లం వెల్లుల్లి పేస్ట్ : అర టీస్పూన
కరివేపాకు : కొంచెం
కారం, ధనియాల పొడి : ఒక్కో టీస్పూన్
పసుపు : అర టీస్పూన్
ఆలుగడ్డ (ఉడికించి), నిమ్మకాయ : ఒక్కోటి
కార్న్ఫ్లోర్, నీళ్లు : ఒక్కోటి పావు కప్పు
బ్రెడ్ పొడి : అర కప్పు
తయారీ : పాన్లో నూనె వేడి చేసి, పచ్చిమిర్చి తరుగు, బీట్రూట్ తురుము వేసి కలపాలి. మూతపెట్టి రెండు నిమిషాలు ఉడికించాలి. ఆ తర్వాత అందులో అల్లం వెల్లుల్లి పేస్ట్, కరివేపాకు, కారం, ధనియాల పొడి, పసుపు, కొత్తిమీరతోపాటు ఉడికించిన ఆలుగడ్డ మెదిపి, దాన్ని కూడా బీట్రూట్ మిశ్రమంలో వేయాలి. తర్వాత నిమ్మరసం చల్లి మరోసారి కలిపి ముద్దగా చేయాలి. ఒక గిన్నెలో కార్న్ఫ్లోర్ వేసి, అందులో నీళ్లు పోసి కలపాలి. ఆ తర్వాత బీట్రూట్ మిశ్రమాన్ని చిన్న ఉండలు చేసి, కట్లెట్లా చేత్తో వత్తాలి. దాన్ని కార్న్ఫ్లోర్ మిశ్రమంలో ముంచి, బ్రెడ్ పొడిలో దొర్లించాలి. వాటిని నేరుగా వేడి వేడి నూనెలో వేసి రెండు వైపులా కాల్చితే బీట్రూట్ కట్ లెట్ రెడీ.
షోర్బా
కావాల్సినవి :
బీట్రూట్ : నాలుగు
నూనె : రెండు టీస్పూన్లు
మిరియాలు : నాలుగు
బిర్యానీ ఆకు : ఒకటి
అల్లం తరుగు : అర టీస్పూన్
వెల్లుల్లి తరుగు : ఒక టీస్పూన్
ఉల్లిగడ్డ, టొమాటో : ఒక్కోటి
ఉప్పు : సరిపడా
నీళ్లు : ఐదు కప్పులు
తయారీ : ప్రెజర్ కుక్కర్లో నూనె వేడి చేసి బిర్యానీ ఆకు, మిరియాలు, అల్లం–వెల్లుల్లి తరుగు వేగించాలి. తర్వాత ఉల్లిగడ్డ, టొమాటో, బీట్రూట్ ముక్కలు, ఉప్పు వేయాలి. అందులో మూడు కప్పుల నీళ్లు పోసి మూతపెట్టి నాలుగైదు విజిల్స్ వచ్చేవరకు ఉడికించాలి. ఆ తర్వాత అందులోని బిర్యానీ ఆకు తీసేసి, బీట్ రూట్ మిశ్రమాన్ని మిక్సీజార్లో పోసి గ్రైండ్ చేయాలి. ఈ మిశ్రమాన్ని ఒక పాన్లో పోసి, రెండు కప్పుల నీళ్లు పోయాలి. మిరియాల పొడి వేసి మూడు నిమిషాలు ఉడికించాలి. అంతే.. గరం గరంగా ఉండే బీట్రూట్ షొర్బా తాగడమే ఆలస్యం.
క్రిస్పీ దోశ
కావాల్సినవి :
మినపప్పు : ఒక కప్పు
బియ్యం : మూడు కప్పులు
బీట్రూట్ : ఒకటి
శనగపప్పు : ఒక టేబుల్ స్పూన్
మెంతులు : పావు టీస్పూన్
నీళ్లు, ఉప్పు : సరిపడా
పచ్చిమిర్చి : ఐదు
అల్లం : చిన్న ముక్క
తయారీ : ఒక గిన్నెలో మినపప్పు, బియ్యం, శనగపప్పు, మెంతులు వేసి, నీళ్లు పోసి రెండు సార్లు కడగాలి. ఆ తర్వాత మళ్లీ నీళ్లు పోసి ఎనిమిది గంటలు నానబెట్టాలి. తర్వాత నీటిని వడకట్టి మిక్సీజార్లో వేయాలి. వాటితోపాటు బీట్రూట్ ముక్కలు, పచ్చిమిర్చి, అల్లం, ఉప్పు కూడా వేసి, కొన్ని నీళ్లు పోసి మెత్తగా గ్రైండ్ చేయాలి. ఆ మిశ్రమాన్ని పెనం మీద దోశెలా పోసి మూడు నిమిషాలు కాల్చాలి.
