- అధికార లాంఛనాలతో అంత్యక్రియలు, పాల్గొన్న కలెక్టర్, సీపీ
- జనసంద్రమైన కుమ్మన్పల్లి
బోధన్,వెలుగు: సిక్కిం వరదల్లో చిక్కుకొని మృతి చెందిన బోధన్ మండలం కుమ్మన్పల్లి వీరజవాన్ నీరడి గంగా ప్రసాద్ వివిధ రాజకీయ పార్టీల లీడర్లు, గ్రామస్తులు, యువకులు, పోలీసులు అధికార లాంఛనాలతో కన్నీటి వీడ్కోలు పలికారు. గంగాప్రసాద్ పార్థివ దేహం ఉదయం 9:30 గంటలకు బోధన్ శివారులోని ఆచన్పల్లికి చేరుకుంది.
బోధన్, సాలూరా, ఎడపల్లి మండలాలకు చెందిన ప్రజలు తండోపతండాలుగా చేరుకొని పార్థివ దేహానికి జాతీయ జెండాలతో స్వాగతం పలికారు. బోధన్ నుంచి కుమ్మన్పల్లి వరకు భారీ బైక్ర్యాలీ నిర్వహించారు. కలెక్టర్ రాజీవ్ గాంధీ హన్మంతు, సీపీ సత్యనారాయణ, బోధన్ ఆర్డీవో రాజాగౌడ్ తదితరులు అంత్యక్రియల్లో పాల్గొన్నారు. నిరుపేద కుటుంబానికి చెందిన నీరడి స్వరూప, కాశీరాం దంపతులకు ఇద్దరు కుమారులు కాగా, పెద్దకొడుకు గంగాప్రసాద్ ఎనిమిదేండ్ల కింద సైన్యంలో చేరాడు. నాలుగు నెలల కింద గ్రామానికి వచ్చినప్పుడు, మళ్లీ దసరాకు వస్తానని చెప్పి తిరిగి రాని లోకాలకు వెళ్లాడంటూ కుటుంబ సభ్యులు కంటతడి పెట్టడం అందరినీ కలిచివేసింది. గంగాప్రసాద్కు భార్య షిరీషా, ఇద్దరు కొడుకులు ఉన్నారు.
