హైదరాబాద్, వెలుగు: తన వ్యక్తిత్వాన్ని కించపరిచేలా కొందరు వ్యవహరిస్తున్నందునే తాను మునుగోడు ఉప ఎన్నిక ప్రచారానికి దూరంగా ఉంటున్నానని ఎంపీ కోమటిరెడ్డి వెంకట్ రెడ్డి అన్నారు. మూడు దశాబ్దాలుగా కాంగ్రెస్కు సేవ చేస్తున్న తనకు ఈ మధ్య ఎన్నో అవమానాలు ఎదురయ్యాయని సోనియాకు ఆయన లేఖ రాశారు. సోమవారం ఆ లేఖను మీడియాకు విడుదల చేశారు. పార్టీలో ఇబ్బందులు ఎదుర్కొంటున్నందునే మునుగోడుపై జరుగుతున్న భేటీకి హాజరు కాలేకపోతున్నానని పేర్కొన్నారు. రేవంత్ రెడ్డిని పీసీసీ అధ్యక్షుడిగా నియమిస్తూ పార్టీ తీసుకున్న నిర్ణయాన్ని గౌరవించానని, కాంగ్రెస్ అభ్యున్నతికి ఎంతో చేశానని ఆ లేఖలో వెంకట్రెడ్డి చెప్పారు.
‘‘కొందరు నేతలు, వారి అనుచరులు నాపై అదేపనిగా వ్యక్తిగత విమర్శలు చేస్తున్నారు. నా ప్రతిష్టకు భంగం కలిగేలా వ్యవహరిస్తున్నారు. కొన్ని విషయాల్లో నేను క్షమాపణలను ఆహ్వానించినా అవమానాలు మాత్రం ఆగడం లేదు” అని వెంకట్రెడ్డి ఆవేదన వ్యక్తం చేశారు. కాగా, శంషాబాద్లో తనను కలిసిన మీడియాతో ఆయన మాట్లాడారు. కొందరు అనుభవంలేని లీడర్ల కారణంగానే పార్టీ భ్రష్టు పడుతోందని విమర్శించారు. మాణిక్కం ఠాగూర్ వైఖరి వల్లే తెలంగాణలో కాంగ్రెస్ తన ఉనికిని కోల్పోతున్నదని వ్యాఖ్యానించారు. ఆయన్ను తొలగించి వేరే వాళ్లను నియమించాలని కోరారు. ‘‘పది పార్టీలు ఫిరాయించిన వారిని పార్టీలోకి తీసుకోవడం వల్ల తీరని అన్యాయం జరుగుతోంది. మునుగోడులో కాంగ్రెస్కు 30 వేల నుంచి 35 వేల ఓట్లకు మించి రావు. ఢిల్లీలో కోర్కమిటీ సమీక్షా సమావేశం ఉన్నందునే సోనియాతో భేటీ కాలేకపోయాను. నేను కాంగ్రెస్ను వీడే ప్రశ్నే లేదు” అని స్పష్టం చేశారు.
