- ఆలయ భూమిని రంజిత్రెడ్డి కబ్జా చేసింది నిజం కాదా?
- చేవెళ్ల బీజేపీ ఎంపీ అభ్యర్థి కొండా విశ్వేశ్వర్రెడ్డి
శంషాబాద్/శంకర్ పల్లి, వెలుగు: చేవెళ్ల కాంగ్రెస్ ఎంపీ అభ్యర్థి గడ్డం రంజిత్ రెడ్డి వందల కోట్ల విలువ చేసే జూబ్లీహిల్స్ హనుమాన్ దేవాలయం భూమిని కబ్జా చేసింది నిజం కాదా అని బీజేపీ ఎంపీ అభ్యర్థి కొండా విశ్వేశ్వర్రెడ్డి ప్రశ్నించారు. సదరు స్థలంలో వెంచర్ వేసి, నాలుగు అంతస్తుల భవనాలు నిర్మించడం నిజం కాదా అని నిలదీశారు. కబ్జా విషయాన్ని తాను బయటపెట్టడంతోనే పనులు ఆపారని, నిర్మాణాలు సక్రమమే అయితే పనులు ఎందుకు ఆపేశారన్నారు. రంజిత్రెడ్డి కబ్జా చేశాడని నిరూపించేందుకు తాను సిద్ధంగా ఉన్నానని విశ్వేశ్వర్రెడ్డి సవాల్విసిరారు.
సోమవారం శంషాబాద్ లోని ఓ ఫంక్షన్హాల్లో తెలంగాణ ప్రైవేట్ ట్రాన్స్ పోర్టు మజ్దూర్ మహా సంఘ్ రవాణా కార్మికుల ఆత్మీయ సమ్మేళనం జరిగింది. రాష్ట్ర అధ్యక్షుడు చింతల నందకిషోర్ అధ్యక్షత వహించగా, ముఖ్యఅతిథిగా కొండా విశ్వేశ్వర్ రెడ్డి పాల్గొని మాట్లాడారు. రంజిత్రెడ్డి కబ్జాలపై బీజేపీ స్టేట్ ఆఫీసులో అన్ని ఆధారాలు ఉన్నాయని, దాణా, కోడిగుడ్ల స్కాంకు సంబంధించిన ఆధారాలు ఉప ముఖ్యమంత్రి భట్టి విక్రమార్క వద్ద ఉన్నాయని చెప్పారు.
గత ప్రభుత్వం జూబ్లీహిల్స్ హనుమాన్ ఆలయ భూమితోపాటు, సీతారాంపూర్లోని 1100 ఎకరాల రామాలయం భూములను రంజిత్రెడ్డితోపాటు ప్రైవేటు కంపెనీలకు దోచిపెట్టిందని మండిపడ్డారు. ప్రస్తుతం ఆ కేసులు కోర్టులో ఉన్నాయన్నారు. తాను ఎవరిపైనా లేనిపోని ఆరోపణలు చేయనని, ఒకవేళ రంజిత్రెడ్డి తప్పు చేయకపోతే తనపై పరువు నష్టం దావా వేసుకోవచ్చన్నారు. బండారం బయటపడుతుందని రంజిత్రెడ్డి భయపడుతున్నారని విమర్శించారు.
దేశానికి బీజేపీ ప్రభుత్వమే రక్ష
బీజేపీ ప్రభుత్వం ఉంటేనే దేశం సురక్షితంగా ఉంటుందని కొండా విశ్వేశ్వర్రెడ్డి చెప్పారు. సోమవారం బీజేపీ శ్రేణులు శంకర్పల్లిలోని బీడీఎల్ చౌరస్తా నుంచి శంకర్పల్లి చౌరస్తా వరకు భారీ ర్యాలీ నిర్వహించారు. విశ్వేశ్వర్రెడ్డి పాల్గొని మాట్లాడారు. చేవెళ్ల గడ్డపై బీజేపీ జెండా ఎగరడం ఖాయమన్నారు. మోదీతో పాలనతో ప్రపంచ దేశాల్లో భారత్ గౌరవం పెరిగిందన్నారు. రంజిత్రెడ్డి లోకల్కాదని, గెలిపిస్తే మళ్లీ కనిపించని విమర్శించారు. ఈ సందర్భంగా బీఆర్ఎస్ నేత, ప్రొద్దటూర్మాజీ సర్పంచి నర్సింహారెడ్డి, కొత్తపల్లి ఎంపీటీసీ శోభ విశ్వేశ్వర్రెడ్డి సమక్షంలో బీజేపీలో చేరారు. నాయకులు ప్రభాకర్రెడ్డి, రాములు, సురేశ్, వాసుదేవ్ తదితరులు
పాల్గొన్నారు.
