భద్రాద్రికొత్తగూడెం, వెలుగు : సింగరేణిలో దశాబ్దకాలంగా పనిచేసిన రిటైర్డ్ కార్మికులను గోస పెట్టవద్దని కొత్తగూడెం ఎమ్మెల్యే కూనంనేని సాంబశివరావు అన్నారు. కొత్తగూడెంలోని సింగరేణి హెడ్డాఫీస్ ఎదుట రిటైర్డ్ కార్మికులు సోమవారం చేపట్టిన ధర్నాకు ఆయన సంఘీభావం తెలిపారు. చాలా మంది రిటైర్డ్ కార్మికులకు రూ. 300 నుంచి రూ. వెయ్యిలోపే పెన్షన్ రావడం బాధాకరమని అన్నారు. హాస్పిటల్స్ నుంచి వైద్యం పొందే మాజీ కార్మికుల నుంచి 40శాతం ఫీజులు వసూలు చేయడం ఆపేసి, ఉచిత వైద్యం అందించాలన్నారు.
కనీస పెన్షన్ రూ. 10వేలు చెల్లించే విధంగా యాజమాన్యం చర్యలు చేపట్టాలన్నారు. మాజీ కార్మికులకు సొంతింటి సౌకర్యం కల్పించాలన్నారు. ఈ కార్యక్రమంలో వర్క్ ర్స్ యూనియన్ అధ్యక్షులు వాసిరెడ్డి సీతారామయ్య, ప్రధాన కార్యదర్శి రాజ్కుమార్, అదనపు ప్రధాన కార్యదర్శి మిర్యాల రంగయ్య పాల్గొన్నారు.
