భద్రాద్రికొత్తగూడెం, వెలుగు: వేసవిలో మంచినీటి ఎద్దడి లేకుండా ఆఫీసర్లు యాక్షన్ ప్లాన్ రూపొందించాలని జడ్పీ చైర్మన్ కోరం కనకయ్య ఆదేశించారు. జడ్పీ మీటింగ్ హాల్లో బుధవారం జిల్లా ప్రజాపరిషత్ జనరల్ బాడీ మీటింగ్ చైర్మన్ కోరం కనకయ్య అధ్యక్షతన జరిగింది. ఈ సందర్భంగా ఆయన మాట్లాడుతూ ప్రజా సమస్యలను పరిష్కరించేందుకు అధికారులు చొరవ చూపాలన్నారు. మిషన్ భగీరథ నీళ్లను సక్రమంగా పంపిణీ చేయాలని సూచించారు. జిల్లా హాస్పిటల్తో పాటు పలు పీహెచ్సీలలో మందులు సక్రమంగా అందుబాటులో ఉండడం లేదని జడ్పీటీసీలు వెంకటరెడ్డి, మేరెడ్డి వసంత, ఎంపీపీ కోదండరామయ్యతో పాటు పలువురు ప్రజాప్రతినిధులు ఆగ్రహం వ్యక్తం చేశారు. జిల్లా ఆసుపత్రిలో చాలా మందులు బయట కొనుక్కోవాలని చెప్పడం సిగ్గు చేటన్నారు.
మెడికల్ కాలేజీకి అనుబంధంగా ఉన్న ఆసుపత్రి నుంచి రోగులను హైదరాబాద్కు రిఫర్ చేస్తున్నారని ఆగ్రహం వ్యక్తం చేశారు. జనరల్ హాస్పిటల్తో పాటు పీహెచ్సీలలో డాక్టర్లు అందుబాటులో ఉండడం లేదన్నారు. రేగళ్ల పీహెచ్సీలో డాక్టర్లు లేకపోవడంతో గ్రామస్తులంతా ఆందోళన చేశారని సమావేశంలో ప్రస్తావించారు. కొత్తగూడెం, మణుగూరు హాస్పిటల్స్లలో గర్భిణి, బిడ్డ మృతి చెందిన ఘటనపై విచారణ చేపట్టారే తప్ప యాక్షన్ తీసుకోలేదన్నారు. వైద్యశాఖ రివ్యూ అయిపోయిన తర్వాత జనరల్ హాస్పిటల్ సూపరింటెండెంట్ రావడం పట్ల జడ్పీ చైర్మన్ అసహనం వ్యక్తం చేశారు. మిషన్ భగీరథ నీళ్లు అన్ని హ్యాబిటేషన్లకు ఇస్తున్నామని ఆఫీసర్లు చెబుతున్నా, క్షేత్రస్థాయిలో ఆ పరిస్థితి లేదన్నారు. పైప్లైన్ లీకేజీలను అరికట్టడంలో ఆఫీసర్లు విఫలమవుతున్నారని మండిపడ్డారు. పైపులు పగిలిపోతున్నా రిపేర్లు చేయడంలో నిర్లక్ష్యం చేస్తున్నారని ఆరోపించారు. జూలూరుపాడు మండలంలో విద్యార్థినితో టీచర్ అసభ్యంగా ప్రవర్తించారని, ఆయనపై ఏం చర్యలు తీసుకున్నారని ప్రశ్నించారు.
టీచర్పై పోలీస్లు పోక్సో కేసు నమోదు చేశారని డీఈఓ సోమశేఖర శర్మ సమాధానమిచ్చారు. లక్ష్మీదేవిపల్లి, సుజాతనగర్ మండల ఆఫీస్లలో తమకు ప్రత్యేక గదులు కేటాయిస్తామని పలు జడ్పీ మీటింగ్లలో హామీ ఇచ్చినా అమలు కావడం లేదని జడ్పీటీసీలు వాపోయారు. చెప్పిన సమస్యలను నోట్ చేసుకోవడం తప్ప వాటిని పరిష్కరించడంపై దృష్టి పెట్టడం లేదన్నారు. అనంతరం 2023–24 ఆర్థిక సంవత్సరానికి సంబంధించి రూ.60.30 కోట్లతో జడ్పీ బడ్జెట్ను సభ్యులు ఆమోదించారు. సమావేశంలో అడిషనల్ కలెక్టర్ కె వెంకటేశ్వర్లు, జడ్పీ సీఈవో విద్యాలత, వైస్ చైర్మన్ కంచర్ల చంద్రశేఖర్, జడ్పీటీసీలు, ఎంపీపీలు, జిల్లా అధికారులు పాల్గొన్నారు.
జాడలేని ఎమ్మెల్యేలు..
ఎంతో ప్రాధాన్యత ఉన్న జడ్పీ జనరల్ బాడీ మీటింగ్కు ఎమ్మెల్యేలు డుమ్మా కొట్టారు. కొత్తగూడెం, ఇల్లందు, భద్రాచలం, పినపాక, అశ్వారావుపేట ఎమ్మెల్యేలలో ఒక్కరంటే ఒక్కరూ కూడా అటెండ్ కాలేదు. ఐటీడీఏ ప్రాజెక్ట్ ఆఫీసర్ రాలేదు. కొందరు జిల్లా ఆఫీసర్లు తమ బదులు కింది స్థాయి ఆఫీసర్లను మీటింగ్కు పంపించగా, జడ్పీ చైర్మన్తో పాటు సభ్యులు ఆగ్రహం వ్యక్తం చేశారు.
