- పీఆర్టీయూ రాష్ట్ర ప్రధాన కార్యదర్శి గుండు లక్ష్మణ్
భద్రాద్రికొత్తగూడెం, వెలుగు : పెండింగ్లో ఉన్న ఐదు డీఏ రిలీజ్ చేయడంతో పాటు కొత్త పీఆర్సీని ప్రభుత్వం ప్రకటించాలని పీఆర్టీయూ రాష్ట్ర ప్రధాన కార్యదర్శి గుండు లక్ష్మణ్ డిమాండ్ చేశారు. ఈ విషయమై ఆదివారం కొత్తగూడెంలో పీఆర్టీయూ ఆధ్వర్యంలో ర్యాలీ నిర్వహించారు. ఈ సందర్భంగా ఏర్పాటు చేసిన జిల్లా కౌన్సిల్ సమావేశంలో ఆయన మాట్లాడారు. అర్హత కలిగిన టీచర్స్కు ఎంఈవో, డిప్యూటీ ఈవోలుగా ప్రమోషన్లు కల్పించేలా ప్రభుత్వం చర్యలు తీసుకోవాలన్నారు.
రెండేండ్లుగా డీఏలు మంజూరు చేయకపోవడంతో టీచర్స్ ఆర్థిక ఇబ్బందులు ఎదుర్కొంటున్నారని తెలిపారు. రిటైర్డ్ టీచర్స్కు రావాల్సిన బెనిఫిట్స్ను ప్రభుత్వం వెంటనే చెల్లించాలని కోరారు. ఏజెన్సీ చట్టాలకు ఇబ్బంది లేకుండా ప్రభుత్వ ధరకే ఇండ్ల స్థలాలు కేటాయించాలని డిమాండ్ చేశారు. ఓపీఎస్ పెన్షన్ విధానాన్ని పునరుద్ధరించాలన్నారు. ఈ ప్రోగ్రాంలో మాజీ ఎమ్మెల్సీ పూల రవీందర్, పీఆర్టీయూ జిల్లా అధ్యక్ష, ప్రధాన కార్యదర్శులు డీ. వెంకటేశ్వరరావు, బీ.రవి, యూనియన్నేతలు పాల్గొన్నారు.
టీచర్ల సమస్యల పరిష్కారానికి కృషి : ఎమ్మెల్యే
టీచర్ల సమస్యల పరిష్కారానికి కృషి చేస్తానని కొత్తగూడెం ఎమ్మెల్యే కూనంనేని సాంబశివరావు హామీ ఇచ్చారు. చుంచుపల్లి మండలంలోని విద్యానగర్ కాలనీలోని ఓ ప్రయివేట్ ఫంక్షన్ హాల్లో జరిగిన పీఆర్టీయూ నాలుగో జిల్లా కౌన్సిల్ సమావేశంలో ఆయన మాట్లాడారు. టీచర్ల సమస్యల పరిష్కారం కోసం పీఆర్టీయూ చేస్తున్న పోరాటాలను ఎమ్మెల్యే ప్రశంసించారు.
