కొత్తగూడెంలో పర్మిషన్​లను పక్కన పెట్టి పై అంతస్తుల నిర్మాణం

భద్రాద్రి కొత్తగూడెం, వెలుగు : కొత్తగూడెం మున్సిపాలిటీలో పర్మిషన్​లను పక్కన పెట్టి పై అంతస్తులు నిర్మిస్తున్నా మున్సిపల్, టాస్క్​ఫోర్స్​ ఆఫీసర్లు పట్టించుకోవడం లేదనే ఆరోపణలున్నాయి. నోటీసులు ఇస్తున్నాం.. టాస్క్​ ఫోర్స్​ టీమ్​ చర్యలు తీసుకోవాలి..ఇంతకన్నా మేమేం చేయాలంటూ మున్సిపల్​ టౌన్​ ప్లానింగ్​ ఆఫీసర్లు చేతులు దులుపుకుంటున్నారు. చర్యలు తీసుకోవాల్సిన టాస్క్​ఫోర్స్​ టీమ్​ అక్రమ నిర్మాణాలను గుర్తించడంతోనే తమ పని అయిపోయినట్లుగా భావిస్తోంది. 

ఆఫీసర్ల నిర్లక్ష్యం..

బహుళ అంతస్థుల నిర్మాణాల విషయంలో మున్సిపాలిటీ అధికారులు నిర్లక్ష్యంగా వ్యవహరిస్తున్నారు. జీ ప్లస్–2, జీ ప్లస్–3  నిర్మాణాలకు అనుమతులు తీసుకుంటున్న ఓనర్లు, జీ ప్లస్– 4, 5 గా నిర్మిస్తున్నారు. కొత్తగూడెం పట్టణంలోని త్రీటౌన్​ పోలీస్​ స్టేషన్​ రోడ్​తో పాటు గణేశ్​ టెంపుల్​ ఏరియా, బూడిదగడ్డ, మేదరబస్తీ, సూర్యోదయ స్కూల్​ నుంచి పాత కొత్తగూడెం వెళ్లే దారి, బస్టాండ్​ ఏరియా, హనుమాన్​ బస్తీ తదితర ప్రాంతాల్లో ఇలాంటి నిర్మాణాలు సాగుతున్నాయి. పట్టణంలోని పలు ప్రాంతాల్లో 200 అక్రమ నిర్మాణాలు ఉన్నట్లు బల్దియా ఆఫీసర్లు గతంలో గుర్తించారు. ఎటువంటి పర్మిషన్​ లేకుండా చేపడుతున్న 23 బిల్డింగ్​లను టాస్క్​ఫోర్స్​ టీమ్​గుర్తించింది. పట్టణంలోని గణేశ్​​టెంపుల్​ ఏరియాలోని మెయిన్​ రోడ్డు పక్కనే నిర్మిస్తున్న బిల్డింగ్​ మున్సిపల్​ ఆఫీసుకు కూత వేటు దూరంలోనే ఉన్నా సంబంధిత ఆఫీసర్లు పట్టించుకోక పోవడం గమనార్హం. అక్రమ నిర్మాణమని ఆ బిల్డింగ్​లకు ఫ్లెక్సీలను పెట్టి ఊరుకున్నారు. అధికార, ప్రతిపక్ష పార్టీల నేతల ఒత్తిడి, అధికారులతో ఓనర్లు లాలూచీ పడడంతో కొద్ది రోజుల తర్వాత ఈ నిర్మాణాలన్నీ సక్రమమయ్యాయి. టాస్క్​ఫోర్స్​ ఆఫీసర్లు ఆపిన భవనాల పనులు అనుమతులు లేకుండానే పూర్తయ్యాయంటే పరిస్థితి ఎలా ఉందో అర్థం చేసుకోవచ్చు. ఇక పలు ప్రాంతాల్లో రూల్స్​ పక్కన పెట్టి అపార్ట్​మెంట్లు కడుతున్నా ఆఫీసర్లు తమ దృష్టికి రాలేదని దాట వేస్తున్నారు. అక్రమ నిర్మాణాలపై నిలదీస్తే నోటీసులు ఇస్తామని​ చెబుతున్నారు. 

టాస్క్ ఫోర్స్​ టీమ్​ చర్యలు తీసుకోవాలి

పట్టణంలో అక్రమంగా నిర్మిస్తున్న నిర్మాణాలను గత ఏడాది టాస్క్ ఫోర్స్​ టీమ్​ గుర్తించింది. టాస్క్​ ఫోర్స్​ కమిటీ ఆదేశాల మేరకు అక్రమ నిర్మాణాలంటూ  ఫ్లెక్సీలు ఏర్పాటు చేశాం. ప్రస్తుతం ఆ బిల్డింగ్​లు నిర్మాణాలు పూర్తి చేసుకున్నాయి. ఇలాంటి నిర్మాణాలను ఆపాల్సింది టాస్క్​ ఫోర్స్ బృందమే.- ప్రభాకర్, టౌన్​ ప్లానింగ్​ సూపర్​ వైజర్

అక్రమ నిర్మాణాలను కూల్చేస్తాం

పట్టణంలోని త్రీ టౌన్​ పోలీస్​ స్టేషన్​ వెళ్లే దారిలో అక్రమ నిర్మాణాలను కూల్చివేయాలని టౌన్​ ప్లానింగ్​ ఆఫీసర్లను ఆదేశించా. అనుమతులు లేకుండా అక్రమంగా నిర్మాణాలు చేపడితే ఊరుకునేది లేదు. పర్మిషన్​ తీసుకున్న తర్వాతే నిర్మాణాలు చేపట్టాలి. - రఘు, మున్సిపల్​ కమిషనర్