మహబూబ్నగర్/మక్తల్, వెలుగు : కొత్తకోట దయాకర్రెడ్డి పబ్లిక్ లీడర్గా ఉమ్మడి పాలమూరు జిల్లాలో తనదైన ముద్ర వేశారు. రాజకీయంగా ఎదిగేందుకు లీడర్లు తరచూ పార్టీలు మారుస్తూ పదవులు పొందినా, ఆయన మాత్రం ఒకే పార్టీలో కొనసాగుతూ అందరికీ ఆదర్శంగా నిలిచారు. చివరకు తప్పసరి పరిస్థితుల్లో పార్టీకి రాజీనామా చేస్తున్నట్లు ప్రకటించినా, ఏ పార్టీ వైపు మొగ్గు చూపలేదు. వచ్చే ఎన్నికల్లో పోటీ చేస్తానని ప్రకటించిన కొద్ది రోజులకే అనారోగ్యంతో మృతి చెందారు.
టీపీడీ నుంచి రాజకీయ ప్రస్థానం..3
దయాకర్రెడ్డిది పాలమూరు జిల్లా చిన్నచింతకుంట మండలంలోని పర్కాపూర్ స్వగ్రామం. ఆయనకు భార్య సీతమ్మతో పాటు సిద్ధార్థ, కార్తీక్ కుమారులు ఉన్నారు. దయాకర్రెడ్డి విద్యార్థి దశ నుంచే టీఎన్టీయూసీ లీడర్గా పని చేశారు. టీడీపీ వ్యవస్థాపక అధ్యక్షుడు ఎన్టీఆర్ను అభిమానించేవారు. ఆ అభిమానంతోనే 1987లో టీడీపీలో చేరారు. చివరి దాకా ఆ పార్టీలోనే కొనసాగారు. అయితే, రాష్ట్రంలో తెలంగాణ ఏర్పాటు తర్వాత టీడీపీ బలహీన పడడంతో 2014, 2018 ఎన్నికల్లో మక్తల్ సెగ్మెంట్నుంచి టీడీపీ గుర్తుతో పోటీ చేసినా దయాకర్రెడ్డి ఓడిపోయారు. దీంతో పార్టీ మారాలని 2019 నుంచి ఆయన అనుచరులు ఒత్తిడి తెచ్చారు. చివరకు గతేడాది అభిమానుల అభిప్రాయాన్ని మన్నించి టీడీపీ అధినేత చంద్రబాబు నాయుడుతో చర్చలు జరిపారు. ఆయన బర్త్డే సందర్భంగా నిరుడు ఆగస్టు 18న టీడీపీకి రాజీనామా చేస్తున్నట్లు ప్రకటించి, కంట నీరు పెట్టుకున్నారు.
అయితే, రానున్న ఎన్నికల్లో మక్తల్ అసెంబ్లీ నుంచి పోటీ చేయడం ఖాయమని, అది ఏ పార్టీ నుంచి అనేది సమయం వచ్చినప్పుడు చెబుతానని ప్రకటించారు. కానీ, కొద్ది రోజులకే ఆయన అనారోగ్యానికి గురయ్యారు. వెన్నెముక కేన్సర్తో రెండు నెలలుగా హైదరాబాద్లోని ఏఐజీ హాస్పిటల్లో చికిత్స పొందుతున్నారు. మంగళవారం తెల్లవారుజామున 5 గంటల ప్రాంతంలో దయాకర్రెడ్డి తుది శ్వాస విడిచారు.
మూడు సార్లు ఎమ్మెల్యేగా..
1989లో జరిగిన అసెంబ్లీ ఎన్నికల్లో దయాకర్రెడ్డి మొదటి సారిగా అమరచింత (ప్రస్తుత దేవరకద్ర) నియోజకవర్గం నుంచి టీడీపీ తరపున పోటీ చేశారు. తన సమీప అభ్యర్థి కె.వీరారెడ్డి చేతిలో 6,751 ఓట్లతో ఓడిపోయారు. ఆ తర్వాత ఇదే నియోజకవర్గం నుంచి 1994, 1999లో జరిగిన అసెంబ్లీ ఎన్నికల్లో వరుసగా కె.వీరారెడ్డిపై రెండు సార్లు పోటీ చేసి విజయం సాధించారు. 2004లో జరిగిన ఎన్నికల్లో కాంగ్రెస్ అభ్యర్థి సల్గూటి స్వర్ణాసుధాకర్రెడ్డిపై పోటీ చేయగా, 13,783 ఓట్లతో ఓడిపోయారు. 2009లో మక్తల్ అసెంబ్లీ నుంచి పోటీ చేసి కాంగ్రెస్ అభ్యర్థి చిట్టెం రాంమోహన్రెడ్డిపై గెలుపొందారు.
2009లో భార్యాభర్తలిద్దరూ..
1999 ఎన్నికల్లో అమరచింత ఎమ్మెల్యేగా గెలిచిన దయాకర్రెడ్డి ఆయన భార్య సీతమ్మను రాజకీయాల్లోకి అహ్వానించారు. 2002లో దేవరకద్ర జడ్పీటీసీగా సీతమ్మ పోటీ చేసి గెలుపొందారు. అదే ఏడాది ఆమె ఉమ్మడి మహబూబ్నగర్ జిల్లా జడ్పీ చైర్పర్సన్గా పనిచేశారు. ఆమెనే మొదటి మహిళా జడ్పీ చైర్పర్సన్ కావడం విశేషం. ఆ తర్వాత 2009 ఎన్నికల్లో మక్తల్నుంచి దయాకర్రెడ్డి, దేవరకద్ర నియోజకవర్గం నుంచి సీతమ్మ పోటీ చేసి గెలుపొందారు. ఒకేసారి భార్యాభర్తలిద్దరూ గెలిచి అసెంబ్లీకి వెళ్లి రికార్డ్ సృష్టించారు.
