భద్రాద్రికొత్తగూడెం, వెలుగు : బీఆర్ఎస్కు ఇవే చివరి ఎన్నికలని కొత్తగూడెం ఎమ్మెల్యే కూనంనేని సాంబశివరావు అన్నారు. శనివారం కొత్తగూడెంలో ఏర్పాటు చేసిన విలేకర్ల సమావేశంలో ఆయన మాట్లాడారు. బీఆర్ఎస్ పదేండ్ల కాలంలో రాష్ట్రాన్ని దోచుకుందని విమర్శించారు. సింగరేణికి రావాల్సిన బకాయిలను ఇవ్వకుండా బీఆర్ఎస్ కంపెనీని నిర్వీర్యం చేసిందని ఆరోపించారు.
మతాలు, కులాల పేర ప్రజల మధ్య చిచ్చు పెడ్తున్న బీజేపీని తరిమి కొట్టాలని పిలుపునిచ్చారు. బీజేపీ, బీఆర్ఎస్ పార్టీలు ప్రజలను తమ మాయ మాటలతో మరోసారి మోసం చేసేందుకు ముందుకు వస్తున్నాయన్నారు. సీపీఐ, సీపీఎం, టీజేఎస్ బలపర్చిన ఖమ్మం కాంగ్రెస్ అభ్యర్థి రామసహాయం రఘురామిరెడ్డిని అత్యధిక మెజార్టీతో గెలిపించాలని కోరారు. ఈ సమావేశంలో కాంగ్రెస్, సీపీఐ, సీపీఎం జిల్లా నాయకులు సాబీర్ పాషా, అన్నవరపు కనకయ్య, నాగ సీతారాములు, కోనేరు సత్యనారాయణ, చంద్రిగిరి శ్రీనివాసరావు, లగడపాటి రమేశ్, అన్నవరపు సత్యనారాయణ, లిక్కి బాలరాజు పాల్గొన్నారు.
