- 29న ఉట్లోత్సవం, రుక్మిణీ కల్యాణం
యాదగిరిగుట్ట, వెలుగు: యాదగిరిగుట్ట శ్రీ లక్ష్మీనరసింహస్వామి దేవస్థానంలో నేటి నుంచి ఈ నెల 29 వరకు శ్రీకృష్ణాష్టమి(కణ్ణన్ తిరునక్షత్ర ఉత్సవాలు) వేడుకలు జరగనున్నాయి. శ్రీ వైష్ణవ పాంచరాత్ర ఆగమ శాస్త్రం పద్దతుల్లో మూడు రోజుల పాటు నిర్వహించే ఈ ఉత్సవాల కోసం ఆలయ ఆఫీసర్లు అన్ని ఏర్పాట్లు చేశారు.
మంగళవారం ఉదయం నిర్వహించే ప్రత్యేక పూజలతో కృష్ణాష్టమి వేడుకలకు అర్చకులు శ్రీకారం చుట్టనున్నారు. కృష్ణాష్టమి ఉత్సవాల్లో భాగంగా 29న సాయంత్రం 5 గంటలకు ప్రధానాలయ తూర్పు రాజగోపురం ఎదుట శిఖ్యోత్సవం(ఉట్లు కొట్టుట), రాత్రి 8 గంటలకు రుక్మిణీ కల్యాణం నిర్వహించనున్నారు.
ఇక కృష్ణాష్టమి ఉత్సవాల సందర్భంగా ఆలయంలో భక్తులతో ప్రతిరోజూ నిర్వహించే ఆర్జిత సేవలైన నిత్య, శాశ్వత, మొక్కు కల్యాణాలు, బ్రహ్మోత్సవాలు, సుదర్శన నారసింహ హోమం, భోగాలు 27 నుంచి 29 వరకు మూడు రోజుల పాటు తాత్కాలికంగా రద్దు చేశారు.
