- జిల్లా, నియోజకవర్గ కేంద్రాల్లో సంబురాలు చేయండి: కేటీఆర్
హైదరాబాద్ సిటీ, వెలుగు: రాష్ట్ర ప్రభుత్వం ప్రజలపై వేయాలనుకున్న రూ.18,500 కోట్ల విద్యుత్ చార్జీల భారాన్ని ఆపామని, బుధ, గురువారాల్లో జిల్లా, నియోజకవర్గాల్లో సంబురాలు చేయాలని బీఆర్ఎస్ పార్టీ శ్రేణులకు కేటీఆర్ పిలుపునిచ్చారు. బీఆర్ఎస్ పదేండ్లలో ఏనాడు విద్యుత్ చార్జీలు పెంచలేదని, కాంగ్రెస్ పార్టీ రూలింగ్లోకి వచ్చిన పది నెలల కాలంలోనే రూ.18,500 కోట్ల విద్యుత్ చార్జీల పెంపు ప్రతిపాదనలు చేసిందని అన్నారు.
పబ్లిక్ హియరింగ్ లో ప్రధాన ప్రతిపక్షంగా పాల్గొని, ప్రభుత్వ ప్రతిపాదనలను వ్యతిరేకించేలా ఈఆర్సీని ఒప్పించగలిగామని కేటీఆర్ అన్నారు. ఈ మేరకు మంగళవారం ఆయన ఓ ట్వీట్ చేశారు. రాష్ట్ర ప్రజలపై అడ్డగోలుగా విద్యుత్ చార్జీలు పెంచాలని ప్రభుత్వం చేసిన ప్రయత్నాన్ని సరైన పద్ధతిలో శాస్త్రీయంగా ఈఆర్సీ ముందుంచడంలో విజయం సాధించామని కేటీఆర్ తెలిపారు. ప్రభుత్వం భారీ విద్యుత్ చార్జీల భారం మోపకుండా ప్రజల పక్షాన నిలిచిన ఈఆర్సీకి కృతజ్ఞతలు తెలుపుతున్నట్టు చెప్పారు.
