- కొడంగల్ నియోజకవర్గ కార్యకర్తలతో సమావేశం
హైదరాబాద్, వెలుగు: సీఎం రేవంత్ రెడ్డికి దమ్ముంటే 15 రోజులపాటు అసెంబ్లీని నిర్వహించాలని బీఆర్ఎస్ వర్కింగ్ ప్రెసిడెంట్ కేటీఆర్ సవాల్ విసిరారు. రాష్ట్రంలో రైతులు, నేత కార్మికులు, ఆటో డ్రైవర్లు, గురుకుల విద్యార్థులు మొదలుకుని అన్ని వర్గాలు ఎదుర్కొంటున్న సమస్యలపై చర్చించాలని డిమాండ్ చేశారు. వాటి తర్వాత రేవంత్ రెడ్డి ఆరోపిస్తున్న స్కాములైన ఫార్ములా ఈ రేస్పై చర్చించేందుకు తాము కూడా సిద్ధమేనన్నారు. కేసీఆర్ సభకు రావాలని డిమాండ్చేస్తున్న రేవంత్ రెడ్డి.. సోషల్ మీడియాలో తమ పార్టీ కార్యకర్తలు పెట్టిన పోస్టులకే తట్టుకోలేకపోతున్నారన్నారు.
రేవంత్ స్థాయికి కేసీఆర్ అవసరం లేదన్నారు. మంగళవారం తెలంగాణ భవన్లో పార్టీ కొడంగల్ నియోజకవర్గ కార్యకర్తలతో ఆయన సమావేశమై, మాట్లాడారు. కేబినెట్ మీటింగ్ అంటే ప్రజలకు మంచి చేసే అంశాలపై చర్చించాలని, అంతేగానీ, ఎవరిని అరెస్ట్ చేయాలన్నదానిపై చర్చించడం కాదన్నారు. కొడంగల్ ప్రజల కోసం నిలబడిన తమ నేత నరేందర్ రెడ్డి.. భవిష్యత్లో రేవంత్ను తుక్కుతుక్కు చేస్తారన్నారు. భవిష్యత్లో బీఆర్ఎస్ జైత్రయాత్ర లగచర్ల నుంచే మొదలవుతుందన్నారు. అక్కడి నుంచే రేవంత్ పతనమూ మొదలైందని చెప్పారు. అధికారంలోకి వచ్చేందుకు అడ్డమైన హామీలిచ్చిన కాంగ్రెస్.. అధికారంలోకి రాగానే వాటిని తుంగలోకి తొక్కిందని ఆయన ఆరోపించారు.
