హైదరాబాద్, వెలుగు: అగ్రరాజ్యం అమెరికానే మోసం చేసిన ఘనుడు.. మన దేశ అధికారులకు లంచం ఇవ్వజూపిన మోసగాడు అదానీ అని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. అదానీపై అమెరికాలో కేసు నమోదైన వ్యవహారంపై ఆయన గురువారం ట్విట్టర్లో స్పందించారు.
‘‘అదానీతో కాంగ్రెస్, బీజేపీ బంధం దేశానికి అవమానం, అరిష్టం’’ అని కామెంట్ చేశారు. రామన్నపేటలో సిమెంట్ ఫ్యాక్టరీ ఏర్పాటు కోసం ఎంత ఇవ్వజూపారో.. మూసీలో అదానీ వాటా ఎంతో చెప్పాలని డిమాండ్ చేశారు. ఇలాంటి మోసగాడికి తెలంగాణలో పెట్టుబడులకు అనుమతులు ఎలా ఇస్తారని ప్రశ్నించారు. అంబుజా సిమెంట్ ఫ్యాక్టరీ అనుమతులను రద్దు చేయాలన్నారు.
