- నిజనిర్ధారణకు వెళ్లిన వారిని సర్కారు ఎందుకు అడ్డుకుంటున్నది: కేటీఆర్
హైదరాబాద్, వెలుగు: లగచర్లలో అర్ధరాత్రి గిరిజన ఆడబిడ్డలపై దమనకాండకు దిగిన ప్రభుత్వం.. పరిస్థితిని తెలుసుకునేందుకు వెళ్లిన మహిళా సంఘాల నేతలపైనా దౌర్జన్యం చేసిందని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. నిజనిర్ధారణకు వెళ్లిన వారిని కాంగ్రెస్ ప్రభుత్వం ఎందుకు అడ్డుకుంటున్నదని మంగళవారం ఓ ప్రకటనలో ఆయన ప్రశ్నించారు. వాస్తవాలను తొక్కిపెట్టాలని ఈ సర్కారు ఎందుకు ప్రయత్నిస్తోందన్నారు.
‘‘సీఎం సొంత ఇలాకాలో ఇంతటి నిర్బంధమా? కొడంగల్ ఏమైనా పాకిస్తాన్ సరిహద్దుల్లో ఉందా? లేదంటే లగచర్ల చైనా బార్డర్లోని కల్లోలిత ప్రాంతమా? పదేండ్లలో ఎన్నడూ లేని విధంగా ఇంటర్ నెట్ సేవలు నిలిపేశారు. కొడంగల్ కు వెళ్లే అన్ని దారుల్లో పోలీసు పహారా ఏర్పాటుచేశారు. కానీ, మీరెంత దాచే ప్రయత్నం చేసినా.. నిజం దాగదు. ఇప్పటికే లగచర్లలో కాంగ్రెస్ సర్కారు కిరాతకం ఢిల్లీకి చేరింది.
ఫ్యాక్ట్ ఫైండింగ్ కమిటీలను అడ్డుకోవడం అంటేనే.. కాంగ్రెస్ సర్కారు తప్పుచేసినట్టు ఒప్పుకున్నట్టే లెక్క. మహిళా సంఘాలను అడ్డుకున్నందుకు సర్కారు క్షమాపణలు చెప్పాలి. లగచర్లలో నిర్బంధాన్ని ఎత్తివేసి.. ప్రజాస్వామ్యాన్ని పునరుద్ధరించాలి’’ అని ఆయన డిమాండ్ చేశారు. హైదరాబాద్సిటీలోని అపార్ట్మెంట్లలో 20 కిలోవాట్ల విద్యుత్ వినియోగం దాటితే ఆ అపార్ట్మెంట్వాసులే సొంతంగా ట్రాన్స్ఫార్మర్లు ఏర్పాటు చేసుకోవాలని ప్రభుత్వం చెప్పడం దారుణమని అన్నారు.
