హైదరాబాద్, వెలుగు : ఫార్ములా ఈ రేస్లో అసలు కేసు ఎక్కడుందని బీఆర్ఎస్ వర్కింగ్ ప్రెసిడెంట్ కేటీఆర్ ప్రశ్నించారు. ఇందులో అసలు అవినీతే లేదని, అలాంటప్పుడు ఏసీబీ కేసు ఎలా పెడుతుందని అన్నారు. ‘‘నేను ఏ తప్పూ చేయలేదు. అందుకే నాకు ఆత్మవిశ్వాసం, ఆత్మస్థైర్యం ఎక్కువ. ఉద్యమ నాయకుడి బిడ్డలం. భయపడే ప్రసక్తే లేదు. రేవంత్.. ఏం చేస్కుంటవో చేస్కో. నా వెంట్రుక కూడా పీకలేవు’’ అని అన్నారు. ఫార్ములా ఈ రేస్పై గురువారం ఏసీబీ కేసు నమోదు చేసిన నేపథ్యంలో తెలంగాణ భవన్లో కేటీఆర్ మీడియాతో మాట్లాడారు.
రేవంత్రెడ్డి తమ వెంట ఎందుకు పడుతున్నారో ప్రజలందరికీ తెలుసని అన్నారు. కేసుపై న్యాయపరంగా, రాజకీయపరంగా కొట్లాడుతామని తెలిపారు. శాంతియుతంగా నిరసనలు చేస్తామని అన్నారు. ఏసీబీకి కేసు పెట్టే అర్హత లేదని కేటీఆర్ పేర్కొన్నారు. గవర్నర్కు ప్రభుత్వం ఏం చెప్పిందో తెలియదని, వాస్తవాలు తెలిస్తే ఆయన కూడా అనుమతిచ్చే వారు కాదేమోనని అన్నారు. సీఎం దివాళాకోరుతనం వల్లే కేసు పెట్టారని ఆరోపించారు. ముందు ఓఆర్ఆర్ లీజు ఒప్పందాన్ని రద్దు చేసి, విచారణ జరిపించాలని డిమాండ్ చేశారు.
కక్కలేక మింగలేక..
కుంభకోణమని ప్రభుత్వం చెబుతున్న ఫార్ములా ఈ రేస్పై అసెంబ్లీలో చర్చ పెట్టాలని స్పీకర్ను కోరామని, కానీ, ప్రభుత్వం కక్కలేక మింగలేక అన్నట్టుగా వ్యవహరిస్తున్నదని కేటీఆర్అన్నారు. సీఎంకు లేఖ రాసినా స్పందించలేదని చెప్పారు. ఆధారాలు లేకుండా ప్రభుత్వం ఆరోపణలు చేస్తున్నదని, ఆధారాలుంటే బయటపెట్టాలని డిమాండ్చేశారు. అసెంబ్లీలో మాట్లాడలేని దద్దమ్మ సీఎం, మంత్రులు కేవలం లీకులతో దుష్ప్రచారం చేస్తున్నారని మండిపడ్డారు. రేస్ విషయంలో అణాపైసా కూడా వృథా కాలేదని, కాంగ్రెస్ ప్రభుత్వం చేతగాని తనంవల్లే రేసులు రద్దయ్యాయని పేర్కొన్నారు.
హైదరాబాద్కు రూ.700 కోట్ల ప్రయోజనం
ప్రపంచంలో హైదరాబాద్ను ఎలక్ట్రానిక్ వెహికల్స్(ఈవీ) రంగంలో అగ్రగామిగా నిలిపే ప్రయత్నంలో భాగంగానే ఫార్ములా ఈ రేస్ను నిర్వహించామని కేటీఆర్ చెప్పారు. హెచ్ఎండీఏ తరఫున రూ.30 కోట్లు, ప్రైవేట్ స్పాన్సర్ ఏస్ అర్బన్ తరఫున మరో వంద కోట్లు ఖర్చు చేశామన్నారు. ఆ వ్యయంతో హైదరాబాద్కు రూ.700 కోట్ల ప్రయోజనం చేకూరిందని తెలిపారు. హెచ్ఎండీఏ వైస్ చైర్మన్ హోదాలో ప్రిన్సిపల్ సెక్రటరీతో కలిసి నిర్ణయం తీసుకున్నామని, నిబంధనల మేరకే ఫైల్ మూవ్ చేసి.. ఫార్ములా ఈ నిర్వహణ సంస్థకు రూ.55 కోట్లను రెండు విడతల్లో ఇండియన్ ఓవర్సీస్ బ్యాంకు ద్వారా పారదర్శకంగా చెల్లింపులు చేశామని గుర్తు చేశారు.
తదుపరి చెల్లింపుల కోసం కొత్తగా ఏర్ప డిన కాంగ్రెస్ ప్రభుత్వాన్ని నిర్వహణ సంస్థ కోరిందన్నారు. ఎఫ్ఐఈ సంస్థ సహ వ్యవస్థాపకుడు ఆల్బర్టో లోంగోతో సీఎం రేవంత్రెడ్డి, అప్పటి హెచ్ఎండీఏ ప్రిన్సిపల్ సెక్రటరీ దాన కిశోర్ సమావేశమయ్యారని తెలిపారు. సమావేశం అనంతరం ఫార్ములా ఈ రేస్ నిర్వహించేందుకు నిర్ణయం తీసుకున్నట్టు రాష్ట్ర ప్రభుత్వా నికి సంస్థ లేఖ కూడా రాసిందన్నారు. అయితే, నిరుడు డిసెంబర్ 13న సీఎంతో మీటింగ్ తర్వాత.. డిసెంబర్ 19న చెల్లించాల్సిన కాంట్రాక్టు ఫీజు నిబంధనలను ప్రస్తావించిందని చెప్పారు.
ప్రభుత్వం నుంచి స్పందనలేకపోవడంతో రేసు నిర్వహించలేమని డిసెంబర్ 26న సంస్థ స్పష్టం చేసిందని పేర్కొన్నారు. సంస్థకు చెల్లించిన రూ.73 లక్షలను ఆ సంస్థ తిరిగి ఇచ్చేసిందన్నారు. కాగా, హైదరాబాద్కు ఫార్ములా 1 రేస్ను తీసుకొచ్చేందుకు 2001లోనే నాటి సీఎం చంద్రబాబు ప్రయత్నించారని, గోపన్ పల్లిలో 580 ఎకరాల భూసేకరణకు నోటిఫికేషన్ ఇచ్చారని గుర్తు చేశారు.
లగచర్ల చరిత్రలో నిలుస్తుంది
లగచర్ల పేరు తెలంగాణ చరిత్రలో నిలిచిపోతుందని కేటీఆర్ అన్నారు. కొడంగల్ మాజీ ఎమ్మెల్యే పట్నం నరేందర్ రెడ్డి, రైతులు జైలు నుంచి విడుదలైన సందర్భంగా ఆయన మాట్లాడారు. ఒక నియంతృత్వ, మూర్ఖపు ప్రభుత్వ వైఖరికి నిరసనగా వారు చేసిన పోరాటం చరిత్రలో నిలుస్తుందని చెప్పారు.
అదానీకి రేవంత్ రెడ్కార్పెట్..రాహుల్కు లేఖ
ఓ పక్క అదానీ, మోదీ ప్రభుత్వంపై రాహుల్గాంధీ పోరాడుతుంటే.. సీఎం రేవంత్ రెడ్డి మాత్రం అందుకు భిన్నంగా వ్యవహరిస్తున్నారని కేటీఆర్ అన్నారు. రాష్ట్రంలో అదానీకి రేవంత్ రెడ్ కార్పెట్ పరుస్తున్నారని విమర్శించారు. గురువారం రాహుల్కు కేటీఆర్ లేఖ రాశారు.
మేం కేసీఆర్ సైనికులం : కవిత
అసెంబ్లీలో సీఎం రేవంత్ రెడ్డి సమాధానం చెప్పలేక కేటీఆర్పై అక్రమ కేసులు పెట్టారని బీఆర్ఎస్ ఎమ్మెల్సీ కవిత అన్నారు. కేసీఆర్, బీఆర్ఎస్ను రాజకీయంగా ఎదుర్కొనే దమ్ములేకనే ఇలాంటి చర్యలకు పాల్పడుతున్నారని ట్వీట్ చేశారు. తామంతా తెలంగాణ ఉద్యమం నుంచి వచ్చిన కేసీఆర్ సైనికులమనే విషయాన్ని రేవంత్ గుర్తుంచుకోవాలని సూచించారు.
