- స్కిల్ వర్సిటీకి ఇచ్చిన 100 కోట్లు వెనక్కి ఇచ్చేయాలి
- కాంగ్రెస్ హైకమాండ్కు తెలియకుండానే ఇక్కడ ఒప్పందాలు జరిగినయా: కేటీఆర్
హైదరాబాద్, వెలుగు: అదానీతో రాష్ట్ర ప్రభుత్వం చేసుకున్న ఒప్పందాలన్నింటినీ రద్దు చేయాలని బీఆర్ఎస్ వర్కింగ్ ప్రెసిడెంట్ కేటీఆర్ డిమాండ్ చేశారు. ‘‘సీఎం రేవంత్రెడ్డి మహారాష్ట్ర ఎన్నికల ప్రచారానికి వెళ్లి అదానీని గజదొంగ అంటడు. కానీ, హైదరాబాద్లో మాత్రం గజమాలలు వేసి స్వాగతం పలుకుతడు” అని ఆయన విమర్శించారు.
స్కిల్ యూనివర్సిటీకి అదానీ ఇచ్చిన రూ.వంద కోట్లను సర్కారు వెనక్కు ఇచ్చేయాలన్నారు. తెలంగాణలో పెట్టుబడులు పెట్టేందుకు ఎన్నోసార్లు అదానీ ప్రయత్నించినా తమ హయాంలో ఓకే చెప్పలేదని తెలిపారు. మర్యాదపూర్వకంగా ఓ చాయ్ తాగించి పంపించేశామని, ఎలాంటి ఒప్పందాలు చేసుకోలేదని కేటీఆర్ పేర్కొన్నారు. శుక్రవారం ఆయన తెలంగాణభవన్లో మీడియాతో మాట్లాడారు.
‘‘అవినీతిపరుడని రాహుల్ గాంధీ ఆరోపించిన వ్యక్తికే ఇక్కడి ప్రభుత్వం రెడ్ కార్పెట్ వేసింది. బడేభాయ్ ఆదేశించగానే.. ఇక్కడ ఛోటేభాయ్ అమలు పరిచిండు. రాష్ట్రంలో కాంగ్రెస్ అధికారంలోకి వచ్చాక అదానీ సంస్థలతో రూ.12,400 కోట్లతో ఒప్పందాలు చేసుకున్నట్టు వాళ్లే చెప్పుకున్నరు. రూ.5 వేల కోట్లతో గ్రీన్ ఎనర్జీ, రూ.5 వేల కోట్లతో డేటా సెంటర్తో పాటు సిమెంట్ పరిశ్రమకు అనుమతులిచ్చారు” అని దుయ్యబట్టారు.
యాదాద్రి జిల్లాలోని రామన్నపేటలో సిమెంట్ ఫ్యాక్టరీ వద్దని అక్కడి ప్రజలు వ్యతిరేకిస్తున్నా సర్కారు పట్టించుకోవడం లేదన్నారు. మూసీ శుద్ధి గురించి మాట్లాడే ప్రభుత్వం.. సిమెంట్ ఫ్యాక్టరీతో మురికిమయం అవుతుందని నిపుణులు చెప్తున్నా పట్టించుకోవట్లేదన్నారు. డిస్కంలనూ అదానీకి అప్పగించే కుట్ర చేశారని, అందులో ఓల్డ్ సిటీ బిల్లులను అదానీతో వసూలు చేయించే డ్రామాను మొదలుపెట్టారని దుయ్యబట్టారు.
డిస్కంలను ప్రైవేటీకరించేందుకు కుట్ర చేశారని, అందుకే అదానీ గుండె ఉప్పొంగిపోయి స్కిల్ వర్సిటీకి రూ.100 కోట్ల విరాళం ఇచ్చారని విమర్శించారు. రాష్ట్రంలో అదానీ సామ్రాజ్యాన్ని నిర్మించేందుకు ప్రయత్నాలు జరుగుతున్నాయని, ఈ విషయం కాంగ్రెస్ హైకమాండ్కు తెలియదా అని ప్రశ్నించారు. అదానీని రోజూ విమర్శించే రాహుల్.. ఈ ఒప్పందాలకు మద్దతిస్తున్నారా? అని అడిగారు. బ్యాడ్ అదానీ.. గుడ్ అదానీ అనే చందంగా కాంగ్రెస్ వ్యవహరిస్తున్నదని దుయ్యబట్టారు.
ప్రధాని ఎందుకు పట్టించుకుంటలే
అదానీ బండారం అంతర్జాతీయంగా బయటపడినా ప్రధాని మోదీ మాత్రం పట్టించుకోవడం లేదని కేటీఆర్ విమర్శించారు. అదానీపై కేసు పెట్టాలని, జేపీసీ వేయాలని డిమాండ్ చేసినా పెడచెవిన పెడుతున్నారని మండిపడ్డారు. సీఎం రేవంత్కు రాహుల్ ఫోన్ చేసి ఒప్పందాలు రద్దు చేసుకోవాలని చెప్పాలని ఆయన అన్నారు. ‘‘అదానీతో వ్యాపారం చేస్తున్న ప్రధాని అవినీతిపరుడంటూ రాహుల్ ఆరోపిస్తున్నడు.
కానీ, అదే అదానీతో రేవంత్ వ్యాపారం చేస్తే ఎలా నీతిపరుడవుతడు. అదానీతో రాష్ట్ర ప్రభుత్వ ఒప్పందాలు రాహుల్కు తెలిసి జరుగుతుండొచ్చు. లేదంటే వెంటనే రేవంత్ పై చర్యలు తీసుకోవాలి” అని డిమాండ్ చేశారు. రాజకీయాల్లోనూ అదానీ వేలు పెడుతున్నారని, మహారాష్ట్రలో ఎన్సీపీలో చీలిక తెచ్చారని ఆరోపించారు.
కోహినూర్ హోటల్లో అదానీతో మంత్రి పొంగులేటి సమావేశమయ్యారని, అదానీ వ్యవహారంలో కాంగ్రెస్, బీజేపీ విధానాలు ఒకటేనని దుయ్యబట్టారు. కాగా, ఎమ్మెల్యేల ఫిరాయింపు విషయంలో వీలైనంత త్వరగా నిర్ణయం తీసుకోవాలంటూ అసెంబ్లీ స్పీకర్ను హైకోర్టు ఆదేశించిందన్నారు. లగచర్ల అంశానికి సంబంధించి.. రేవంత్ రెడ్డికి దమ్ముంటే అక్కడికే వెళ్లి ప్రజలకు సమాధానం చెప్పాలని కేటీఆర్ సవాల్ చేశారు.
