మేఘాను బ్లాక్​ లిస్టులో పెట్టాలి: కేటీఆర్​

• సుంకిశాల ఘటనపై విచారణ కమిటీ రిపోర్ట్​ ఇచ్చినా చర్యలేవీ?
• మేఘా క్రిమినల్​ నెగ్లిజెన్స్​ వల్లే సుంకిశాల వాల్​ కూలింది
• ఆ కంపెనీకి కొడంగల్​ లిఫ్ట్​లో రూ.4,350 కోట్ల పనులేంది? 
• మేడిగడ్డలో ఒక పర్రెను పట్టుకొని ఎన్నికల్లో లబ్ధి పొందారు
• రేవంత్​ చెప్పినట్లు ఐఏఎస్​లు సంతకాలు పెడ్తే ఉద్యోగాలు ఊడ్తయ్
• మేం అధికారంలోకి వచ్చినంక అన్నింటిపై విచారణ జరిపిస్తం
• ఎవరు, ఎప్పుడు అరెస్ట్​ అవుతారో పొంగులేటి చెప్పడమేందని ప్రశ్న

హైదరాబాద్, వెలుగు: సాగునీటి రంగాన్ని దేశంలో ఎవరూ చేయని విధంగా కేసీఆర్​ అభివృద్ధి చేశారని, అందులో భాగంగానే ఎవరూ కట్టలేని విధంగా కాళేశ్వరం ప్రాజెక్టును నిర్మించారని బీఆర్​ఎస్​ వర్కింగ్​ ప్రెసిడెంట్​ కేటీఆర్​ అన్నారు. రేవంత్​ రెడ్డి ప్రతిపక్షంలో ఉన్నప్పుడు మేఘా సంస్థను ఈస్ట్​ ఇండియా కంపెనీ అంటూ కామెంట్​ చేశారని, ఆ కంపెనీ క్రిమినల్​ నెగ్లిజెన్స్​ వల్లే సుంకిశాల రిటైనింగ్​ వాల్​ కూలిపోయిందని, మేఘా కంపెనీని బ్లాక్​ లిస్టులో పెట్టాలని డిమాండ్​ చేశారు.

‘‘సుంకిశాల కూలేందుకు కారణమైన ఆ ఆంధ్ర కంపెనీ, ఆ ఈస్ట్​ ఇండియా కంపెనీ, ఆ అరాచక కంపెనీపై  ఇప్పుడు చర్యలు ఎందుకు తీసుకోవడం లేదు?” అని ప్రశ్నించారు. బుధవారం తెలంగాణ భవన్​లో మీడియాతో కేటీఆర్​ మాట్లాడారు. మేడిగడ్డ కుంగితే కాళేశ్వరం ప్రాజెక్టుతో లక్ష కోట్లు నీళ్లలో పోశారంటూ కాంగ్రెస్​ వాళ్లు ప్రచారం చేశారని, జ్యుడీషియల్​ ఎంక్వైరీ చేయిస్తున్నామన్నారని తెలిపారు. మరి, సుంకిశాల ఘటనలో మాత్రం ఎందుకు జ్యుడీషియల్​ ఎంక్వైరీ చేయించడం లేదని ప్రశ్నించారు. నలుగురు అధికారులను సస్పెండ్​ చేసి ప్రభుత్వం చేతులు దులుపుకున్నదని, కంపెనీని మాత్రం బ్లాక్​లిస్ట్​లో పెట్టలేదని మండిపడ్డారు.

‘వెలుగు’ పేపర్​లో ప్రచురితమైన ‘సుంకిశాల ఘటనలో కాంట్రాక్టర్​పై చర్యలేవీ’ కథనాన్ని ఆయన చూపించారు. ఆ సంస్థను బ్లాక్​ లిస్టులో పెట్టాలంటూ విచారణ కమిటీ రిపోర్ట్​ ఇచ్చినా చర్యలు ఎందుకు తీసుకోలేదని ప్రశ్నించారు. సుంకిశాల ఘటనలో మేఘాపై చర్యలు తీసుకోవాలని, ఆ కాంట్రాక్ట్​ను రద్దు చేయాలని, మేఘా చేసిన పనులకు దేశమంతా బ్లాక్​లిస్టులో పెట్టాలని డిమాండ్​ చేశారు. ‘‘రేవంత్​ రెడ్డి ప్రతిపక్షంలో ఉన్నప్పుడు మేఘా సంస్థను ఈస్ట్​ ఇండియా కంపెనీ అంటూ కామెంట్​ చేసిండు.

మేఘా కమీషన్ల కోసమే రాయలసీమ లిఫ్ట్​ ఇరిగేషన్​పై మౌనంగా ఉన్నారంటూ ఆరోపణలు చేసిండు. మేఘా కృష్ణా రెడ్డి ఓ పొలిటికల్​ మాఫియా అంటూ కాంగ్రెస్​ వర్కింగ్​ ప్రెసిడెంట్​ జగ్గారెడ్డి అన్నడు. ఇప్పుడెందుకు చర్యలు తీసుకోవడం లేదు” అని ప్రశ్నించారు. మేడిగడ్డలో ఓ పర్రెను పట్టుకుని లక్ష కోట్ల కుంభకోణమంటూ ప్రచారం చేసి ఎన్నికల్లో ప్రయోజనం పొందారని ఆయన వ్యాఖ్యానించారు.  

బండి సంజయ్​ ఎందుకు మాట్లాడ్తలే?

పొంగులేటి శ్రీనివాస్​రెడ్డి, మేఘా సంస్థకు రాష్ట్రంలోని ప్రాజెక్ట్​లను కట్టబెడుతున్నారని కేటీఆర్​ విమర్శించారు. కొడంగల్​ లిఫ్ట్​ ఇరిగేషన్​ కోసం రూ.4,350 కోట్ల టెండర్​ను మేఘా సంస్థకు అప్పగించారని, బ్లాక్​లిస్టులో పెట్టాలన్న సంస్థకు కాంట్రాక్ట్​ ఎందుకు ఇచ్చారని  ప్రశ్నించారు. కొడంగల్​ లిఫ్ట్​ స్కీమ్​ కూడా పెద్ద కుంభకోణమని, వెంటనే ఆ టెండర్లనూ రద్దు చేయాలని డిమాండ్​ చేశారు. ‘‘స్కిల్​ యూనివర్సిటీకి రూ.200 కోట్ల విరాళం ఇచ్చినందుకే మేఘాకు కొడంగల్​ కాంట్రాక్ట్​ ఇచ్చారా?” అని మండిపడ్డారు.

‘‘కాళేశ్వరం నీళ్లను గండిపేటలో కలిపి మూసీలో పంపిస్తామంటున్నారు. దాని కోసం రూ.5,500 కోట్లు ఖర్చు చేస్తారట. ఇది మరో కుంభకోణం. కొండపోచమ్మసాగర్​ నుంచి గోదావరి జలాలను హైదరాబాద్​కు తీసుకొచ్చేందుకు మేం రూ.1100 కోట్లతో అన్నీ సిద్ధం చేశాం. కానీ, దాని రూట్​ మార్చి ఖర్చును రూ.5500 కోట్లకు పెంచారు. ఈ ప్రాజెక్ట్​నూ ఈస్ట్​ ఇండియా కంపెనీ అంటున్న మేఘాకే ఇచ్చేందుకు ఒప్పందాలు చేసుకున్నారు” అని దుయ్యబట్టారు. సీఎం రేవంత్​ రెడ్డి చెప్పినట్టు సంతకం పెడితే ఐఏఎస్​లు, ఇంజనీర్ల ఉద్యోగాలు ఊడడం ఖాయమని, తాము అధికారంలోకి వస్తే విచారణ చేయిస్తామని కేటీఆర్​ అన్నారు.

‘‘రేవంత్​ రెడ్డి సహాయ మంత్రి అయిన బండి సంజయ్​ దీని మీద ఎందుకు మాట్లాడడం లేదు. ఇతర రాష్ట్రాల్లో తెలంగాణ గురించి మాట్లాడే ప్రధాని మోదీ.. చర్యలు మాత్రం తీసుకోవడం లేదు” అని కేటీఆర్​ ప్రశ్నించారు. ‘‘రేవంత్​ రెడ్డి తన బామ్మర్దికి అమృత్​ టెండర్లు.. మేఘా, రాఘవ సంస్థలకు ప్రాజెక్టులను పంచుతున్నారు. అమృత్​ టెండర్ల విషయంలో సీఎం బామ్మర్దిపై కేంద్ర సంస్థలు ఎందుకు విచారించడం లేదు? అరెస్టులంటూ పొంగులేటి అందరి జాతకాలు చెప్తున్నడు. ముందు ఆయనెప్పుడు జైలుకు వెళ్తారో చూసుకోవాలి. ఎవరు, ఎప్పుడు అరెస్ట్​ అవుతారో ఆయనెట్ల చెప్తడు?” అని ఆగ్రహం వ్యక్తం చేశారు .

‘‘అదానీతో కాంగ్రెస్​ సంబంధాలు ఎట్ల బలపడుతున్నాయో అందరికీ తెలుసు. గౌతమ్​ అదానీ కుమారుడు కరణ్​ అదానీతో సీఎం రేవంత్​ రెడ్డి తన ఇంట్లోనే నాలుగు గంటల పాటు చర్చలు జరిపారు. కలిసి విందు చేశారు. మోదీ కోసం దామగుండం, అదానీకి సిమెంట్​ ఫ్యాక్టరీ, మేఘా కృష్ణారెడ్డికి అన్ని ప్రాజెక్టులూ ఇస్తున్నారు. రాయదుర్గంలో 84 ఎకరాలను కూడా అదానీకి అప్పజెప్పే ప్రయత్నం చేస్తున్నారు” అని కేటీఆర్​ ఆరోపించారు.