యాదాద్రి, వెలుగు: బీఆర్ఎస్ వర్కింగ్ ప్రెసిడెంట్ కేటీఆర్ సహనం కోల్పోయారు. చెత్త నాకొడుకులు, ఈ నాకొడుకులు అంటూ విరుచుకుపడ్డారు. వీపులు సాప్చేస్తమంటూ.. పోలింగ్ రోజున ఎవ్వడు అడ్డమొచ్చినా తొక్కుకుంట పోవుడే.. గెలుసుడే అంటూ రెచ్చిపోయారు. యాదాద్రి జిల్లా భువనగిరి నియోజకవర్గంలోని వలిగొండలో నిర్వహించిన రోడ్ షోలో ఆయన పాల్గొని మాట్లాడారు. ప్రభుత్వ స్కీమ్స్ గురించి వివరిస్తూ వందల పథకాలు తెచ్చిన కేసీఆర్ను గెలిపించుకుందామా? ఓటుకు నోటు దొంగలను గెలిపించుకుందామా? అని ప్రశ్నించారు. సరిగ్గా అదే సమయంలో కొందరు యువకులు ఎదురుగా ఉన్న బిల్డింగ్ ఎక్కి ప్రభుత్వానికి వ్యతిరేకంగా నినాదాలు చేశారు. ‘‘ఇంటికో ఉద్యోగం ఎక్కడ? కేజీ టు పీజీ ఏమైంది? ప్రభుత్వ డిగ్రీ కాలేజీలెక్కడ ? అని నినాదాలు రాసి ఉన్న ప్లకార్డులు కేటీఆర్ వైపు చూపించారు. అప్పటికే ఆలస్యం కావడం, దీనికి తోడుగా యువకులు ప్లకార్డులు ప్రదర్శించడంతో కేటీఆర్ సహనం కోల్పోయారు.
అవతోలిడికి ఓటేసి ఇవతలోన్ని పన్జేయాలంటే ఎట్ల?
‘‘ఓట్లు అవతోలిడికి వేసి పని చేయమంటే ఇవతలి ఎమ్మెల్యే చేస్తడా..చేయగలుగుతడా?”అని కేటీఆర్ ప్రశ్నించారు. ‘‘గాడిదకు గడ్డేసి ఆవుకు పాలు పిండితె వస్తయా? కత్తి వేరేవాడికి ఇచ్చి యుద్ధం చేయమంటే చేస్తడా? అట్లనే పోయినసారి వలిగొండలో ఎమ్మెల్యే శేఖర్రెడ్డి ఓట్లు మైనస్ అయినయి. ఓట్లు అవతలోడికి వేసి.. పని చేయమంటే ఎమ్మెల్యే చేస్తడా.? చేయగలుగుతడా? పథకాలు కావాలనుకుంటే వాటిని అమలు చేసేవాళ్లను గెలిపించుకోవాలి”అని కేటీఆర్ అన్నారు. ఆలేరు నియోజకవర్గంలోని యాదగిరిగుట్టలో నిర్వహించిన రోడ్ షోలో ఆయన మాట్లాడుతూ భువనగిరి ఎమ్మెల్యే పైళ్ల శేఖర్రెడ్డి గురించి ప్రస్తావించారు. మనిషి మంచోడే కాని మనుషులను గుర్తుపట్టుడే మర్చిపోతడని కామెంట్ చేశారు. డిసెంబర్ 3న భువనగిరి, ఆలేరు ఎమ్మెల్యేలుగా పైళ్ల శేఖర్రెడ్డి, గొంగిడి సునీత మళ్లీ గెలిచి హ్యాట్రిక్ కొట్టబోతున్నారని తెలిపారు. ఎమ్మెల్యేలు గెలవగానే ఇచ్చిన హామీలన్నీ నెరవేరుస్తమని కేటీఆర్ స్పష్టం చేశారు.
వీపు పగలగొట్టేవారు లేకనా?
ఆ యువకుల వైపు చేయి చూపిస్తూ ‘‘ఆ సన్నాసులు అడుగుతున్నారు.. డిగ్రీ కళాశాల ఎక్కడని? 55 ఏండు పాలించిన కాంగ్రెస్ చెత్తనా కొడుకులను అడగండి. అడగడానికి ఇజ్జత్, మానం లేదు. 55 ఏండ్లు పాలించిన చెత్తనాకొడుకులు ఇక్కడికి వచ్చి ఇది లేకపాయె, అది లేకపాయె అని అంటున్నరు. వీపు పగలకొట్టేవారు లేకనా? ఈ 55 ఏండ్లలో యాదాద్రిని జిల్లా చేయాలన్న ఆలోచన రాలేదీ కొడుకులకు. కరెంట్ ఇచ్చిండ్రా? సాగు, తాగు నీరు ఇచ్చిండ్రా? డిగ్రీ కాలేజీ.. కేసీఆర్ కిట్ ఇచ్చిండ్రా? ఈ కొడుకులు”అంటూ ఆగ్రహం వ్యక్తం చేశారు. ఇదే సమయంలో పోలీసులు బిల్డింగ్ పైకి ఎక్కి యువకులను వెతుకుతుండటంతో వారు పారిపోయారు. అలా వెతుకుతున్న పోలీసుల వైపు చూసిన కేటీఆర్.. ఏడబోయిండ్రు వాళ్లు. పారిపోయిండ్రా? ఇగో ఇట్లనే ఎవడన్న అడిగితే వలిగొండలో వీపు పగలకొట్టి గుంజేయాలె.. అర్థమైందా? 30 తారీఖు నాడు ఎవ్వడు అడ్డమొచ్చినా.. తొక్కుకుంటా పోవుడే. శేఖర్రెడ్డిని గెలిపించుడే. ఈ తెగుతవతోనే.. బ్రహ్మాండమైన మెజారిటీతో గెలిపించుకోవాలె”అని కేటీఆర్ క్యాడర్కు పిలుపునిచ్చారు.
బీజేపీ లీడర్లంతా బేకార్గాళ్లు
పెట్రో ఉత్పత్తుల రేట్లు పెంచడంతో ప్రధాని నరేంద్ర మోదీని ‘‘పిరమైన ప్రధాని”అంటున్నారని కేటీఆర్ ఎద్దేవా చేశారు. బీజేపీ లీడర్లందరూ బేకార్గాళ్లని, కాంగ్రెస్ లీడర్ రాహుల్ గాంధీకి ఎవుసం తెల్వదని, క్లబ్బులు.. పబ్బులు మాత్రమే తెలుసని కామెంట్ చేశారు. 3 గంటలే కరెంట్ చాలని రేవంత్ అంటుంటే.. రైతుబంధు వేస్టని ఉత్తమ్కుమార్ రెడ్డి అంటున్నారని విమర్శించారు. కరెంట్ ఎక్కడుందంటున్న ఈ కాంగ్రెస్ లీడర్లకు తీగలు పట్టుకుంటే తెలుస్తుందని, రాష్ట్రానికి పట్టిన దరిద్రం కూడా వదిలిపోతుందని అన్నారు. ఇప్పటికి 11 సార్లు అవకాశమిచ్చినా ఏం చేయని ఈ కాంగ్రెస్, ఇప్పుడు ఒక్క అవకాశమని అంటోందని విమర్శించారు. కాంగ్రెస్ కావాలో కరెంటు కావాలో ప్రజలే తేల్చుకోవాలని పిలుపునిచ్చారు. ఈ సందర్భంగా తమ ప్రభుత్వం అమలు చేసిన పథకాలు, ఎన్నికల తర్వాత అమలు చేయబోయే పథకాల గురించి కేటీఆర్ వివరించారు.
