‘మన్ కీ బాత్’ కార్యక్రమంలో సిరిసిల్ల చేనేత కార్మికుడు యెల్ది హరిప్రసాద్ గురించి ప్రధాని మోడీ ప్రస్తావించడంపై రాష్ట్ర మంత్రి కేటీఆర్ ట్విట్టర్ వేదికగా స్పందించారు. సిరిసిల్ల నేతన్నలపై ప్రధానికి నిజంగా ప్రేమ ఉంటే.. ఇక్కడ చేనేత రంగాన్ని నమ్ముకొని జీవిస్తున్న వారందరికీ బహుమతిగా మెగా పవర్ లూమ్ క్లస్టర్ ను మంజూరు చేయాలని కోరారు. దీని ఏర్పాటుకు సంబంధించి 2023 బడ్జెట్లో నిధులు కేటాయించాలని విజ్ఞప్తి చేశారు. చేనేత ఉత్పత్తులపై జీఎస్టీని కూడా పూర్తిగా ఎత్తివేయాలని కోరారు. చేనేత కార్మికుడు హరిప్రసాద్ కు ధన్యవాదాలు తెలుపుతూ ప్రధాని మోడీ చేసిన ట్వీట్ ను తన పోస్ట్ లో ట్యాగ్ చేశారు.
జీ-20 సమావేశాల లోగోను హరిప్రసాద్ తన చేతితో స్వయంగా నేసి ప్రధాని మోడీకి పంపించారు. దీన్ని చూసి తాను ఆశ్చర్యపోయానని మన్ కీ బాత్లో ప్రధాని మోడీ అన్నారు. తెలంగాణలోని ఒక జిల్లాలో కూర్చున్న వ్యక్తి కూడా జి-20 వంటి శిఖరాగ్ర సదస్సుతో... ఎంతగా అనుసంధానమయ్యాడో చూసి తాను చాలా సంతోషించానని మోడీ చెప్పారు.
