అందరం కలిసి చేయిచేయి కలిపి పోరాడుదాం: కేటీఆర్
యూనివర్సిటీని.. లేనేలేని ఫోర్త్ సిటీకి తరలించేందుకు కుట్రలు
హెచ్సీయూ విద్యార్థులు, పర్యావరణవేత్తలకు బహిరంగ లేఖలో వెల్లడి
హైదరాబాద్, వెలుగు: కంచ గచ్చిబౌలి భూములపై పోరాటం ఇంకా అయిపోలేదని బీఆర్ఎస్ ఎమ్మెల్యే కేటీఆర్ అన్నారు. అందరం చేయిచేయికలిపి పోరాడాల్సిన అవసరం ఉందన్నారు. ఆదివారం ఆయన
హెచ్సీయూ విద్యార్థులు, పర్యావరణ వేత్తలకు బహిరంగ లేఖ రాశారు. ఆ భూమి రియల్ఎస్టేట్ వ్యాపారం కోసం కాదని, పర్యావరణానికి రక్షణ కవచమని అన్నారు. అలాంటి భూముల విధ్వంసానికి రాష్ట్ర ప్రభుత్వం పూనుకోవడం చాలా బాధిస్తున్నదన్నారు. అభివృద్ధి పేరిట పర్యావరణ హత్య చేస్తున్నదన్నారు.
ఈ భూములను కాపాడేందుకు ప్రభుత్వాన్ని ఎదిరిస్తూ హెచ్సీయూ విద్యార్థులు శాంతియుత పంథాలో పోరాటం చేయడం గొప్ప విషయమని కొనియాడారు. ఆ ఉద్యమాన్ని గౌరవించాల్సింది పోయి.. వారిపై తప్పుడు ప్రచారాలు చేస్తూ బెదిరింపులకు పాల్పడుతున్నదని ఆరోపించారు.
హెచ్సీయూను కూల్చి వేస్తామని ప్రభుత్వం బెదిరింపులకు పాల్పడుతున్నదని కేటీఆర్ ఆరోపించారు. విద్యార్థులు పోరాటం ఆపకుంటే యూనివర్సిటీని మరోచోటుకు మారుస్తామన్న బెదిరింపులు వస్తున్నాయన్నారు. అసలు లేనేలేని ఫోర్త్ సిటీకి యూనివర్సిటీని షిఫ్ట్ చేస్తామని చెబుతున్నారన్నారు. ప్రభుత్వం నైతికంగా దిగజారిపోయిందన్నారు.
