వరంగల్, వెలుగు: కరోనాతో ఎంజీఎంలో వెంటిలేటర్ మీద చికిత్స పొందుతున్న కేయూ జేఏసీ లీడర్ దబ్బేటి మహేశ్కు మెరుగైన వైద్యం అందించాలని స్టూడెంట్ లీడర్లు ప్రభుత్వాన్ని కోరారు. సీఎం కేసీఆర్, మంత్రులు కేటీఆర్, హరీశ్రావు ఈమేరకు చొరవ తీసుకోవాలని అన్నారు. తెలంగాణ ఉద్యమంలో చురుగ్గా పనిచేసిన మహేశ్ కరోనాతో నవంబర్16న ఎంజీఎం హాస్పిటల్లో చేరారు. ఆయన పరిస్థితి క్రిటికల్గా మారినా కార్పొరేట్ వైద్యాన్ని అందించే ఆర్థిక స్థోమతలేక ఇక్కడ చేర్పించారు. ప్రస్తుతం సుబేదారి పీజీ కాలేజీలో పార్ట్టైమ్ లెక్చరర్గా పని చేస్తున్న మహేశ్ కు ఆరునెలలకోసారి వచ్చే జీతం కుటుంబపోషణకే సరిపోవడంలేదని, చావుబతుకుల మధ్య ఉన్న అతన్ని బతికించుకునేందుకు కుటుంబసభ్యులు కష్టాలు పడుతున్నారని వారు చెప్పారు. దాతలు స్పందించి మహేశ్ కుటుంబాన్ని ఆదుకోవాలని, ఫోన్పే ద్వారా 77022 13771 కు తమ సాయాన్ని పంపాలని కోరారు.
మహబూబాబాద్ జిల్లా కురవికి చెందిన డాక్టర్ దబ్బేటి మహేశ్ కేయూ జేఏసీలో కీలకంగా పనిచేశారు. ఆయనపై ఉద్యమ సమయంలో చాలా కేసులు నమోదయ్యాయి. అప్పటి సీఎం కిరణ్కుమార్ రెడ్డి ములుగు మండలం రాయినిగూడెం పర్యటనలో పోలీసు వలయాన్ని దాటి నిరసన తెలిపిన నలుగురు స్టూడెంట్లలో మహేశ్ ఒకరు. ఓయూ నుంచి కేయూ వరకు జరిగిన పాదయాత్రలో ఆయన సుమారు 500 కిలోమీటర్లు నడిచారు.దాదాపు50పైగా కేసులు నమోదయ్యాయి. వరంగల్ సెంట్రల్ జైలులో ఉన్నారు.
