కూకట్పల్లి, వెలుగు: కూతురు తమకు ఇష్టం లేకుండా ప్రేమ పెండ్లి చేసుకుందనే మనస్తాపంతో తల్లి సూసైడ్ చేసుకున్న ఘటన కూకట్ పల్లి పీఎస్పరిధిలో జరిగింది. పోలీసుల వివరాల ప్రకారం.. జయనగర్లో నివసించే గోనుగుంట నిర్మల(45), శ్రీనివాసరావు దంపతులకు కూతురు(25), కొడుకు ఉన్నారు. కూతురు ప్రైవేట్ జాబ్ చేస్తోంది. కొంతకాలంగా కూకట్పల్లికే చెందిన తన క్లాస్మేట్ తో ప్రేమలో ఉంది. విషయం తెలిసి తల్లిదండ్రులు ఆమెను మందలించారు. అయితే తాను ప్రేమించిన యువకుడినే పెండ్లి చేసుకుంటానని ఆమె తెగేసి చెప్పడంతో వారి మధ్య మనస్పర్థలు ఏర్పడ్డాయి.
ఈ నేపథ్యంలోనే వారంక్రితం ఆ యువతి ఇంట్లో నుంచి వెళ్లిపోయి ప్రేమించిన యువకుణ్ని పెండ్లి చేసుకుంది. ఈ పరిణామంతో కుటుంబ సభ్యులు తీవ్రంగా కుమిలిపోయారు. సోమవారం ఇంట్లో ఎవరూ లేని సమయంలో నిర్మల ఫ్యాన్కు ఉరేసుకొని చనిపోయింది. సాయంత్రం 6 గంటలకు కాలేజీ నుంచి వచ్చిన కుమారుడు బెడ్ రూమ్ లాక్ చేసి ఉండటం గమనించి, మరో కీతో తలుపు తీసి చూడగా.. నిర్మల చీరతో ఫ్యాన్కు ఉరి వేసుకుని కనిపించింది. సమీపంలోని ఆసుపత్రికి తరలించగా అప్పటికే ఆమె మృతి చెందిందని డాక్టర్లు నిర్ధారించారు. పోలీసులు కేసు నమోదు చేసుకుని దర్యాప్తు చేస్తున్నారు.
