కూకట్పల్లి, వెలుగు: కూకట్పల్లిలో ఇద్దరు బాలికల మిస్సింగ్ ఘటన మలుపు తిరిగింది. ఏపీ బాపట్లలోని సూర్యలంక బీచ్లో ఉన్నట్టు పోలీసులు గుర్తించారు. వీరిద్దరూ ప్లాన్ ప్రకారమే అక్కడికి వెళ్లినట్లు తేల్చారు. కూకట్పల్లి ఏసీపీ శ్రీనివాసరావు వివరాల ప్రకారం.. జగద్గిరిగుట్టకు చెందిన ఇద్దరు బాలికలు కూకట్పల్లి వివేకానందనగర్లోని ఓ కార్పొరేట్స్కూల్లో 8వ తరగతి చదువుతున్నారు. వీరిలో ఒకరి స్వగ్రామం సూర్యలంక బీచ్ సమీపంలో ఉండడంతో తరచూ ఆ బీచ్ అందాల గురించి మరో బాలికకు చెబుతుండేది. క్లాస్రూమ్లో వీరు తరచూ సూర్యలంకకు వెళ్లాలని మాట్లాడుకోవడం తోటి విద్యార్థులు విన్నారు.
ఈ నెల19న వీరిద్దరూ రోజూ మాదిరిగానే స్కూల్కు వెళ్లారు. సాయంత్రం 4.30 గంటకు స్కూల్ అయిపోయాక సమీపంలో నిర్మాణంలో ఉన్న ఓ భవనంలోకి వెళ్లారు. ఆ తర్వాత స్కూల్ డ్రెస్ తీసేసి తమ వెంట తెచ్చుకున్న సివిల్ డ్రెస్ వేసుకుని బయటకు వచ్చారు. ఇంటికి వెళ్లకుండా సూర్యలంక బీచ్కు వెళ్లారు. ఎక్కడా గాలించినా బాలికల ఆచూకీ లభించకపోవడంతో వారి తల్లిదండ్రులు బుధవారం కూకట్పల్లి పోలీసులకు ఫిర్యాదు చేశారు.
దీంతో పోలీసులు కేసు నమోదు చేసి దర్యాప్తు చేపట్టారు. సీసీ కెమెరాల ఆధారంగా గురువారం బాలికలను ఆంధ్రప్రదేశ్ బాపట్ల సమీపంలోని సూర్యలంకలో ఉన్నట్టు గుర్తించారు. వీరిని శుక్రవారం నగరానికి తీసుకువచ్చే అవకాశం ఉంది. అయితే, వీరిద్దరే ఇక్కడి నుంచి సూర్యలంక వరకు వెళ్లారా లేక వేరే ఎవరైనా వీరికి సహకరించి ఉంటారా? అనేది బాలికలు వస్తేనే తెలుస్తుందని ఏసీపీ తెలిపారు.
