హాలియా, వెలుగు: కాంగ్రెస్ హయాంలోనే గిరిజన తండాలు అభివృద్ధి చెందాయని మాజీ సీఎల్పీ లీడర్ కుందూరు జానారెడ్డి చెప్పారు. శుక్రవారం నల్గొండ జిల్లా తిరుమలగిరి(సాగర్) మండల కేంద్రంలో నిర్వహించిన కార్యకర్తల సమావేశంలో సాగర్ అభ్యర్థి కుందూరు జయవీర్ రెడ్డితో కలిసి పాల్గొన్నారు. ఈ సందర్భంగా జానారెడ్డి మాట్లాడుతూ.. గత 30 ఏండ్లుగా నియోజకవర్గ అభివృద్ధికి ఎంతో కృషి చేశానన్నారు.
సీఎం కేసీఆర్‌ గతఎన్నికల్లో ఇచ్చిన హామీలు అమలు చేయకుండా ప్రజలను మోసం చేశారని మండిపడ్డారు. తండాల్లో ఇందిరమ్మ ఇండ్లు తప్ప కేసీఆర్‌ చెప్పిన డబుల్ బెడ్‌ రూం ఇండ్లు లేవన్నారు. ఉచిత కరెంట్‌ మొదలు పెట్టిందే కాంగ్రెస్ అని అధికారంలోకి రాగానే 24 గంటలు ఇస్తామని చెప్పారు. రైతులకు ఎకరానికి రూ. 15 వేలు, రైతు కూలీలకు రూ. 12 వేలు, రూ. 500 లకే గ్యాస్ సిలిండర్, మహిళలకు ఉచితంగా ఆర్టీసీ బస్సు ప్రయాణం హామీలు అమలు చేస్తామన్నారు.
అనంతరం జానారెడ్డి సమక్షంలో ఆర్ఎస్ఎస్ మండల అధ్యక్షుడు శాగం రాఘవరెడ్డి, కోఆప్షన్ మెంబర్ ఎం.డీ రహీం తో పాటు 2 వేల మంది బీఆర్‌‌ఎస్‌ కార్యకర్తలు కాంగ్రెస్‌లో చేరారు. డీసీసీ అధ్యక్షుడు కేతావత్ శంకర్ నాయక్, పీసీసీ ప్రధాన కార్యదర్శి కుందూరు రఘు వీర్రెడ్డి, డెలిగేట్ సభ్యుడు కర్నాటి లింగారెడ్డి, నాయకులు లింగారెడ్డి, నారాయణ గౌడ్, చంద్రశేఖర్ రెడ్డి, రావుల చిన్న భిక్షం యాదవ్, కృష్ణా నాయక్, శాగం పెద్దిరెడ్డి, శాగం రాఘవ రెడ్డి, శేఖర్ పాల్గొన్నారు.
