సోషల్మీడియాలో ఇప్పుడు ఇన్స్టాగ్రామ్ క్రేజ్ నడుస్తోంది. అందుకే సెలబ్రిటీలు, సినిమా స్టార్స్ ఇన్స్టాలో రీల్స్ చేస్తూ, స్టోరీలు పెడుతూ ఫ్యాన్స్తో టచ్లో ఉంటున్నారు. వాళ్లని ఫాలో అయ్యేవాళ్ల సంఖ్య కూడా లక్షల్లో ఉంటుంది. అయితే, ఈమెకు ఏకంగా ఇన్స్టాగ్రామ్లో 30 కోట్ల మంది ఫాలోయర్స్ ఉన్నారు. ప్రపంచవ్యాప్తంగా ఇంతమంది ఫాలోయర్స్ ఉన్న మొదటి మహిళగా రికార్డు క్రియేట్ చేసింది అమెరికాకు చెందిన 24 ఏండ్ల కైలీ జెన్నర్.
రియాల్టీ టీవీ స్టార్, మోడల్ కూడా అయిన కైలీ ఈమధ్యే సొంతంగా తన పేరుతో కాస్మొటిక్ ప్రొడక్ట్స్ కంపెనీ నడుపుతోంది. ఆమెకు సోషల్మీడియాలో ఫ్యాన్స్తో టచ్లో ఉండడమంటే ఇష్టం. అందుకే తన జీవితంలో ముఖ్యమైన విషయాల్ని, తన కంపెనీ ప్రొడక్ట్స్ గురించి ఎప్పటికప్పుడు ఇన్స్టాగ్రామ్లో షేర్ చేసుకుంటుంది కైలీ. అయితే, గత కొన్ని నెలలుగా ఇన్స్టాగ్రామ్లో యాక్టివ్గా లేకున్నా కూడా ఆమె ఫాలోవర్స్ సంఖ్య 30 కోట్లకు చేరడం విశేషం. స్టార్ ఫుట్బాల్ ఆటగాడు క్రిస్టియానో రొనాల్డో 38 కోట్లకు పైగా ఫాలోయర్స్తో ఫస్ట్ ప్లేస్లో ఉన్నాడు. ఇన్స్టాలో రికార్డులు సాధించడం కైలీకి ఇదే మొదటిసారి కాదు. ఆమె తన కూతురు చేయిపట్టుకుని ఉన్న ఫొటో ఇన్స్టాగ్రామ్లో ఎక్కువ లైక్స్ (18 కోట్లకు పైగా) వచ్చిన ఫొటోగా రికార్డులకెక్కింది.
రియాల్టీ షోతో మొదలు
స్కూల్ డేస్ నుంచే ఆటపాటల్లో యాక్టివ్గా ఉండేది కైలీ. పెద్దయ్యాక మోడల్ అవ్వాలని కలలు కనేది. తన కలను నిజం చేసుకోవాలని 2007లో టీవీ నటిగా కెరీర్ మొదలుపెట్టింది కైలీ. తన కజిన్స్తో కలిసి ‘కీపింగ్ అప్ విత్ ది కర్దషియాన్స్’ అనే టీవీ రియాల్టీ షో సిరీస్ లో యాక్ట్ చేసింది. 2017లో ఫోర్బ్స్ టాప్ 100 లిస్టులో నిలిచిన చిన్నవయస్కురాలైన సెలబ్రిటీగా గుర్తింపు తెచ్చుకుంది కైలీ. ఇక్కడ మరో విషయం ఏమంటే... అమెరికన్ నటి, ఫ్యాషనిస్ట్ అయిన కిమ్ కర్దషియాన్, కైలీ వరుసకి అక్కాచెల్లెళ్లు.
