భద్రాద్రికొత్తగూడెం, వెలుగు : రాష్ట్రంలోని కోల్బ్లాక్ల వేలాన్ని వ్యతిరేకిస్తూ కేంద్రంపై పోరుకు సింగరేణిలోని కార్మిక సంఘాలు సన్నద్ధమవుతున్నాయి. బీఎంఎస్ మినహా అన్ని ప్రధాన కార్మిక సంఘాలు ఆందోళనలో పాల్గొంటున్నాయి. శ్రావణపల్లి కోల్ బ్లాక్ను బేషరుతుగా సింగరేణికి కేటాయిస్తూ కేంద్రం నిర్ణయం తీసుకోవాలనే ప్రధాన డిమాండ్తో దశలవారీ పోరాటాలకు యూనియన్లు రెడీ అయ్యాయి. గుర్తింపు సంఘమైన సింగరేణి కాలరీస్ వర్కర్స్ యూనియన్(ఏఐటీయూసీ), ప్రాతినిధ్య సంఘమైన ఐఎన్టీయూసీతో పాటు సీఐటీయూ, హెచ్ఎంఎస్, బీఆర్టీయూ, ఇఫ్టూ, టీఎన్టీయూసీ, ఐఎఫ్టీయూ ఈ నెల 5 నుంచి దశలవారీ ఆందోళనలకు శ్రీకారం చుట్టనున్నాయి. టీబీజీకేఎస్ ఇప్పటికే కోల్ బ్లాక్ల వేలాన్ని వ్యతిరేకిస్తూ ఆందోళనలు చేపడుతోంది. మిగిలిన యూనియన్లతో కలిసి పోరాడేందుకు టీబీజీకేఎస్ ముందుకు వచ్చింది. ఇదిలాఉంటే బీజేపీ అనుబంధ బీఎంఎస్ ఈ పోరాటాలకు దూరంగా ఉంది.
దశలవారీ ఆందోళనలు..
సింగరేణి ప్రాంతంలోని కోల్ బ్లాక్ల వేలాన్ని నిరసిస్తూ, కేంద్రంలోని బీజేపీ ప్రభుత్వం అనుసరిస్తున్న ప్రైవేటీకరణ విధానాలను వ్యతిరేకిస్తూ రాష్ట్రంలోని కోల్బెల్ట్ ప్రాంతాలైన ఆరు జిల్లాల్లో దశలవారీ ఆందోళనలు చేపట్టాలని కార్మిక సంఘాలు నిర్ణయించాయి. ప్రస్తుతం వేలంలో ఉంచిన శ్రావణపల్లి కోల్ బ్లాక్ను సింగరేణికే అప్పగించాలని, భవిష్యత్తులో సింగరేణి పరిధిలోని కోల్ బ్లాక్లను సింగరేణికే అప్పగించాలంటూ యూనియన్లు డిమాండ్ చేస్తున్నాయి. ఇందులో భాగంగా కార్మిక సంఘాలన్నీ రెండు రోజుల కింద హైదరాబాద్లో రౌండ్ టేబుల్ మీటింగ్ పెట్టుకున్నాయి. దశల వారీ ఆందోళనలతో కేంద్రంతో పాటు రాష్ట్రానికి చెందిన బొగ్గు గనుల మంత్రి కిషన్రెడ్డిపై ఒత్తిడి తీసుకురావడమే యూనియన్ల లక్ష్యంగా కనిపిస్తోంది.
రాష్ట్రంలోని బొగ్గు బ్లాక్ల ప్రైవేటీకరణతో రాష్ట్రంతో పాటు సింగరేణికి నష్టం కలుగుతుందని వర్కర్స్ యూనియన్ రాష్ట్ర ప్రధాన కార్యదర్శి రాజ్కుమార్, ఐఎన్టీయూసీ రాష్ట్ర ఉపాధ్యక్షుడు జనక్ ప్రసాద్, ఎంప్లాయీస్ యూనియన్ రాష్ట్ర ప్రధాన కార్యదర్శి మందా నర్సింహారావు, హెచ్ఎఎస్ రాష్ట్ర ప్రధాన కార్యదర్శి రియామ్ అహ్మద్తో పాటు ఏఐటీయూసీ, సీఐటీయూ, ఐఎన్టీయూస్, ఇఫ్టూ, టీఎన్టీయూసీ, బీఆర్టీయూ సంఘాల నేతలు, లీడర్లు పేర్కొంటున్నారు. ఇదిలా ఉండగా సింగరేణి కాలరీస్ వర్కర్స్ యూనియన్, టీబీజీకేఎస్ యూనియన్లు ఇప్పటికే తమ కార్యాచరణను ప్రకటించి నిరసనలు ప్రారంభించాయి. బీఎంఎస్ మినహా మిగిలిన సంఘాలన్నీ ఏకతాటిపైకి వస్తుండడంతో ఉమ్మడి ఎజెండాకు ప్రాధాన్యత ఇచ్చేలా యూనియన్ల లీడర్లు ముందుకెళ్తున్నారు.
ఆందోళనలు ఇలా..
- ఈ నెల 5న కోల్బెల్ట్ ప్రాంతాల్లోని కలెక్టరేట్ల ఎదుట ధర్నాలు.
- 10న సింగరేణి వ్యాప్తంగా అన్ని ఏరియాల వద్ద నిరసనలు, కొత్తగూడెంలోని సింగరేణి హెడ్ ఆఫీస్ ఎదుట ధర్నా.
- 13న సింగరేణి ఏరియాల్లో 13న జీఎం ఆఫీస్ల ఎదుట ధర్నా.
- 17న హైదరాబాద్లోని సింగరేణి భవన్ ఎదుట భారీ ధర్నా.
- కోల్బెల్ట్ పరిధిలోని జిల్లాల్లో కోల్ బ్లాక్ల వేలాన్ని నిరసిస్తూ సదస్సులు.
- సీఎం రేవంత్రెడ్డి, కేంద్ర బొగ్గు గనుల శాఖ మంత్రి కిషన్రెడ్డికి వినతిపత్రం ఇవ్వడంతో పాటు అవకాశాన్ని బట్టి ప్రధానికి వినతిపత్రం ఇవ్వాలని నిర్ణయం.
