పినపాక, వెలుగు: పినపాక మండలంలో మిరప కోత కూలీలకు ఇచ్చే రేట్లను తగ్గించడంపై నిరసనగా వివిధ గ్రామాలకు చెందిన కూలీలు శుక్రవారం నిరసన వ్యక్తం చేశారు. ఏడూళ్లబయ్యారం క్రాస్ రోడ్లో బైఠాయించి పలుగ్రామాల నుంచి మిరపకోతలకు వెళ్తున్న కూలీల వాహనాలు అడ్డగించి తిరిగి వెనక్కి పంపించారు.
ఈ సందర్భంగా వారు మాట్లాడుతూ నిన్నటి వరకు రూ.300 చెల్లించిన కూలిని రూ.250కి తగ్గించడంపై వారు ఆవేదన వ్యక్తం చేశారు. స్థానికంగా ఉన్న కూలీలను కాదని వేరే ప్రాంతాలను కూలీలను తీసుకొచ్చి పనిచేయించుకోడం తగదని, తమకు న్యాయం చేయాలని కోరుతూ పినపాక తహసీల్దార్ఆఫీసులో వినతి అందజేశారు. కూలీలకు నిరసనకు సీపీఐ(ఎంఎల్) మాస్లైన్ ప్రజాపంథా జిల్లా నాయకులు ఆర్.మధుసూధనరెడ్డి మద్దతు తెలిపారు.
