హైదరాబాద్: సంగారెడ్డి జిల్లా జైలు నుంచి లగచర్ల రైతులు శుక్రవారం(డిసెంబర్ బెయిల్పై విడుదయ్యారు. సంగారెడ్డి జైలు నుంచి 17 మంది రైతులు విడుదల కావడంతో గిరిజన సంఘాలు స్వాగతం పలికాయి. 37 రోజుల తర్వాత లగచర్ల రైతులు జైలు నుంచి విడుదల కావడంతో కుటుంబ సభ్యులను చూసి ఉద్విగ్నానికి లోనయ్యారు. లగచర్లలో కలెక్టర్పై దాడి ఘటనలో మాజీ ఎమ్మెల్యే పట్నం నరేందర్ రెడ్డి, ఆయన అనుచరుడు భోగ మోని సురేష్తో సహా 24 మందికి నాంపల్లి స్పెషల్ కోర్టు బెయిల్ మంజూరు చేసిన సంగతి తెలిసిందే.
లగచర్లలో వికారాబాద్ జిల్లా కలెక్టర్ ప్రతీక్ జైన్పై దాడి కేసులో నెల రోజులకు పైగా నిందితులు జైల్లోనే ఉన్నారు. పట్నం నరేందర్ రెడ్డి రూ.50 వేలతో పాటు రెండు షూరిటీలు సమర్పించాక బెయిల్ మంజూరైంది. నరేందర్ రెడ్డి 3 నెలల పాటు ప్రతి బుధవారం పోలీసుల ముందు హాజరు కావాలని నాంపల్లి కోర్టు ఆదేశించింది. మిగతా వారు రూ.20 వేల పూచీకత్తు సమర్పించాలని కోర్టు ఆదేశించింది.
వికారాబాద్ జిల్లా దుద్యాల, లగచర్ల, పోలేపల్లిలోని 1,350 ఎకరాల్లో ఇండస్ట్రియల్కారిడార్ఏర్పాటు కోసం ప్రభుత్వం కసరత్తు చేసింది. మొదట ఫార్మా విలేజ్ఏర్పాటు చేద్దామని అనుకున్నా స్థానికుల నుంచి వ్యతిరేకత రావడంతో ఇండస్ట్రియల్కారిడార్ఏర్పాటుకు నిర్ణయించింది. ఇందులో భాగంగానే దుద్యాలలో అధికారులు గ్రామసభ, ప్రజాభిప్రాయ సేకరణ ఏర్పాటు చేశారు. ఈ కార్యక్రమం కోసం వికారాబాద్ జిల్లా కలెక్టర్ ప్రతీక్ జైన్, అడిషనల్కలెక్టర్ లింగ్యా నాయక్, సబ్కలెక్టర్ఉమాశంకర్ప్రసాద్, కడా స్పెషల్ఆఫీసర్ వెంకట్రెడ్డితో పాటు ఇతర అధికారులు వచ్చారు. అయితే, గ్రామసభకు ఒక్క రైతు కూడా హాజరు కాలేదు. గంట సేపటివరకూ వారి కోసం వేచి చూసినా రాలేదు.
అప్పుడే కలెక్టర్ ప్రతీక్ జైన్ దగ్గరకు బీఆర్ఎస్ లీడర్ మొగవోని సురేశ్వచ్చారు. ‘సార్.. రైతులందరూ లగచర్లలో ఉన్నారు. అక్కడే టెంట్ వేశాం. మీరు అక్కడికి వస్తే మాట్లాడొచ్చు’ అని నమ్మించాడు. దీంతో కలెక్టర్, అడిషనల్కలెక్టర్, సబ్కలెక్టర్, కడా స్పెషల్ ఆఫీసర్వారి వారి కార్లలో 5 కిలోమీటర్ల దూరంలోని లగచర్లకు వెళ్లారు. గ్రామంలోని రామాలయం దగ్గరకు వెళ్లిన కలెక్టర్, ఇతర అధికారులు కారు దిగి, రైతులతో మాట్లాడడం మొదలెట్టారు. వెంటనే ఓ పక్క నుంచి 20 నుంచి 30 మంది వరకు కలెక్టర్పైకి తోసుకుంటూ వచ్చారు. దాడికి దిగుతున్నారని గుర్తించిన వ్యక్తిగత సెక్యూరిటీ సిబ్బంది, డ్రైవర్.. కలెక్టర్ను కారు దగ్గరకు తీసుకెళ్లారు. ఇదే సమయంలో ఇతర అధికారులపై దాడి చేయబోతున్నారని గమనించిన కలెక్టర్.. వారిని కాపాడేందుకు ముందుకు వచ్చారు.
అప్పటికే రైతులు, గ్రామస్తులు రాళ్లు, కర్రలతో దాడి చేయడం మొదలుపెట్టారు. వెంటనే కలెక్టర్ను ఆయన సెక్యూరిటీ సిబ్బంది, డ్రైవర్ కారు ఎక్కించి ముందుకు తీసుకువెళ్లబోయారు. ఈ దశలో ఆయన వాహనంపై దాడి చేశారు. వెనుక అద్దాలపై రాళ్లు వేయడంతో, అవి పగిలిపోయాయి. అడిషనల్ కలెక్టర్ లింగ్యా నాయక్, స్పెషల్ఆఫీసర్ వెంకట్రెడ్డి దొరకడంతో వారిని ఇష్టమున్నట్టు కొట్టారు. కర్రలు, రాళ్లతో దాడి చేయడంతో వారు గాయపడ్డారు. దాడి చేస్తున్న వారి నుంచి తప్పించుకోవడానికి సమీపంలోని వరి చేన్లలోకి పరుగులు తీశారు. అయినా వదలకుండా వెంటపడ్డారు. అప్పుడే దుద్యాల నుంచి మిగతా పోలీసులు రావడంతో ప్రాణాలతో బయటపడగలిగారు. ఈ ఘటన రాష్ట్ర వ్యాప్తంగా చర్చనీయాంశమైంది.
