హనుమకొండ, వెలుగు: ఓరుగల్లు నగరంలో రకరకాల పద్ధతుల్లో భూ కబ్జాలు జరుగుతున్నాయి. కొంతమంది ల్యాండ్ గ్రాబర్స్ అమాయకుల భూములను బలవంతంగా లాక్కుని దౌర్జన్యాలకు దిగుతుండగా.. ఇంకొందరు ఖాళీ స్థలాలకు నకిలీ పేపర్లు సృష్టించి మోసాలకు పాల్పడుతున్నారు. మరికొందరు పాత నాన్ జ్యుడిషియల్ స్టాంప్(బాండ్) పేపర్లతో కబ్జాలు చేస్తున్నారు. సిటీలో కొంతమంది స్టాంప్ వెండర్లు ల్యాండ్ మాఫియాకు సహకరిస్తున్నారనే ఆరోపణలున్నాయి. ల్యాండ్ వ్యాల్యూను బట్టి రూ.వేల నుంచి రూ.లక్షలు వసూలు చేసి.. పాత స్టాంప్ పేపర్లను అక్రమార్కులకు అందిస్తుండటంతో వారు నకిలీ నోటరీలు చేయడం, ఆ తరువాత ఆఫీస్ సిబ్బంది సహకారంతో రిజిస్ట్రేషన్లూ పూర్తి చేసేస్తున్నట్లు తెలుస్తోంది. దీంతో క్షేత్రస్థాయిలో భూవివాదాలు ఎక్కువకావడమే కాకుండా ఎంతోమంది అమాయకులు నష్టపోతున్నారు.
స్టాంప్ వెండర్ల సహకారంతో..
వరంగల్ లో ఒకప్పుడు రూ.వేలు, రూ.లక్షలు ఉన్న భూముల రేట్లు ఇప్పుడు రూ.కోట్లకు పెరిగాయి. దీంతో రియల్ వ్యాపారం కూడా జోరందుకుంది. ఈ క్రమంలోనే కొందరు భూ దందాలకు తెరలేపారు. ఖాళీ జాగలు, అమాయకుల స్థలాలపై కన్నేసి, ఆ తర్వాత అదే భూమికి తప్పుడు పత్రాలు సృష్టిస్తున్నారు. సిటీలో దాదాపు 70 మంది వరకు స్టాంప్ వెండర్లు ఉండగా.. అందులో కొందరు డబ్బులకు ఆశపడి అక్రమార్కులతో చేతులు కలుపుతున్నారు. తమ వద్ద ఉన్న ఏండ్ల కిందటి రూ.50, రూ.100 బాండ్ పేపర్లను భూ కబ్జాకోరులకు అమ్ముతున్నారు. ఇందుకు ల్యాండ్ మార్కెట్ వ్యాల్యూను బట్టి డబ్బులు వసూలు చేస్తున్నారు. సాధారణంగా తెలంగాణ గవర్నమెంట్ కు సంబంధించిన బాండ్ పేపర్ కావాలంటే ఒకరేటు.. ఉమ్మడి ఏపీకి సంబంధించిన స్టాంప్ పేపర్లు కావాలంటే ఇంకో రేటు అమలు చేస్తున్నారు. ఓల్డ్ పేపర్లు.. ఇల్లీగల్ డాక్యుమెంట్లు వాస్తవానికి స్టాంప్ వెండర్ల బాండ్ల క్రయవిక్రయాల వివరాలపై సబ్ రిజిస్ట్రార్ ఆఫీస్ స్టాఫ్ పర్యవేక్షణ ఉండాలి. కానీ అదంతా ఏమీ జరగడం లేదు. దీంతో కొంతమంది స్టాంప్ వెండర్లు పాత బాండ్ పేపర్లను దాచుకుని వాటితో ఇప్పుడు రూ.లక్షల్లో బిజినెస్ చేస్తున్నారనే ఆరోపణలు వినిపిస్తున్నాయి.
ఇప్పటికీ ఏండ్ల కిందటి బాండ్ పేపర్లు అక్రమార్కుల చేతుల్లో దర్శనమిస్తుండటం, వాటితో రూ.కోట్లు విలువ చేసే భూముల విషయంలో అక్రమాలు జరుగుతుండటమే ఇక్కడి పరిస్థితికి అద్దం పడుతోంది. ఇటీవల పలివేల్పుల సమీపంలోని ల్యాండ్ ను కబ్జా చేసిన బీఆర్ఎస్ నేత నన్నబోయిన రమేశ్.. తమది కాని భూమికి 1993 నాటి బాండ్ పేపర్ తో అక్రమంగా నోటరీ చేసినట్లు తేలింది. ఆ తరువాత సబ్ రిజిస్ట్రార్ ఆఫీస్ సిబ్బంది సహకారంతో అదే నోటరీని రెగ్యులరైజ్ చేయించి, అక్రమంగా సేల్ డీడ్ కూడా తయారు చేయించినట్లు పోలీసులు నిర్ధారించారు. ఇటీవల ఈ ఘటనలో కేసు నమోదు కాగా.. ఇదివరకు సుబేదారి, కాకతీయ యూనివర్సిటీ, హసన్పర్తి, మిల్స్ కాలనీ స్టేషన్ల పరిధిలో ఫేక్ డాక్యుమెంట్ల కేసులు పదుల సంఖ్యలో నమోదు అయ్యాయి. అడపాదడపా ఇలాంటివి బయటపడుతుండగా.. బయటకు రాని ఘటనలు చాలానే ఉన్నాయని కొంతమంది రియల్ వ్యాపారులు కూడా చెబుతుండటం గమనార్హం. కాగా సిటీలోని సుబేదారి, హసన్ పర్తి ఏరియాల్లోని కొంతమంది స్టాంప్ వెండర్లు ఏ సంవత్సరానికి సంబంధించిన బాండ్ పేపర్లయినా సమకూరుస్తారనే ప్రచారం సాగుతోంది.
రిజిస్ట్రేషన్లూ చేసేస్తున్నరు..
ఇదివరకు భూముల క్రయవిక్రయాలసమయంలో స్టాంప్ డ్యూటీ, రిజిస్ట్రేషన్ ఛార్జీలను భారంగా భావించి చాలామంది నోటరీలకే పరిమితం అయ్యారు. దీంతో కొంతమంది భూ అక్రమార్కులు పాత పేపర్లతో దందా జోరుగా సాగిస్తున్నట్లు తెలుస్తోంది. ఇలాంటి ఓల్డ్ నాన్ జ్యుడిషియల్ స్టాంప్ పేపర్లతో దుండగులు నకిలీ నోటరీలు సృష్టిస్తుండగా.. రిజిస్ట్రేషన్ల ప్రక్రియ పూర్తి చేసేందుకు ఆఫీస్ సిబ్బంది సహకరిస్తున్నారనే ఆరోపణలు వెల్లువెత్తుతున్నాయి. పర్యవేక్షణ చేయాల్సిన ఆఫీసర్లు పట్టించుకోకపోవడం, ఆఫీస్ సిబ్బంది అక్రమార్కులకు సహకరిస్తున్నా దృష్టి పెట్టకపోవడంతో రిజిస్ట్రేషన్ ఆఫీసుల్లో అక్రమాలు జరుగుతున్నాయి.ఇకనైనా జిల్లా ఉన్నతాధికారులు పాత స్టాంప్ పేపర్ల దందాతో పాటు అక్రమ రిజిస్ట్రేషన్లపై తగిన చర్యలు తీసుకోవాలని ప్రజలు కోరుతున్నారు.
