శ్రీ‌లంక వేదికగా జరిగే లంక ప్రీమిర్ టీ20 లీగ్ 4వ సీజ‌న్‌ నేటి(జూలై 30) నుంచి ఆరంభంకానుంది. 5 జట్ల మధ్య జరిగే పోరు.. 21 రోజుల పాటు ప్ర‌పంచ‌వ్యాప్తంగా ఉన్న క్రికెట్ అభిమానుల‌ను అల‌రించ‌నుంది. ఇటీవల ఇండియ‌న్ ప్రీమియర్ లీగ్(IPL 2023)లో దుమ్మురేపిన అంత‌ర్జాతీయ క్రికెట‌ర్లు మ‌రోసారి త‌మ మెరుపు బ్యాటింగ్‌తో ప్రేక్షకులను హోరెత్తించ‌నున్నారు.
ఈ టోర్నీని రౌండ్-రాబిన్ ఫార్మాట్‌లో నిర్వహిస్తున్నారు. గ్రూప్ స్టేజీలో ప్ర‌తి జ‌ట్టు.. ఒక్కో జ‌ట్టుతో రెండు మ్యాచ్‌లు ఆడనుంది. ఇలా లీగ్ మ్యాచ్ లు ముగిసేసరికి టాప్ -4లో ఉన్న జట్లు ప్లే ఆఫ్స్‌కు అర్హ‌త సాధిస్తాయి. ఆగ‌స్టు 17న ప్లే ఆఫ్స్, 20న ఫైన‌ల్ మ్యాచ్ జరగనుంది. ఫైన‌ల్ పోరుకు రిజ‌ర్వ్ డే(ఆగ‌స్టు 21) కూడా కేటయించారు.
5 జట్లు - కెప్టెన్‌లు
- బి-ల‌వ్ కాండీ - వ‌నిందు హ‌స‌రంగ
- జఫ్నా కింగ్స్ - తిషారా పెరేరా
- కొలంబో స్ట్రైకర్స్ - నిరోష‌న్ డిక్‌వెల్లా
- గాలే టైటాన్స్ - డాసున్ శ‌న‌క
- దంబుల్లా ఆరా - కుశాల్ మెండిస్
లైవ్ ఎక్కడ, ఎలా చూడాలంటే?
లంక ప్రీమిర్ లీగ్ 2023 మ్యాచ్ లను స్టార్ స్పోర్ట్స్ నెట్‌వ‌ర్క్‌ ప్రత్యక్ష ప్రసారం చేయనుంది. దీంతో పాటు డిజిటల్‌గా వీక్షించాలనుకునే వారు ఫ్యాన్‌కోడ్ యాప్‌లో చూడవచ్చు.
