- ఒక్కరోజే 7 లక్షల మంది దర్శనం
- ఆర్టీసీ, మెట్రో సర్వీసుల్లో కిక్కిరిసి ప్రయాణం
హైదరాబాద్ సిటీ, వెలుగు: ఖైరతాబాద్ సప్తముఖ మహా గణపతి దర్శనానికి ఆదివారం భక్తులు పోటెత్తారు. హాలిడే, దర్శనాలకు చివరి రోజుకావడంతో భారీగా తరలివచ్చారు. ఎటుచూసిన జనమే కనిపించారు. ఈ సందర్భంగా భక్తులకు నిర్వాహకులు గణనాధుడి లక్ష రుద్రాక్షలను పంపిణీ చేశారు. ఉదయం విగ్రహం వద్ద శ్రీనివాస కల్యాణం, హోమం నిర్వహించారు. అధిక సంఖ్యలో భక్తులు తరలిరావడంతో పంజాగుట్ట, లక్డీకాపూల్, ట్యాంక్ బండ్, ప్రసాద్స్ ఐ మ్యాక్స్, టెలిఫోన్ భవన్ తదితర ప్రాంతాల్లో ట్రాఫిక్ స్తంభించింది. ఆర్టీసీ బస్సులు, మెట్రో రైళ్లలో భక్తులు ఎక్కువగా వచ్చారు. సొంత వాహనాల్లో వచ్చేవారికి పార్కింగ్ ఇక్కట్లు తప్పలేదు.
అర్ధరాత్రి 2 గంటల వరకు మెట్రో
గణేశ్ నిమజ్జనం సందర్భంగా 17న(మంగళవారం) అర్ధరాత్రి 2 గంటల వరకు మెట్రో రైళ్లు అందుబాటులో ఉంటాయని హెచ్ఎంఆర్ఎల్ ఎండీ ఎన్వీఎస్ రెడ్డి తెలిపారు. భక్తుల రద్దీని బట్టి మంగళవారం అదనపు మెట్రో సర్వీసులను నడపాలని నిర్ణయించినట్లు వెల్లడించారు. మంగళవారం అర్ధరాత్రి ఒంటి గంటకు అన్ని రూట్లలో చివరి రైలు బయలుదేరి 2 గంటలకు చివరి స్టేషన్ కు చేరుకుంటుందని స్పష్టం చేశారు. ఆదివారం ఆయన ఎల్అండ్ టీ, ఎంహెచ్ఆర్ఎల్ ఎండీ కేవీబీ రెడ్డి, సీనియర్ ఆఫీసర్లతో సమావేశం నిర్వహించారు. గణేశ్నిమజ్జనాలు మొదలైనప్పటి నుంచి మెట్రో రైళ్లలో రద్దీ పెరిగిందని చెప్పారు. శనివారం ఒక్కరోజే ఖైరతాబాద్ మెట్రో -స్టేషన్నుంచి 94 వేల మంది రాకపోకలు సాగించారని తెలిపారు. వీరిలో 55 వేల మంది ఖైరతాబాద్ కు వచ్చారని, 39 వేల మంది ఖైరతాబాద్నుంచి వెళ్లారని తెలిపారు.
ట్యాంక్ బండ్పై 15 క్రేన్లు ఏర్పాటు
ట్యాంక్బండ్పై గణనాథుల నిమజ్జనానికి అధికారులు గ్రీన్ సిగ్నల్ ఇచ్చారు. నిన్నటి దాకా నిమజ్జనానికి అనుమతి లేదంటూ ఏర్పాటు చేసిన ఐరన్ గేట్లు, నో ఎంట్రీ ఫ్లెక్సీలను ఆదివారం మధ్యాహ్నం తర్వాత తొలగించారు. ఆ వెంటనే 15 భారీ క్రేన్లను అందుబాటులో ఉంచారు. సోమవారం నుంచి బుధవారం వరకు వచ్చే విగ్రహాలను పీపుల్స్ప్లాజా, ఎన్టీఆర్ మార్గ్తోపాటు ట్యాంక్బండ్పై నిమజ్జనం చేయనున్నారు.
బడా గణపతి కోసం విజయవాడ నుంచి టస్కర్
ఖైరతాబాద్ బడా గణేశ్ నిమజ్జనం కోసం ఎప్పటిలాగే విజయవాడ ఎస్టీసీ ట్రాన్స్పోర్టుకు చెందిన భారీ టస్కర్ ను తీసుకొచ్చారు.26 టైర్లు, 75 అడుగుల పొడవు, 11 అడుగుల వెడల్పుతో ఉన్న ఈ టస్కర్100 టన్నుల బరువును మోయగలదు. ఈ డీఎస్-6 ట్రాయిలర్ వెహికల్వరుసగా రెండోసారి బడా గణపతిని నిమజ్జనానికి తరలించనున్నది. అలాగే నాగర్కర్నూలుకు చెందిన భాస్కర్రెడ్డి 11వ సారి మహాగణపతి వాహన డ్రైవర్గా వ్యవహరించనున్నారు. ఈసారి ఖైరతాబాద్ లో ఏర్పాటు చేసిన గణేశ్బరువు 70 టన్నులు. వెడల్పు 28 అడుగులు. అందుకు అనుగుణంగా ఆదివారం టస్కర్పై వెల్డింగ్ పనులు షురూ చేశారు.
విగ్రహం కదలకుండా ఉండేలా ఐరన్ స్తంభాలతో బేస్ ఏర్పాటు చేస్తున్నారు. సోమవారం మధ్యాహ్నానికి వెల్డింగ్పనులు పూర్తవుతాయి. సోమవారం అర్ధరాత్రి టైంలో బడా గణపతిని టస్కర్పైకి ఎక్కిస్తారు. ఆ వెంటనే సపోర్టింగ్ వెల్డింగ్ చేస్తారు. ఈ ప్రక్రియ పూర్తవడానికి మూడు నుంచి నాలుగు గంటల సమయం పడుతుంది. అనంతరం వివిధ రకాల పూలతో టస్కర్ ను అలంకరిస్తారు. మంగళవారం ఉదయాన్నే నిమజ్జన ఊరేగింపు మొదలవుతుంది. బడా గణేశ్పక్కన ప్రతిష్ఠించిన శివపార్వతులు, శ్రీనివాస కళ్యాణం, బాలరాముడు, రాహువు కేతువు విగ్రహాల కోసం హైదరాబాద్కు చెందిన మరో ట్రక్ను రెడీ చేశారు.
