- ఇన్ ఫ్రాస్ట్రక్చర్, రీసెర్చ్ ల కోసం రూ.50 కోట్లు రిలీజ్
- మార్చి నెలలో ప్రారంభించిన మంత్రులు
- అందుబాటులోకి రాక పరిశోధనలకు దూరం
హనుమకొండ, వెలుగు: విద్యార్థులను పరిశోధనలు, సరికొత్త ఆవిష్కరణల వైపు నడిపించేందుకు కాకతీయ యూనివర్సిటీలో ఏర్పాటు చేసిన ‘కే -హబ్’ తెరచుకోవడం లేదు. రాష్ట్ర మంత్రులు ఓపెన్ చేసి నెలలు గడుస్తున్నా.. ఇంతవరకు వినియోగంలోకి రావడం లేదు. రీసెర్చ్ లకు అవసరమైన పక్కా బిల్డింగ్, ఇన్ ఫ్రాస్ట్రక్చర్, ఇతర ఎక్విప్మెంట్ కోసం ఫండ్స్ కూడా రెడీగా ఉన్నా ఆఫీసర్ల నిర్లక్ష్యం కారణంగా పరిశోధనల వైపు అడుగులు పడడం లేదు. దీంతో రూ.కోట్లు ఖర్చు పెట్టి కేయూ క్యాంపస్ లో నిర్మించిన కే -హబ్ అలంకారప్రాయంగా మారింది.
రూసా నుంచి రూ.50 కోట్లు..
రాష్ట్రంలో రెండో అతిపెద్ద యూనివర్సిటీగా పేరున్న కాకతీయలో పరిశోధనలను ప్రోత్సహించేందుకు కేంద్ర ప్రభుత్వం రాష్ట్రీయ ఉచ్ఛతర్ శిక్షా అభియాన్(రూసా) కింద 2018లో కే -హబ్ను మంజూరు చేసింది. రీసెర్చ్, ఇన్నోవేషన్, క్వాలిటీ ఇంప్రూవ్మెంట్ కోసం కే హబ్ నిర్మాణానికి దాదాపు రూ.50 కోట్లు మంజూరుచేసింది. ఈ నిధులతో కే హబ్కు పక్కా బిల్డింగ్ తో పాటు వివిధ ప్రాజెక్టులకు సంబంధించిన రీసెర్చ్ సెంటర్స్, ఇతర మౌలిక వసతులు కల్పించాల్సి ఉంది.
ఈ మేరకు 60: 40 ఫండింగ్ తో డెవలప్ చేయనున్న కే -హబ్ కోసం 2020లోనే రూసా రూ.15 కోట్లు రిలీజ్ చేసింది. దీంతో తెలంగాణ స్టేట్ ఎడ్యుకేషనల్ వెల్ఫేర్ ఇన్ఫ్రాస్ట్రక్చర్ డెవలప్మెంట్ కార్పొరేషన్ ఆధ్వర్యంలో రూ.6 కోట్లతో బిల్డింగ్ నిర్మాణ పనులు చేపట్టారు. గత ప్రభుత్వం పట్టించుకోక పనులు నెలల తరబడి సాగుతూ వచ్చాయి.
ఫండ్స్ ఉన్నా..
కే -హబ్ ఏర్పాటు కోసం రాష్ట్ర ప్రభుత్వ సహకారంతో రూసా రూ.50 కోట్లు రిలీజ్ చేయగా.. అందులో మొదటి దశలో రూ.6 కోట్లతో బిల్డింగ్ నిర్మించారు. ఆ తరువాత రూ.9 కోట్లతో అందులో మౌలిక వసతులు కల్పించడంతో పాటు రూ.23 కోట్లతో సెంట్రల్ ఇన్స్ట్రుమెంటేషన్ సెంటర్, సెంటర్ ఫర్ డ్రగ్ రీసెర్చ్, సెంటర్ ఫర్ మాలిక్యూల్స్ అండ్ మెటీరియల్ ఫిజిక్స్, సెంటర్ ఫర్ నానో డ్రగ్ డెలివరీ సిస్టమ్స్, సెంటర్ ఫర్ ఇత్నో మెడిసినల్ ప్లాంట్స్ తదితర రీసెర్చ్ సెంటర్లు ఏర్పాటు చేయాల్సి ఉంది. వాటితో పాటు మిగతా రూ.12 కోట్లను యూనివర్సిటీ టీచర్ల వ్యక్తిగత పరిశోధన ప్రాజెక్టుల కోసం వెచ్చించాల్సి ఉంది. కానీ , ఫండ్స్ రిలీజ్ అయి ఉన్నా వర్సిటీ అధికారులు పెద్దగా పట్టించుకోవడం లేదు.
కే హబ్ వినియోగంలోకి వస్తే అర్టిఫిషియల్ ఇంటెలిజెన్స్(ఏఐ), సైబర్ సెక్యూరిటీ, రోబోటిక్స్, ఫార్మా స్యూటికల్‌ సైన్స్‌, జియోలాజికల్‌ సైన్స్‌ తదితర రంగాల్లో పరిశోధనలకు కూడా ఉపయోగపడే అవకాశం ఉంది. వర్సిటీలో పరిశోధనలు అవరసరమైన అన్ని డిపార్ట్మెంట్లకు ఇంక్యుబేషన్ సెంటర్ గా కూడా ఉపయోగపడుతుంది.
వాస్తవానికి కేయూ, యూజీసీ ఆఫీసర్లు ఇక్కడి ప్రొఫెసర్లు ప్రతిపాదించిన ప్రాజెక్టులపై చర్చించి, అప్రూవ్ అయిన వాటికి సంబంధించిన రీసెర్చ్లపై కదలిక తీసుకురావాల్సి ఉంది. కానీ, పట్టించుకునే అధికారులు లేక పరిశోధనలు ముందుకెళ్లడం లేదనే విమర్శలున్నాయి. ఇకనైనా కే -హబ్ను వినియోగంలోకి తీసుకొచ్చేందుకు ఆఫీసర్లు చొరవ తీసుకోవాలని విద్యార్థులు కోరుతున్నారు.
తొమ్మిది నెలలుగా..
గత పాలకులు పట్టించుకోకపోవడం, విద్యార్థులు పరిశోధనలకు దూరమవుతుండడంతో కాంగ్రెస్ ప్రభుత్వం ఏర్పడిన తరువాత కే హబ్పై దృష్టి పెట్టారు. బిల్డింగ్ నిర్మాణం, శానిటరీ వర్క్స్, వాటర్ సప్లై, ఇంటర్నల్ ఎలక్ట్రిఫికేషన్ పనులు పూర్తి చేశారు.
ఈ ఏడాది మార్చి 10న వరంగల్ నగర పర్యటనకు వచ్చిన ఇన్చార్జి మినిస్టర్ పొంగులేటి శ్రీనివాస్ రెడ్డి, జిల్లా మంత్రులు కొండా సురేఖ, సీతక్క, ఎమ్మెల్యేలు కే హబ్ను గ్రాండ్ గా ఓపెన్ చేశారు. ఆ తరువాత అందులో మౌలిక వసతులు కల్పించడంతో పాటు పరిశోధనలు సజావుగా సాగేందుకు ఏర్పాట్లు చేయాల్సిన అధికారులు బిల్డింగ్కు తాళాలు వేసి పెట్టారు. అప్పటి నుంచి దానిని ఓపెన్ చేయకపోవడంతో ప్రాంగణమంతా గడ్డి, పిచ్చిమొక్కలతో నిండిపోయింది.
