- చెప్పేదొకటి.. డిశ్చార్జ్ అప్పుడు వేసే బిల్లు మరోటి: బండి సంజయ్
- నెలజీతంపై బతికేవాళ్లు హాస్పిటల్ బిల్లులు కట్టలేకపోతున్నరు
- మెడికోవర్డ్ ఫ్యామిలీ కార్డు రిలీజ్చేసిన కేంద్ర సహాయ మంత్రి
హైదరాబాద్ /మాదాపూర్, వెలుగు: ప్రైవేట్ హాస్పిటల్స్ అంటేనే ప్రజలు జంకుతున్నారని, దవాఖాన బిల్లులు భరించలేకపోతున్నారని కేంద్ర సహాయ మంత్రి బండి సంజయ్ అన్నారు. హాస్పిటల్లో చేరినప్పుడు చెప్పినదానికన్నా డిశ్చార్జ్ సమయంలో ఐదారు రెట్లు ఎక్కువగా బిల్లు వేస్తున్నారని తెలిపారు. ‘‘నాకు తెలిసినవాళ్లు ఓ హాస్పిటల్లో చేరారు. మొదట రూ.3 లక్షలు ఖర్చవుతుందని చెప్పారు. తీరా డిశ్చార్జి సమయంలో రూ.16 లక్షల బిల్లు వేశారు. నెలజీతంపై బతికే ఆ కుటుంబం అంత ఫీజు ఎలా కడుతుంది?” అని ప్రశ్నించారు. డిశ్చార్జి కోసం తనను సంప్రదించారని గుర్తుచేశారు.
హైదరాబాద్లోని సైబర్ గేట్ వద్దనున్న మెడికోవర్ దవాఖాన మేనేజ్మెంట్ కొత్తగా ప్రవేశపెట్టిన ‘మెడికోవర్డ్ ఫ్యామిలీ కార్డు’ను బండి సంజయ్ ఆదివారం రిలీజ్ చేశారు. అనంతరం మాట్లాడుతూ.. యూరప్లో మెడికోవర్ పాపులర్ ఆసుపత్రి అని తెలిపారు. ఈ దవాఖాన డాక్టర్ శరత్రెడ్డితో తనకు సన్నిహిత సంబంధం ఉన్నదని గుర్తు చేశారు. ఈ రోజు తాను ఇలా మాట్లాడుతున్నానంటే దానికి కారణం డాక్టర్ శరత్, డాక్టర్ సాహు అని తెలిపారు.
2012లో కరీంనగర్లో ర్యాలీ చేస్తుంటే తనకు హార్ట్స్ట్రోక్ వచ్చిందని, డాక్టర్ సాహుతో మాట్లాడిన డాక్టర్ శరత్ తనకు విజయవవంతంగా శస్త్రచికిత్స జరిగేలా చూశారని, తనను బతికించారని చెప్పారు. ఇది తనకు పునర్జన్మ అని అన్నారు. ఆసుపత్రి అంటే భరోసా కల్పించేలా ‘మెడికోవర్డ్ ఫ్యామిలీ కార్డు’ను ప్రవేశపెట్టడం గొప్ప విషయమని తెలిపారు. ఈ కార్డు తీసుకున్న కుటుంబ సభ్యులందరికీ 15–50 శాతం వరకు ఆసుపత్రి బిల్లులో డిస్కౌంట్ ఇస్తుండడం హర్షనీయమని అన్నారు. కార్యక్రమంలో ఆసుపత్రి సీఎండీ, డైరెక్టర్ డాక్టర్ అనిల్ కృష్ణ, డాక్టర్ శరత్ రెడ్డి, క్రిష్ణ ప్రసాద్, హరికృష్ణ, నటుడు శ్రీరాం పాల్గొన్నారు.
