- లైంగిక వేధించి, హత్య చేశారని గిరిజన సంఘాల ఆందోళన
హైదరాబాద్సిటీ, వెలుగు: మలక్పేటలో లా స్టూడెంట్ అనుమానాస్పద స్థితిలో మృతి చెందింది. రంగారెడ్డి జిల్లా కడ్తల్పక్కన ఓ తండాకు చెందిన రమేశ్, కంసీ దంపతుల కూతురు ఇస్లావత్ శ్రావ్య (20) ఎల్బీనగర్లోని మహాత్మా గాంధీ లా కాలేజీలో మూడో సంవత్సరం చదువుతోంది. ఓ సీనియర్ అడ్వొకేట్ దగ్గర జూనియర్గా ఉంటూనే మలక్ పేట మూసారంబాగ్లోని ఓ ఎడ్యుకేషన్ కన్సల్టెన్సీలో పార్ట్ టైమ్ జాబ్ చేస్తోంది.
ఆదివారం కన్సల్టెన్సీ యజమాని నవీన్ కార్యాలయంలో ఫ్యాన్కు ఉరేసుకొని శ్రావ్య ఆత్మహత్య చేసుకుంది. అయితే, శ్రావ్యది ఆత్మహత్య కాదని, లైంగిక వేధించి హత్య చేశారని యువతి కుటుంబసభ్యులతో కలిసి గిరిజన సంఘాలు మలక్ పేట మెట్రో స్టేషన్ వద్ద రాస్తారోకోకు దిగారు. శ్రావ్య మృతికి కారకులైన నవీన్ను అరెస్ట్ చేసి కఠినంగా శిక్షించాలని డిమాండ్ చేశారు.
ఘటన జరిగిన కొద్దిసేపటికే పోలీసులు హుటాహుటిన మృతదేహాన్ని ఉస్మానియా ఆసుపత్రి మార్చురీకి తరలించడం అనుమానాలకు తావిస్తోందన్నారు. ఈ ఘటనపై కేసు నమోదు చేసి, దర్యాప్తు చేపట్టినట్లు పోలీసులు తెలిపారు. ఆరోపణలు ఎదుర్కొంటున్న నిందితుడిని అదుపులోకి తీసుకున్నట్లు
చెప్పారు.
