- పార్టీ నేతలకు దిశానిర్దేశాల వరకే సరి
- సెక్రటేరియెట్లో తెలంగాణ తల్లి విగ్రహావిష్కరణకూ దూరం
- ప్రభుత్వం ఆహ్వానించినా స్పందించలే
- జులై 25న బడ్జెట్ సమావేశాల్లో పాల్గొని.. “ప్రభుత్వాన్ని చీల్చిచెండాడుతాం” అని హెచ్చరిక
- అంతకు ముందు.. ఆ తర్వాత అసెంబ్లీలో కనిపించని బీఆర్ఎస్ చీఫ్
హైదరాబాద్, వెలుగు: అసెంబ్లీకి బీఆర్ఎస్ చీఫ్, ప్రతిపక్ష నేత కేసీఆర్ మరోసారి ముఖం చాటేశారు. ఫామ్హౌస్కే ఆయన పరిమితమయ్యారు. సోమవారం తొలిరోజు సమావేశాలకు హాజరవుతారా లేదా అని సందేహాలుండగా.. డుమ్మా కొట్టారు. కేవలం పార్టీ నేతలకు దిశానిర్దేశాలతోనే కేసీఆర్ సరిపెట్టారు. రాష్ట్ర ప్రజలు దు:ఖంలో ఉన్నారని, ప్రభుత్వానికి ఇక టైమ్ ఇచ్చేది లేదంటూ ఆదివారం ఫామ్హౌస్లో పార్టీ ఎమ్మెల్యేలు, ఎమ్మెల్సీతో చెప్పిన ఆయన.. తీరా ఫస్ట్ డే అసెంబ్లీ సమావేశాలకు అటెండ్ కాలేదు.
ప్రతిపక్ష నేత అసెంబ్లీకి రావాలని.. ప్రభుత్వానికి సలహాలు, సూచనలు ఇవ్వాలని.. ఏమైనా తప్పులు ఉంటే ఇరుకునపెట్టాలని సీఎం రేవంత్రెడ్డి ఆహ్వానించినా ఆయన ఎప్పటిలెక్కనే వ్యవహరించారు. అసెంబ్లీ సమావేశాలు ఈ నెల 16కు వాయిదా పడటంతో.. అప్పటి నుంచైనా కేసీఆర్ వస్తారా? అనే చర్చ జరుగుతున్నది.
ఒక్కసారి వచ్చి.. ‘చీల్చి చెండాడుతా’మని చెప్పి..!
అసెంబ్లీ ఎన్నికల ఫలితాల తర్వాత కేసీఆర్ ఎక్కువగా ఫామ్హౌస్లోనే ఉంటున్నారు. అసెంబ్లీ ఫలితాల అనంతరం తుంటి ఎముక విరిగాక కొన్నిరోజలు ప్రత్యక్ష రాజకీయాలకు దూరంగా ఉన్నారు. సర్జరీ కావడంతో మొదట్లో ఎమ్మెల్యేల ప్రమాణ స్వీకారానికి కూడా రాలేదు. ఈ ఏడాది ఫిబ్రవరి 1న ఆయన ఎమ్మెల్యేగా ప్రమాణం చేసేందుకు చేతికట్టె సాయంతో అసెంబ్లీకి వచ్చారు. స్పీకర్ చాంబర్లో ప్రమాణం చేసి వెళ్లిపోయారు.
జులై 25న నిర్వహించిన అసెంబ్లీ బడ్జెట్ సమావేశాల్లో ఒక్కరోజు ఇట్ల వచ్చి అట్ల వెళ్లిపోయారు. ఆరోజు మీడియా పాయింట్లో మాట్లాడుతూ.. “ఈ ప్రభుత్వాన్ని చీల్చిచెండాడుతాం” అని హెచ్చరించి.. సభకు ఒక్క రోజు కూడా అటెండ్ కాలేదు. శీతాకాల అసెంబ్లీ సమావేశాలు సోమవారం ప్రారంభం కాగా.. తొలిరోజు కేసీఆర్ రాలేదు.
తెలంగాణ తల్లి విగ్రహావిష్కరణకూ గైర్హాజరు
రాష్ట్ర ప్రభుత్వం అధికారికంగా నిర్వహిస్తున్న తెలంగాణ తల్లి విగ్రహావిష్కరణకూ కేసీఆర్ హాజరుకాలేదు. మంత్రి పొన్నం ప్రభాకర్, ప్రభుత్వ సలహాదారు హర్కర వేణుగోపాల్ఎర్రవల్లిలోని ఫామ్హౌస్కు వెళ్లి కేసీఆర్ను ఆహ్వానించారు. కానీ, సోమవారం సెక్రటేరియెట్లో విగ్రహావిష్కరణకు ఆయన రాలేదు.
