- నిరుద్యోగుల తిండికి లీడర్ల ఆరాటం
- మంచిర్యాల లైబ్రరీలో లంచ్ ఏర్పాటుకు బీఆర్ఎస్, కాంగ్రెస్ నేతల లొల్లి
- మాజీ ఎమ్మెల్సీ లంచ్ ఏర్పాట్లను అడ్డుకున్న ఎమ్మెల్యే
- సొంత పైసలు కాకుండా రూ.15 లక్షల మున్సిపల్ నిధుల కేటాయింపు
- చివరికి స్నాక్స్తో సరిపెడుతున్న ప్రేమ్సాగర్ వర్గీయులు
- నియోజకవర్గంలో పోటాపోటీగా అన్నదానాలు, అంబలి కేంద్రాలు
మంచిర్యాల,వెలుగు: మంచిర్యాల లైబ్రరీలో పోటీపరీక్షలకు సిద్ధమవుతున్న నిరుద్యోగులకు ఉన్నట్టుండి మంచి రోజులొచ్చాయి. రాబోయే ఎన్నికల పుణ్యమా అని వారికి లంచ్, స్నాక్స్ పెట్టేందుకు లీడర్లు పోటీ పడ్తున్నారు. ఇంతవరకు బాగానే ఉన్నా ఈ విషయంలో లోకల్ బీఆర్ఎస్ ఎమ్మెల్యే దివాకర్రావు వ్యవహరించిన తీరుపై విమర్శలు వస్తున్నాయి. ఫ్రీగా ఫుడ్ పెడ్తామని వచ్చిన కాంగ్రెస్ మాజీ ఎమ్మెల్సీ ప్రేమ్సాగర్రావును అడ్డుకున్న ఎమ్మెల్యే, తన సొంత పైసలు కాకుండా మున్సిపల్ నిధులను కేటాయించడం వివాదాస్పదమైంది.
మొత్తం మీద మరో నాలుగైదు నెలల్లో అసెంబ్లీ ఎన్నికలు రానుండడంతో ఆయా వర్గాల ప్రజలను ఆకట్టుకునేందుకు పొలిటికల్ లీడర్లు చేస్తున్న గిమ్మిక్కులను ప్రజలు ఆసక్తిగా గమనిస్తున్నారు.
కాంగ్రెస్, బీఆర్ఎస్ లంచ్ పంచాయితీ..
అసెంబ్లీ ఎన్నికలు దగ్గర పడుతుండడంతో అధికార, ప్రతిపక్ష పార్టీ లీడర్ల దృష్టి జిల్లా లైబ్రరీలో పోటీపరీక్షలకు ప్రిపేర్అవుతున్న నిరుద్యోగులపై పడింది. కొన్నేండ్ల నుంచి వందలాది మంది నిరుద్యోగులు ఇక్కడ ప్రిపరేషన్ కొనసాగిస్తున్నారు. రద్దీ పెరగడంతో కూర్చోవడానికి సీట్లు దొరక్క చాలామంది లైబ్రరీ తెరువక ముందే పొద్దుట ఆరింటికే వచ్చి క్యూ కడుతున్నారు. మార్నింగ్ బ్రేక్ఫాస్ట్ చేయకుండానే ఖాళీ కడుపులతో వచ్చి సాయంత్రం ఏడింటి వరకు చదువుకుంటున్నారు. కొంతమంది మధ్యాహ్నానికి లంచ్ బాక్స్ తెచ్చుకుంటుండగా, మరికొందరు హోటళ్లలో తింటున్నారు. దాదాపు మూడేండ్లుగా ఇదే పరిస్థితి. ఇంతకాలం వారిని పట్టించుకున్న నాథుడే లేడు. ఇప్పుడు ఎలక్షన్ సీజన్ కావడంతో అకస్మాత్తుగా అన్ని పార్టీలకు నిరుద్యోగుల ఆకలి తీర్చాలనే ఆరాటం మొదలైంది. ఈ క్రమంలో మొదట కొక్కిరాల రఘుపతి రావు ట్రస్ట్ఆధ్వర్యంలో ఏఐసీసీ మెంబర్, మాజీ ఎమ్మెల్సీ ప్రేమ్సాగర్రావు లైబ్రరీకి వచ్చే నిరుద్యోగులకు మధ్యాహ్నభోజనం ఏర్పాటు చేస్తామని ప్రకటించారు.
దీంతో కాంగ్రెస్ పార్టీకి ఎక్కడ క్రెడిట్ వస్తుందోనని భావించిన ఎమ్మెల్యే నడిపెల్లి దివాకర్రావు రంగంలోకి దిగారు. ప్రేమ్సాగర్ రావు లంచ్ను ఎట్టి పరిస్థితుల్లో అనుమతించవద్దంటూ లైబ్రరీ ఆఫీసర్లను ఆదేశించారు. ఈలోగా తనకు పైసా ఖర్చులేకుండా రాబోయే మూడు నెలల పాటు మధ్యాహ్నభోజనం ఏర్పాటుకు అవసరమైన రూ.15 లక్షల మున్సిపల్ నిధులు కేటాయించారు. ఇటీవల మున్సిపాలిటీ ఆధ్వర్యంలో అన్నదాన కార్యక్రమం ప్రారంభించారు. కాగా, అదేరోజు రఘుపతిరావు ట్రస్ట్ ఆధ్వర్యంలో డీసీసీ చైర్పర్సన్ కొక్కిరాల సురేఖ సైతం అన్నదానానికి సిద్ధమయ్యారు. లైబ్రరీ ఆవరణలో అన్నదానం చేసేందుకు అనుమతి ఇవ్వకపోవడంతో పక్కనున్న గాంధీ పార్కులో ప్రారంభించారు. ఇలా పోటాపోటీగా మధ్యాహ్నభోజనం వడ్డించడంతో ఇటు తినాలా, అటు తినాలా అని నిరుద్యోగులు అయోమయానికి గురయ్యారు. ఆ మరునాడే కాంగ్రెస్అన్నదానం చేయకుండా అధికార పార్టీ లీడర్లు గాంధీ పార్కుకు తాళం వేయించారు. దీంతో రెండు పార్టీల నడుమ మధ్యాహ్న భోజనం రచ్చ మొదలైంది. చివరకు ప్రేమ్సాగర్రావు ఈవెనింగ్ స్నాక్స్ వితరణతో సరిపెట్టుకోవాల్సి వచ్చింది.
పోటాపోటీగా అంబలి కేంద్రాలు..
మంచిర్యాల నియోజకవర్గంలో వివిధ రాజకీయ పార్టీల నాయకులు ప్రజల దృష్టిని ఆకర్షించేందుకు పోటాపోటాగా అంబలి కేంద్రాలు ఏర్పాటు చేశారు. ఎమ్మెల్యే నడిపెల్లి దివాకర్రావు కొన్నేండ్లుగా ఎండకాలంలో మంచిర్యాల ఐబీ, సీసీసీ, లక్సెట్టిపేటలో 'దివాకరన్న పెరుగన్నం' పెడుతున్నారు. దానిని ఈ ఏడాది కూడా కొనసాగిస్తున్నారు. మాజీ ఎమ్మెల్సీ ప్రేమ్సాగర్ రావు అంబలి పంపిణీ చేస్తున్నారు. ఇదే కోవలో బీజేపీ జిల్లా అధ్యక్షుడు వెరబెల్లి రఘునాథ్రావు మంచిర్యాల ఐబీ, సీసీసీ, శ్రీరాంపూర్ బస్టాండ్, లక్సెట్టిపేట ఊత్కూర్చౌరస్తా, కరీంనగర్ చౌరస్తాల్లో అంబలి కేంద్రాలను ఏర్పాటు చేశారు. ఇక మంచిర్యాల బీఆర్ఎస్ టికెట్ రేసులో దివాకర్రావుతో పోటీ పడుతున్న ఫిల్మ్ డెవలప్మెంట్ కార్పొరేషన్మాజీ చైర్మన్ పూస్కూరి రామ్మోహన్రావు నేను సైతం అంటూ అంబలి పంపిణీ కేంద్రాలు ప్రారంభించారు. అన్ని పార్టీల లీడర్లు మంచిర్యాల, నస్పూర్, లక్సెట్టిపేటలోని మెయిన్ చౌరస్తాలలో పక్కపక్కనే అంబలి కేంద్రాలు పెట్టి జనాలను ఆకట్టుకునేందుకు తిప్పలు పడుతున్నారు.
.మార్నింగ్ బ్రేక్ ఫాస్ట్ పెట్టాలె..
లీడర్ల రాజకీయం పుణ్యమాని నిరుద్యోగులకు మధ్యాహ్నం లంచ్, ఈవెనింగ్ స్నాక్స్అందుతున్నా మార్నింగ్ బ్రేక్ఫాస్ట్ కరువైంది. ప్రస్తుతం దాదాపు 250 మందికి పైగా నిరుద్యోగులు జిల్లా లైబ్రరీలో ప్రిపేర్అవుతున్నారు. రద్దీ పెరగడంతో ఫస్ట్ వచ్చిన వాళ్లకే సీటు దొరుకుతోంది. లేట్ అయితే బయట కూర్చొని చదువుకోవాల్సిందే. దీంతో చాలామంది పొద్దుట ఆరింటి నుంచే క్యూ కడుతున్నారు. మంచిర్యాల టౌన్నుంచే కాకుండా జిల్లాలోని దూరప్రాంతాల నుంచి చాలామంది బ్రేక్ఫాస్ట్ చేయకుండానే వస్తున్నారు. హోటళ్లలో టిఫిన్ చేయాలంటే రోజుకు కనీసం రూ.50 ఖర్చవుతుంది. పేద కుటుంబాలకు చెందినవారు లంచ్టైమ్వరకు ఖాళీ కడుపులతోనే చదువుకుంటున్నారు. దాతలు స్పందించి మార్నింగ్ బ్రేక్ఫాస్ట్ ఏర్పాటు చేయాలని కోరుతున్నారు.
