పెద్దపల్లి, వెలుగు : పెద్దపల్లి ఆర్టీఏ ఆఫీసులో ఎలాంటి ట్రాక్ టెస్టింగులు లేకుండానే వాహనదారులకు లైసెన్స్లు ఇస్తున్నారు. ట్రాక్ లో టెస్ట్ చేయడానికి సరిపోయే గ్రౌండ్ ఆర్టీఏ ఆఫీసు దగ్గర లేదు. ఉన్న స్థలం చిన్నది కావడంతో వాహనదారులు గంటల తరబడి వెయిట్ చేయాల్సి వస్తోంది. లైసెన్స్, రిజిస్ట్రేషన్ల కోసం వచ్చే వారు తీవ్ర ఇబ్బందులు పడుతున్నారు. ప్రస్తుతం కిరాయి బిల్డింగ్లో ఆర్టీఏ ఆఫీసు ఉంది. ఇందులో సరిపడా గదులు లేక నిర్వహణ ఇబ్బందిగా మారింది. ఆర్టీఏ అధికారి కోసం పక్కన మరో షెడ్డు వేసి దాన్ని ఆఫీసుగా కొనసాగిస్తున్నారు.
ల్యాండ్ ప్రాబ్లమ్ తీరేదెప్పుడు...
పెద్దపల్లి జిల్లా కేంద్రంలో ట్రాన్స్పోర్ట్ ఆఫీసు నిర్మాణం కోసం 15 సంవత్సరాలుగా ప్రయత్నాలు జరుగుతూనే ఉన్నాయి. 2007లో ఎస్సారెస్పీ క్యాంపులో భూమి చూపించినా వివిధ కారణాలతో పక్కనబెట్టారు. రాష్ట్ర ప్రభుత్వం కొత్త జిల్లాల్లో ట్రాన్స్పోర్ట్ ఆఫీసుల నిర్మాణం కోసం ప్రతీ జిల్లా కేంద్రంలో 10 ఎకరాల భూమిని కేటాయించాలని నిర్ణయించింది. పర్మినెంట్ ట్రాక్, అనువైన బిల్డింగ్ ఏర్పాటు చేసుకోవడం కోసం 2017లో అందుగులపల్లి శివారు రాజీవ్ రహదారి పక్కన భూమి కేటాయించింది. రెవెన్యూ అధికారులు సర్వే నిర్వహించి ఆర్టీఏ విభాగానికి హ్యండోవర్ చేశారు. అనంతరం అదే భూమిని తిరిగి జిల్లా కోర్టు నిర్మాణం కోసం కేటాయించారు. ఆర్టీఏ ఆఫీసుకు ల్యాండ్ కేటాయింపు విషయమై ప్రస్తుత కలెక్టర్ దృష్టికి ఆర్టీఏ అధికారులు తీసుకెళ్లారు. స్పందించిన కలెక్టర్ రాఘవాపూర్ సమీపంలో ఉన్న సర్కార్ భూమిని సర్వే చేయించారు. కానీ ఒకే చోట 9 ఎకరాలు కేటాయించకుండా, వేర్వేరు స్పాట్స్లో 3 ఎకరాల చొప్పున కేటాయిస్తామని కలెక్టర్ సూచించారు. ఆ ప్రతిపాదనను ఆర్టీఏ అధికారులు ఒప్పుకోవడం లేదు. దీంతో మరోసారి స్థలం పంచాయితీ మొదటికొచ్చింది. అదే ప్లేస్లో ప్రభుత్వం జిల్లా సబ్జైలు కోసం స్థలాన్ని పరిశీలించాలని ఆదేశాలు ఇచ్చినట్లు తెలిసింది. దీంతో ఆర్టీఏ ఆఫీసు కోసం మరో స్థలం చూడాల్సి వస్తోందని అధికారులు చెబుతున్నారు.
ఆర్టీఏ ఆఫీసుకు స్థలం కేటాయించాలి
ఫోర్ వీలర్స్ డ్రైవింగ్ లైసెన్స్ కోసం వెళ్లే వారికి ట్రాక్పై వాహనాలు నడిపించాల్సిన అవసరం లేకుండా పోయింది. 10 మీటర్ల ట్రాక్పై ట్రయల్ చూడడం తప్ప రూల్స్ ప్రకారం వెహికిల్ నడిపించి చూసే అవకాశం లేదు. ఆఫీసు ముందున్న చిన్న ప్లేస్లో వెహికిల్ను ముందుకు, వెనక్కి నడిపితే సరిపోతుంది. బైకు లైసెన్స్ల పరిస్థితి అంతే ఉంది. గతంలో ఆఫీసు పక్కన ఉన్న ప్రైవేటు స్థలాన్ని చదును చేసుకొని ట్రాక్ ఏర్పాటు చేసుకున్నారు. ఇటీవల ఆ ల్యాండ్ ఓనర్ ఇంటి నిర్మాణం చేశారు. ఆర్టీఏ ఆఫీసుకు ట్రాక్ లేకుండా పోయింది. లైసెన్స్లు, రిజిస్ట్రేషన్ల కోసం దాదాపు 12 మండలాలకు చెందిన వాహనదారులు పెద్దపల్లి జిల్లా ఆర్టీఏ కార్యాలయానికి వస్తుంటారు. లైసెన్స్ పొందాలనుకునే వారికి బైకుల వారికి రైడింగ్, హెవీ వెహికిల్ వారికి డ్రైవింగ్ పరీక్షలు నిర్వహించాలి. వీటి కోసం టూ వీలర్ ట్రాక్, ఫోర్ వీలర్ ట్రాక్ ఉండాలి. పెద్దపల్లి ఆర్టీఏలో మాత్రం అలాంటివి ఏమీ లేకుండా పోయాయి. డ్రైవింగ్ స్కిల్ను ఆఫీసర్లు టెస్ట్ చేయకుండానే వదిలివేయాల్సి వస్తోంది. ఆర్టీఏ ఆఫీసుకు వచ్చే వాహనాలు ప్రైవేటు స్థలాల్లో, రాజీవ్ రహదారి పక్కన పార్కు చేస్తున్నారు. వెంటనే ఆర్టీఏ ఆఫీసుకు స్థలం కేటాయించి కొత్త బిల్డింగ్ నిర్మాణం చేయాలని కోరుతున్నారు.
ఉన్నతాధికారులు చొరవ తీసుకోవాలి
ఆర్టీఏ కొత్త బిల్డింగ్ కోసం 2007 నుంచి ప్రయత్నాలు జరుగుతున్నాయి. కొత్త జిల్లా అయిన తర్వాత ప్రభుత్వం భూమి కేటాయించినప్పటికీ ఆ భూమిని వివిధ కారణాలతో బదలాయించారు. ఆర్టీఏ ఆఫీసుకు అనుకూలంగా ఉండే ఓపెన్ గ్రౌండ్తో కూడిన బిల్డింగ్ కావాలి. ప్రస్తుతం ఆర్టీఏ ఆఫీసు ముందు సరిపోయే స్థలం లేకపోవడం వల్ల తీవ్ర ఇబ్బందిగా ఉంది. ఉన్నతాధికారులు స్పందించి సమస్య పరిష్కరించాలి.
- రంగారావు, డీటీఓ పెద్దపల్లి జిల్లా
