అప్పుడప్పుడు తమ ఫోన్ హ్యాక్ అయిందని సెలబ్రిటీలు చెప్తుంటారు. ఇలాంటి సందర్భాల్లో మొబైల్లో ఉన్న పర్సనల్ డేటా హ్యాకర్ల చేతికి వెళ్తుంది. కొన్ని పర్సనల్ ఫొటోలు కూడా లీకవుతుంటాయి. ఇలా కాకుండా ఉండాలంటే జాగ్రత్తలు తీసుకోవాలి. అప్పుడు ఫోన్లోని డేటా ఇతరుల చేతికి వెళ్లకుండా కాపాడుకోవచ్చు.
కొత్త యాప్ ఇన్స్టాల్ చేసేముందు ఒకటికి రెండుసార్లు ఆలోచించాలి. ఎక్కువ మంది వాడే యాప్స్తో పెద్దగా సమస్యలుండకపోవచ్చు కానీ, అంతగా ఎవరికీ తెలియని యాప్స్ విషయంలో మరింత జాగ్రత్తగా ఉండాలి. బ్రౌజర్లు, థర్డ్ పార్టీ సైట్స్ నుంచి యాప్స్ డౌన్లోడ్ చేసుకోకూడదు. వీటిలో చాలా వరకు మాల్వేర్ ఉండే అవకాశముంది. ‘గూగుల్ ప్లే స్టోర్’, ‘యాప్ స్టోర్’ నుంచి మాత్రమే డౌన్లోడ్ చేసుకోవాలి. సోషల్ మీడియా, ఇతర యాప్స్లో వచ్చే లింకులను క్లిక్ చేయకూడదు.
పాస్వర్డ్స్, పిన్కోడ్ల విషయంలో కూడా జాగ్రత్తగా ఉండాలి. ఇటీవల ఓ సంస్థ విడుదల చేసిన నివేదికలో ఎక్కువ మంది ‘12345’ వంటి సులభమైన పాస్వర్డ్స్ పెట్టుకుంటున్నారు. ఇలాంటి పాస్వర్డ్స్, పిన్ కోడ్లను హ్యాకర్లు ఈజీగా పట్టేస్తారు. అందుకే కాస్త కష్టమైన వాటిని పాస్వర్డ్స్గా సెట్ చేసుకోవాలి. అలాగే అవి కష్టమైనా సరే ఒక యాప్ కోసం వాడిన పాస్వర్డ్ మరో దానికి వాడకూడదు.
ఫోన్ ఓఎస్కు సంబంధించి ఎప్పుడు ఎలాంటి అప్డేట్ వచ్చినా వెంటనే ఫాలో అవ్వాలి. అలాగే యాప్స్ను కూడా అప్డేట్ చేసుకుంటూ ఉండాలి. కొత్త అప్డేట్లలో సెక్యూరిటీ ఫీచర్లు యాడ్ అవుతూ ఉంటాయి. దీనివల్ల మాల్వేర్, బగ్స్ నుంచి కాపాడుకోవచ్చు.
కొత్త యాప్స్ ఇన్స్టాల్ చేసుకున్నప్పుడు అవి రకరకాల ‘పర్మిషన్స్’ అడుగుతుంటాయి. వాటిని ఓకే చేసేముందు కాస్త ఆలోచించాలి. వాటికి అన్ని యాక్సెస్లు ఇవ్వాలా వద్దా అని పరిశీలించాలి. ‘లొకేషన్, గ్యాలరీ, కెమెరా, కాంటాక్ట్స్, సెన్సర్స్’ వంటివి యాక్సెస్ ఇచ్చేముందు జాగ్రత్తగా ఉండాలి.
ఫ్రీగా వస్తోంది కదా అని పబ్లిక్ వై-ఫై వాడకూడదు. అలాగే హోటళ్లు, షాపింగ్ మాల్స్లో ఉండే ఉచిత వై-ఫై సర్వీస్ వినియోగించుకునే విషయంలో అప్రమత్తంగా ఉండాలి.
