హైదరాబాద్: తమ ప్రాంతానికి బస్సు సర్వీస్ లేకపోతే ఏర్పాటు చేయాలంటూ రోడ్డెక్కి ఆందోళనలు చేయడం చూశాం. కానీ ట్రైన్ రోజు ఆలస్యంగా వస్తోందని ఆగ్రహానికి గురైన ప్రయాణికులు.. ఏకంగా రైలును ఆపి నడి పట్టాలపైనే ధర్నాకు దిగారు. ఈ విచిత్ర ఘటన తెలంగాణ రాష్ట్ర రాజధాని హైదరాబాద్ నగరంలో చోటు చేసుకుంది. వివరాల ప్రకారం.. చిత్తాపూర్ సికింద్రాబాద్ మధ్య చిత్తాపూర్ ఎక్స్ ప్రెస్ రైలు సర్వీస్ ఉంది. అయితే చిత్తాపూర్ ఎక్స్ప్రెస్ ప్రతి రోజు ఆలస్యంగా వస్తోంది.
పది నిమిషాలు కాదు ఇరవై నిమిషాలు కాదు.. ఏకంగా రెండు, మూడు గంటలు ఆలస్యంగా నడుస్తోంది. దీంతో విసిగిపోయిన ప్రయాణికులు చేసేదేమి లేక.. చిత్తపూర్ ఎక్స్ప్రెస్ ఖచ్చితమైన వేళలు పాటించాలని డిమాండ్ చేస్తూ హైదరాబాద్లోని లింగంపల్లి రైల్వే స్టేషన్ సమీపంలో చిత్తాపూర్ ట్రైన్ను నిలిపి పట్టాలపై ఆందోళన చేశారు. ప్రతిరోజు ఉదయం 7:30కి లింగంపల్లి రైల్వే స్టేషన్కు చేరుకోవలసిన ట్రైన్ మూడు, నాలుగు గంటలు ఆలస్యంగా నడుపుతుండడంతో ఉద్యోగాలకు వెళ్లే వారికి తీవ్ర ఇబ్బందులు ఎదురవుతున్నాయన్నారు.
సకాలంలో ఆఫీసులకు వెళ్లలేక తీవ్ర ఇబ్బందులు ఎదుర్కొంటున్నామని తీవ్ర ఆవేదన వ్యక్తం చేశారు. ఇక నుంచి చిత్తాపూర్ ఎక్స్ప్రెస్ కరెక్ట్ టైమింగ్ పాటించేలా చర్యలు అధికారులు చర్యలు తీసుకోవాలని కోరారు. సమాచారం అందుకున్న పోలీసులు ఘటన స్థలానికి చేరుకుని ఆందోళన నిర్వహించిన ప్రయాణికులను లింగంపల్లి రైల్వే పోలీస్ స్టేషన్కు తరలించారు. అనంతరం ట్రైన్ సమయ పాలన పాటించాలని కోరుతూ ప్రయాణికులు అధికారులకు వినతిపత్రం సమర్పించారు.
