నకిరేకల్ (కట్టంగూరు), వెలుగు : వైన్ షాపుల్లో మా బ్రాండ్లు దొర్కుతలేవ్ అంటూ నల్గొండ జిల్లా కట్టంగూరు మండలం అయిటిపాముల విలేజ్లో లిక్కర్ వినియోగదారులు బుధవారం ధర్నాకు దిగారు. బెల్టు షాపులు మూయించి.. ఎమ్మార్పీకే మందు అమ్మాలంటూ గ్రామంలోని శివ సాయి వెంకటేశ్వర వైన్స్ ముందు నిరసన చేపట్టారు. కేఎఫ్ లైట్ బీరు, ఓసీ, ఐబీ, రాయల్స్టాగ్ బ్రాండ్లు వైన్స్ దుకాణాల్లో అమ్మడం లేదని మండిపడ్డారు. బెల్టు షాపుల్లోనే ఇవి దొరుకుతున్నాయని, ఎమ్మార్పీ మీద 30 రూపాయలు ఎక్కువ పెట్టి కొనాల్సి వస్తున్నదని ఆవేదన వ్యక్తం చేశారు.
అన్ని రకాల బ్రాండ్లు వైన్స్ షాపుల్లోనే అమ్మాలని డిమాండ్ చేశారు. ఓనర్లంతా సిండికేట్గా మారడంతోనే ఈ పరిస్థితి వచ్చిందన్నారు. వెంటనే సిండికేట్ విధానాన్ని ఎత్తేయాలన్నారు. బెల్టు షాపులకు కూడా అధిక ధరలకు మద్యం అమ్ముతున్నారని మండిపడ్డారు. మండల వ్యాప్తంగా ఇదే పరిస్థితి ఉందన్నారు. బెల్టు షాపులు మూసివేయించాలని డిమాండ్ చేశారు. రాత్రి 10 గంటల దాకా తెరిచి ఉంచాల్సిన వైన్స్ షాపులు.. 8 గంటలకే మూసివేస్తున్నారని ఆవేదన వ్యక్తం చేశారు. కల్తీ లేని మద్యాన్ని అందుబాటులో ఉంచాలన్నారు. వైన్షాప్ తెరవకుండా లిక్కర్ వినియోగదారులు అడ్డుకున్నారు. విషయం తెలుసుకున్న కట్టంగూర్ ఎస్ఐ విజయ్కుమార్ ధర్నా చేసిన వారిని పోలీస్ స్టేషన్కు తరలించి.. బైండోవర్ కేసు నమోదు చేశారు.
