గచ్చిబౌలి, వెలుగు: బార్ లైసెన్స్ ఇప్పిస్తానని ఓ వ్యక్తి రూ.కోటి కొట్టేశాడు. కోకాపేటకు చెందిన నాగార్జున, కొంపల్లికి చెందిన ధర్మారెడ్డి కలిసి రాయదుర్గంలో బార్ పెట్టాలని ప్రయత్నిస్తున్నారు. ఈ క్రమంలో వికారాబాద్ జిల్లాకు చెందిన వెంకట పవన్ వారికి పరిచయమయ్యాడు. బీఫార్మసీ పూర్తి చేసి మాదాపూర్ అయ్యప్ప సొసైటీలో ఉంటున్న నిందితుడు.. తనకు ప్రభుత్వంలో పెద్దపెద్ద నాయకులు, అధికారులు తెలుసని, బార్ లైసెన్స్ ఈజీగా ఇప్పిస్తానని నమ్మించాడు. గత ఆగస్టు నుంచి పలు దఫాలుగా ఇద్దరి నుంచి రూ.కోటి తీసుకున్నాడు.
ఆ తర్వాత దరఖాస్తు ప్రాసెస్ లో ఉందని మాయమాటలు చెప్పాడు. నెలలు గడుస్తున్నా లైసెన్సు రాకపోవడంతో అనుమానం వచ్చిన బాధితులు నాంపల్లిలోని ఎక్సైజ్ ఆఫీస్లో ఎంక్వైరీ చేయగా, ఎటువంటి దరఖాస్తు పెండింగ్లో లేదని తెలుసుకొని కంగుతున్నారు. ఈ మేరకు బాధితుల ఫిర్యాదుతో నిందితుడిపై పోలీసులు కేసు నమోదు చేసి దర్యాప్తు చేస్తున్నారు.
